وتكەن جىلدىڭ قىركۇيەك ايىندا الماتىدا تۇساۋى كەسىلگەن ديماشتىڭ «Stranger» جەكە كونتسەرتىنىڭ باعدارلاماسى الەم بويىنشا ساياحاتىن باستادى. قازاقستانمەن بۇرىننان كەلە جاتقان تاريحي دوستىق قارىم – قاتىناستارى بار باۋىرلاس ەل - تۇركيا 6 مامىردا العاش رەت قازاقستاندىق ورىنداۋشىنىڭ اۋقىمدى شوۋىن وتكىزدى.
ديماشتىڭ جەكە كونتسەرتى Antalya Expo Kongre Merkezi-دە ءوتتى, ول داۋىل تۋرالى ەسكەرتۋگە بايلانىستى بەلگىلەنگەن كۇننەن بىرنەشە كۇن بۇرىن اۋىستىرىلدى.
شوۋعا الەمنىڭ 44 ەلىنەن كورەرمەندەر كەلدى. كورەرمەندەر ءارتىستىڭ انا تىلىندە ورىنداعان كومپوزيتسيالارىن تىڭداپ قانا قويماي, اعىلشىن, يسپان, يتاليان, ورىس, فرانتسۋز, قىتاي جانە جاپون تىلدەرىندەگى اندەردەن دە ءلاززات الدى.
بۇل كەشتە تالاپتى حالىقارالىق تىڭداۋشىلاردىڭ نازارىنا اعىلشىن تىلىندەگى «If I never breathe again», «Fly Away», «Screaming», «Give me your love» شىعارمالارى, قوبىزدىڭ تەرەڭ ۇنىمەن سۇيەمەلدەنەتىن تيتۋلدىق ءان «Stranger», «Together» – ءابىلمانسۇر قۇدايبەرگەننىڭ اۆتورلىق شىعارماسى جانە ۇلتتار مەن ۇلىستار بىرلىگىنىڭ ماڭىزدى حابارىن جەتكىزەتىن ديماشتىڭ «The story of one sky» اۆتورلىق اندەرى ۇسىنىلدى.
ءار ەلدەگى جەكە كونتسەرتتەرىندە ديماش باعدارلاماعا قابىلداۋشى ەلدىڭ تىلىندە شىعارمالاردى ەنگىزۋگە تىرىسادى. تۇرىك جانكۇيەرلەرى ءۇشىن تۇرىكتىڭ ايگىلى «Gesi Baglar» ءانىن ورىندادى. قوناقجاي جۇرگىزۋشىلەر ديماشقا تۇرىك ۇلتتىق اسپابى باگلامانى سىيعا تارتتى. ديماش جىلى قارسى العانى ءۇشىن تۇرىك جەرىنە العىسىن ءبىلدىرىپ, قازاق پەن تۇرىك مادەنيەتىنىڭ ورتاقتىعىن اتاپ ءوتتى.
ايتا كەتەيىك, 2023 جىلى 6 اقپاندا تۇركيا مەن سيريادا قاتتى زىلزالا بولىپ, سالدارىنان 50 مىڭنان استام ادام قازا تاپتى. وسى قايعىلى اپاتقا بايلانىستى كومەك رەتىندە ديماش قۇدايبەرگەن الەم بويىنشا ءوتىپ جاتقان جەكە كونتسەرتتەرىنەن تۇسكەن قاراجاتتارىنىڭ ءبىر بولىگىن باۋىرلاس ەلگە اۋداراتىنىن ايتقان بولاتىن.
