ءىس-شارادا ديحان قامزابەك ۇلى قارىمدى قالامگەردىڭ ونەگەلى ءومىر جولىنا توقتالىپ, ونىڭ قايراتكەرلىك جولى ۇلت باسپاسوزىمەن بىتە قايناسقانىن ەرەكشە اتاپ ءوتتى.
ء«ۋاليحان اعامىز سەكسەنىنشى جىلدارى «قازاقستان پيونەرى» (قازىرگى «ۇلان») گازەتىندە باس رەداكتور بولعان كەزىندە جەتكىنشەكتەرگە ارنالعان باسىلىم تۇرلەنىپ, جاس وقىرماندارىن قۋانتتى. ودان كەيىن «جاس الاش» گازەتىن باسقارىپ, ۇلت ءباسپاسوزىنىڭ دامۋىنا ۇلەسىن قوستى. جاس جۋرناليستەرگە قامقور بولىپ, قولداۋ كورسەتتى. سونداي-اق «ەگەمەن قازاقستانعا» باس رەداكتور بولعان جىلدارى ەلىمىزدىڭ ەكونوميكالىق-الەۋمەتتىك جاعدايى قيىن ەدى. وسى كەزدە باسىلىم قىزمەتكەرلەرىنە جاعداي تۋعىزىپ, ۇجىمدى ەلورداعا كوشىرۋدى ۇيىمداستىردى», دەدى باس ديرەكتور.
جالپى, ارداقتى ازاماتتىڭ جۋرناليستيكادا عانا ەمەس, عىلىمدا دا ءوز قولتاڭباسى بار. 1978 جىلى «اقموللا اقىننىڭ ءومىرى مەن شىعارماشىلىعى» اتتى كانديداتتىق, 1999 جىلى «قازاق ادەبيەتىندەگى ءدىني-اعارتۋشىلىق اعىم ء(حىح عاسىردىڭ ەكىنشى جارتىسى مەن حح عاسىردىڭ باسى)» اتتى دوكتورلىق ديسسەرتاتسيا قورعادى. م.اۋەزوۆ اتىنداعى ادەبيەت جانە ونەر ينستيتۋتىنىڭ ديرەكتورى بولعان جىلدارى ەلەۋلى عىلىمي جوبالاردى جۇزەگە اسىردى. پارلامەنت ءماجىلىسىنىڭ ءىى, ءىىى, ءىV شاقىرىلىمدارىنىڭ دەپۋتاتى بولدى. اۋدارماشىلىق شىعارماشىلىعى دا بەلگىلى.
جيىن سوڭىندا ءسوز العان ءۋاليحان قاليجان ۇلى قۇرمەت كورسەتكەن باس باسىلىم ۇجىمىنا ريزاشىلىعىن جەتكىزدى.
