جەتى ايعا سوزىلعان «گەندەرلىك تەڭدىك» باعدارلاماسىن 70 ايەل ءساتتى اياقتاعان. ولارعا وقۋدى تابىستى اياقتاعاندارى ءۇشىن ارنايى سەرتيفيكات پەن گۇل شوقتارىن پرەزيدەنت اكىمشىلىگى باسشىسىنىڭ ورىنباسارى, پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا توراعاسى ايدا بالاەۆا مەن «سامۇرىق-قازىنا» اق باسقارما توراعاسى نۇرلان جاقىپوۆ تابىس ەتتى.
– جالپى, «سامۇرىق-قازىنا» قورى گەندەر تەڭدىگى بويىنشا مەملەكەت ساياساتىن بەلسەندى قولدايدى. ءبىز كومپانيالارىمىزدىڭ باسقارۋ ورگاندارىندا ايەلدەر سانىن ارتتىرۋ بويىنشا مىندەتتەمە الدىق. ونىڭ جۇزەگە اسۋىن قاداعالاپ كەلەمىز. قازىر قوردا 259,5 مىڭ ادام, ونىڭ ىشىندە 72 مىڭعا جۋىق ايەل جۇمىس ىستەيدى. بۇل جالپى قىزمەتكەرلەردىڭ 28 پايىزىن قۇرايدى. ءبولىم باسشىلارىنان باستاپ ەسەپتەگەندە, شامامەن 8,5 مىڭ ايەل باسشىلىق قىزمەتتە. بۇل – بارلىق ايەلدەر سانىنىڭ ۇشتەن ءبىرى. ال جوعارى باسشىلىق قىزمەتتەردەگى ايەلدەر ۇلەسى – بار بولعانى 15 پايىز. ءبىزدىڭ ماقسات – ولاردىڭ ۇلەسىن 2030 جىلعا قاراي 30 پايىزعا دەيىن ارتتىرۋ, – دەدى «سامۇرىق-قازىنا» اق باسقارما توراعاسى نۇرلان جاقىپوۆ كوشباسشى ايەلدەردى قۇتتىقتاۋ سوزىندە.
پرەزيدەنت اكىمشىلىگى باسشىسىنىڭ ورىنباسارى, پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا توراعاسى ايدا بالاەۆا گەندەرلىك تەڭدىك ماسەلەسىنە مەملەكەت باسشىسى كوپ كوڭىل ءبولىپ وتىرعانىن اتاپ ءوتتى.
– ۇلتتىق كوميسسيا قوعامدىق نەگىزدە جۇمىس ىستەيتىن جانە بەلگىلى ءبىر سالانىڭ دامۋىنا جانە قوعامنىڭ وزەكتى ماسەلەلەرىن شەشۋگە ۇلكەن ۇلەس قوساتىن وتە بەلسەندى جانە پەرسپەكتيۆالى ايەلدەردەن تۇرادى. بۇگىندە ايەلدەر قوزعالىسى جاڭا جارقىن وكىلدەرمەن جانە كوشباسشىلارمەن تولىقتىرىلىپ كەلەدى. سىزدەردىڭ ارقايسىڭىزدىڭ قازاقستاندىق قوعامداعى ايەلدەردىڭ جاعدايىن جاقسارتۋعا ىقپال ەتەتىن ءوز يدەيالارىڭىز, باستامالارىڭىز, جوبالارىڭىز بار ەكەنىنە سەنىمدىمىن. ايەلدەردى ءارتۇرلى كومپانيالاردىڭ ديرەكتورلار كەڭەسىنە قوسۋدى كوزدەيتىن بۇگىنگى جوبامىز بىرەگەي, – دەدى ايدا بالاەۆا.
دۇنيەجۇزىلىك بانكتىڭ مالىمەتىنشە, ساراپشىلار باسشىلىق قىزمەتتەگى ايەلدەردىڭ ۇلەسىن ءبىر پايىزعا ارتتىرۋ اكتيۆتەردىڭ تابىسىن 14 پايىزعا, ال كاپيتالدى 25 پايىزعا ارتتىراتىنىن دالەلدەگەن. وسى ورايدا, ء«بىز ايەلدەردى باسشىلىق قىزمەتتەرگە تاعايىنداۋ ارقىلى, تەك گەندەرلىك تەڭدىكتى ساقتاپ قانا قويماي, تابىستى ارتتىرۋدىڭ ۇتىمدى جولىن تاۋىپ وتىرمىز», دەيدى باعدارلاما ۇيىمداستىرۋشىلارى.
– باعدارلاماعا قاتىسۋعا ەلىمىز بويىنشا قورعا قاراستى كومپانيالاردان باسشىلىق قىزمەتتەگى 142 ايەل ءوتىنىش ءبىلدىردى. ءبىز «سامۇرىق-قازىنا» توبىنىڭ ديرەكتورلار كەڭەسى مەن باقىلاۋشىلار كەڭەسىن قالىپتاستىرۋ ەرەجەسىنە سايكەس ءبىر عانا تالاپ قويدىق, ول – ۇمىتكەردىڭ باسشىلىق قىزمەتتەگى جۇمىس ءوتىلى 5 جىلدان كەم بولماۋعا ءتيىس. قاتىسۋشىلاردىڭ ءبارى ەسسە جازىپ, تەست تاپسىردى, وسىلايشا ىرىكتەۋدەن 80-ءى ءوتتى, – دەدى قوردىڭ قوعاممەن بايلانىس, الەۋمەتتىك-ەڭبەك قاتىناستارى جانە ەڭبەكتى قورعاۋ جونىندەگى باسقارۋشى ديرەكتورى عيبرات اۋعانوۆ.
عيبرات اۋعانوۆتىڭ ايتۋىنشا, بىرنەشە وقۋ مودۋلىنەن تۇراتىن كۋرستا, ناقتى بيزنەس كەيستەر مەن كومپانيالاردىڭ ەسەپتەرى قارالعان. كۋرستى اياقتاعان ايەل قىزمەتكەرلەر كوشباسشى ايەلدەر پۋلىنا ەندى. سونداي-اق ولار بولاشاقتا «سامۇرىق-قازىنا» توبىنىڭ ديرەكتورلار كەڭەسى مەن باقىلاۋشىلار كەڭەسىنە مۇشە رەتىندە قاراستىرىلادى. بۇعان قوسا 15 ايەل مەملەكەتتىك كوميسسيالاردىڭ, ال 10-ى مەملەكەتتىك كومپانيالاردىڭ باسقارۋشى ورگاندارىنا ساراپشى بولىپ ەندى.
– كۋرستا ءبىز ديرەكتورلار كەڭەسىندە قالاي جۇمىس ىستەۋ كەرەك, ءوزىن-ءوزى ۇستاۋ, باسقارۋ, ەموتسيالاردى قاداعالاپ, ونىڭ جەتەگىندە كەتپەۋدىڭ تاسىلدەرىن ۇيرەندىك. كوممۋنيكاتسيا, ەرلەرمەن بىرگە ماسەلەنى شەشۋ داعدىلارىن دا مەڭگەردىك, – دەدى قورعا قاراستى كومپانيا ديرەكتورىنىڭ ورىنباسارى اقمارال جاۋباەۆا.
قور الداعى ۋاقىتتا دا قاجەتتىلىك بولعان جاعدايدا جوبا اۋقىمىن كەڭەيتىپ, ودان ءارى دامىتۋعا دايىن ەكەندەرىن ايتادى.
