مەملەكەت باسشىسى 100-ءشى جانە 101-ءشى دەربەس اتقىشتار بريگاداسىنىڭ قۇرامىندا سوعىسقان قازاقستاندىق جاۋىنگەرلەرگە ارنالعان مەموريالدىق كەشەنگە گۇل شوعىن قويىپ, بوزداقتاردىڭ رۋحىنا تاعزىم ەتتى.
مەموريال ۇزىندىعى 27 مەتر, بيىكتىگى 4 مەتر بولاتىن گرانيت قابىرعادان تۇرادى. وندا «100-ءشى جانە 101-ءشى دەربەس اتقىشتار بريگاداسىنىڭ جاۋىنگەرلەرى ماڭگى جادىمىزدا ساقتالادى. سىزدەرگە العىسى شەكسىز قازاقستاندىقتار اتىنان» دەپ جازىلعان.
ەسكەرتكىش تاقتانىڭ وڭ جاعىنا قازاقستان كارتاسى بار پاننو ورناتىلعان. وندا 1941 جىلى ەكى بريگادا جاساقتالعان الماتى جانە اقتوبە قالالارى, سونداي-اق ەلوردامىز – استانا قالاسى بەلگىلەنگەن. وسى بريگادالار ساپىنا قازاقستاننان شاقىرىلعان 9312 جاۋىنگەردىڭ ەسىمى ءمارمار تاقتالارعا قاشالىپ جازىلعان.
سونىمەن قاتار مەملەكەت باسشىسى قىرعىز جاۋىنگەرلەرىنە ارنالعان مەموريالعا گۇل شوعىن قويىپ, قازا تاپقان سولداتتاردى ءبىر مينۋت ۇنسىزدىكپەن ەسكە الدى.
