ۇلىلار ەلىنە ساياحات
نازارباەۆ ۋنيۆەرسيتەتىندە سەكسەنگە جۋىق ستۋدەنتتىك كلۋب جۇمىس ىستەيدى. سولاردىڭ ءبىرى – «قازاق ساحناسى» كلۋبى. ول قازاق ءتىلىن, قازاق حالقىنىڭ ۇلتتىق قۇندىلىقتارىن, قازاق ادەبيەتى مەن مادەنيەتىن, ونەرىن دارىپتەپ, ناسيحاتتايدى. كلۋبتىڭ دۇنيەگە كەلگەنىنە ءتورت-اق جىل بولدى. وسى از-اق ۋاقىت ىشىندە جاڭا وتاۋ ءۇش ۇلكەن قويىلىم دايىنداپ, ساحناعا شىعاردى. ولار: اتاقتى رەجيسسەر, ستسەناريست, اكتەر شاكەن ايمانوۆتىڭ «تاقيالى پەرىشتە» كومەدياسى, ءازىلحان نۇرشايىقوۆتىڭ 100 جىلدىق مەرەيتويىنا ورايلاستىرىلىپ دايىندالعان «ماحاببات, قىزىق مول جىلدار» سپەكتاكلى (ستسەناريلەرىن ستۋدەنتتەردىڭ وزدەرى جازعان) جانە ءىلياس ەسەنبەرليننىڭ «عاشىقتار» پوۆەسىنەن ساحنالىق قويىلىم. «ماحاببات, قىزىق مول جىلدار» سپەكتاكلى 17 اقپاندا استاناداعى ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە دە كورسەتىلدى.
ستۋدەنتتەردىڭ ونەردەگى ەڭبەكتەرىن باعالاعان ۋنيۆەرسيتەت اكىمشىلىگى ولاردىڭ وتىنىشتەرىن جەردە قالدىرماي, 34 ستۋدەنتتى ءساۋىردىڭ باسىندا اباي وبلىسىنىڭ ورتالىعى – سەمەي قالاسىنا ءارى قاراي ۇلىلار دۇنيەگە كەلگەن جيدەبايعا اپارىپ كەلدى. ۋنيۆەرسيتەت پرەزيدەنتى شيگەو كاتسۋ مەن وقىتۋشىلار ستۋدەنتتەرمەن بىرگە بارىپ, ۇلى ابايدىڭ, شاكارىمنىڭ باسىنا زيارات جاسادى, جيدەبايداعى ابايدىڭ ءۇي-مۇراجايىن, بورلىدەگى مۇحتار اۋەزوۆتىڭ ءۇي-مۇراجايىن, سەمەيدەگى اباي مۋزەيى مەن تاريحي-ولكەتانۋ مۋزەيىن ارالاپ كوردى.
پرەزيدەنت قاسىم-جومارت توقاەۆتىڭ «ابايدى قازاقستان برەندىنە اينالدىرۋ كەرەك» دەگەن باستاماسىنىڭ ورىندالاتىنىنا وسى ساپار كوزىمىزدى جەتكىزگەندەي بولدى. بۇل ساپاردىڭ ءالى دە جالعاساتىنىنا سەنەمىز. جاستاردى قازاقستاننىڭ كيەلى جەرلەرىنە اپارىپ, ەل تاريحىنا, جەر تاريحىنا سۇيىسپەنشىلىكتەرىن وياتا بىلسەك, ولار وسى ەلدىڭ يەسى وزدەرى ەكەندىكتەرىن دە انىق سەزىنەتىن بولادى. سونىمەن قاتار قازاقستان ۋنيۆەرسيتەتتەرى ستۋدەنتتەرىنىڭ ىنتىماقتاستىق قارىم-قاتىناسىن ورناتۋدى دا ويلاستىرعان دۇرىس. سوندا جاڭا قازاقستانداعى جاڭا ويلى ازاماتتاردىڭ بىرلىگى, دوستىعى قالىپتاسادى.
ءلاززات شاتاەۆا,
نازارباەۆ ۋنيۆەرسيتەتتىڭ ءباسپاسوز حاتشىسى
استانا
ارداگەرلەر ورتالىعىنداعى كەزدەسۋ
جاقىندا استانا قالاسىنداعى «بەلسەندى ۇزاق ءومىر ءسۇرۋ» ورتالىعىندا جازۋشى ادىلبەك ىبىرايىم ۇلىمەن كەزدەسۋ ءوتتى. بىزگە كۇنى بۇرىن وسى اۆتوردىڭ «سەمسەر جۇزىندەگى سەرت» دەپ اتالاتىن ۇشتومدىق رومانى تالقىلاناتىنى حاباردار ەتىلدى. سودان كىتاپحاناعا بارىپ, كىتاپپەن تانىسىپ, 3 تومىن دا وقىپ شىقتىم.
بۇل كەنەسارى حاننىڭ بارلىق ءومىر جولىن, ماقساتىن ايقىن, تۇسىنىكتى تىلمەن سۋرەتتەگەن شىعارما ەكەن. روماننىڭ 1-تومى «ارلاننىڭ ازۋى», 2-تومى «سەرت», 3-تومى «رۋح» دەپ اتالۋىنىڭ وزىندە ۇلكەن ءمان جاتىر. ونى اۆتوردىڭ ءوزى بايىپتى, تۇسىنىكتى تىلدە جەتكىزە ءبىلدى.
كەزدەسۋگە قاتىسقان جۋرناليست, ادەبيەتتانۋشى ساعىندىق نۇرەكەەۆ وسكەلەڭ ۇرپاققا وسى كىتاپ بويىنشا فيلم تۇسىرسە, كوپشىلىك جاقسى قابىلدار ەدى دەگەن ۇسىنىس ايتتى. ال كەزدەسۋدە جوعارى ساناتتى دارىگەر سەرىك ورال وزدەرىنىڭ ارعى بابالارىنان قالعان حاتتىڭ كوشىرمەسىن اۆتورعا ۇسىنعانىن جەتكىزدى. ونىڭ بابالارى كەنەسارى باستاعان ساربازدار جەڭىلىسكە ۇشىراپ, قيىندىققا تاپ بوعان كەزدە ولارعا تاماق تاسىپ بەرىپتى.
كەزدەسۋدە قاتىسۋشىلار اۆتورعا سۇراق قويىپ, ءتيىستى جاۋاپتارىن الدى. ءىس-شارادا سويلەگەندەردىڭ بارلىعى كەش يەسىنە دەنساۋلىق پەن شىعارماشىلىق تابىس تىلەدى. «بەلسەندى ۇزاق ءومىر ءسۇرۋ» ورتالىعىنىڭ ديرەكتورى مۇحتار ەركەتاەۆ ورتالىقتىڭ اتىنان ەسكەرتكىش سىيلىق تاپسىردى.
ءىس-شارانى ۇيىمداستىرعاندارعا, ونىڭ ىشىندە اسىرەسە ءلاززات دۇيسەبايقىزىنا, سونداي-اق زەينەتكەرلەرگە قامقورلىق كورسەتىپ, ورتالىق اشىپ بەرگەن قالالىق اكىمدىكتەگى ازاماتتارعا العىستان باسقا ايتارىمىز جوق.
كۇلاش شۇرەنوۆا,
ارداگەر ۇستاز, قازاقستان رەسپۋبليكاسى ءبىلىم بەرۋ ءىسىنىڭ ۇزدىگى
استانا
ەرەكشە بالالار كوللەدجدە وقيدى
سەمەي قالاسىنداعى پوليتەحنيكالىق كوللەدجدە وبلىس كوللەدجدەرى اراسىندا العاش رەت سەمينار ۇيىمداستىرىلدى. ال پوليتەحنيكالىق كوللەدجدە 90-نان استام بالا تۇراقتى تۇردە ءبىلىم الىپ, قيىن ماماندىقتاردى مەڭگەرىپ ءجۇر. اباي وبلىستىق ءبىلىم باسقارماسى باسشىسىنىڭ ورىنباسارى اسەم نۇسكەنوۆا سەمينارداعى سوزىندە ەرەكشە بالالار وزدەرىن قوعامنىڭ ءبىر مۇشەسى رەتىندە تولىققاندى سەزىنۋلەرى جانە كەدەرگىسىز تۇردە ماماندىق الۋلارى كەرەك دەپ سانايتىنىن ايتتى.
– بۇگىن ءبىز العاش رەت وتە ماڭىزدى ءارى وزەكتى سەمينار وتكىزىپ وتىرمىز. ويتكەنى ەرەكشە بالالار كوڭىل ءبولۋدى, الەۋمەتتىك قورعاۋدى جانە ايرىقشا تەحنيكالىق جابدىقتى قاجەت ەتەدى. وبلىستا ءارتۇرلى ساناتتاعى مۇمكىندىگى شەكتەۋلى بالالار وقيتىن بەس مەكتەپ-ينتەرنات بار. ءبىز مۇمكىندىگى شەكتەۋلى بالالاردى شەتكە تەپپەي, كەرىسىنشە, وزدەرىن قوعامنىڭ تولىققاندى مۇشەسى رەتىندە سەزىنۋلەرىنە كومەكتەسۋىمىز كەرەك. بۇل بالالار وزدەرىنىڭ بىزگە قانشالىقتى قاجەت ەكەنىن سەزىنۋلەرى ءتيىس, – دەدى ءا. نۇسكەنوۆا.
پوليتەحنيكالىق كوللەدج ديرەكتورىنىڭ وقۋ-وندىرىستىك جۇمىس جونىندەگى ورىنباسارى بايان ولجاباەۆا مۇنداي بالالارمەن جۇمىس ىستەۋ وڭاي ەمەس ەكەنىن, بىراق مۇعالىمدەردىڭ بارلىعى دا ناتيجەگە ۇمتىلىپ, بار كۇش-جىگەرىن سالۋعا تىرىساتىنىن ايتتى.
– قازىر بىزدە ءارتۇرلى ماماندىقتار بويىنشا 10-نان استام توپ بار, ولاردا ەرەكشە بالالار وقىتىلادى. ولارمەن جۇمىس ىستەۋ وڭاي ەمەس, بىراق مۇعالىمدەر ساباقتى جوعارى دەڭگەيدە وتكىزۋگە بارىن سالادى. وسى ماقساتتا ءبىز بىلىكتىلىكتى ارتتىرۋ كۋرستارىنان وتتىك, دايىندالدىق, – دەدى ب.ولجاباەۆا.
پوليتەحنيكالىق كوللەدج وبلىستاعى باسقا بارلىق كوللەدجگە ەرەكشە بالالاردى وقىتۋعا ابدەن بولاتىنىن دالەلدەپ بەرىپ وتىر. بۇرىندارى تەك مەكتەپتە عانا وقىتۋعا بولادى دەپ تانىلعان بالالار ەندى ءبىر باسپالداق ىلگەرىلەپ, كوللەدجدە ءبىر كاسىپ مەڭگەرىپ شىعادى. سەمينار بارىسىندا ۇستازدار تاقىرىپقا قاتىستى ماسەلەلەردى تالقىلاپ, ءوزارا تاجىريبە الماستى.
راۋشان قابجانقىزى
سەمەي
