اعىلشىن تىلىندەگى العاشقى سپەكتاكل

ەلىمىزدىڭ باس قالاسى – استانا كۇنى مەرە­كەسى قارساڭىندا ل.ن. گۋميلەۆ اتىن­داعى ەۋرازيا ۇلتتىق ۋنيۆەرسيتەتىنىڭ «شاڭىراق» ستۋدەنتتىك تەاترى ۇجىمى بەلگىلى دراماتۋرگ, قازاقستاننىڭ ەڭبەك ءسىڭىر­گەن قايراتكەرى جولتاي ءالماش ۇلى جۇماتتىڭ «مۇڭمەن الىسقان ادام» اتتى سپەكتاكلىن اعىلشىن تىلىندە ساحنالادى. اتالعان سپەكتاكل جىل باسىنان بەرى قوستاناي, سەمەي تەاترلارىندا قويىلىپ, كورەرمەندەردىڭ ىستىق ىقىلاسىنا بولەنگەن بولاتىن. ونىڭ ۇستىنە قوستاناي وبلىستىق قازاق دراما تەاترى سول قويىلىمدى ءساۋىر ايىندا ەلوردامىزعا گاسترولدىك ساپارمەن الىپ كەلىپ, تالعامپاز قاۋىمنىڭ نازارىنا ۇسىنعان ەدى. ەندى, مىنە, سول سپەكتاكل ۋنيۆەرسيتەتتىڭ ونەرپاز جاستارىنىڭ ىنتا-جىگەرىمەن اعىلشىن تىلىندە ساحناعا شىعارىلۋى ۇلكەن مادەني جاڭالىق بولدى. بۇل اۆتوردىڭ مەرەيى عانا ەمەس, بۇكىل قازاق دراماتۋرگياسى, قازاق ونەرى ءۇشىن دە ۇلكەن جەتىستىك دەسە بولادى. بۇل تاۋەلسىزدىكتىڭ ارقاسىندا قول جەتكەن ەلىمىزدىڭ رۋحاني تابىستارىنىڭ ءبىرى, ەلباسىمىزدىڭ «ءۇش تۇعىرلى ءتىل» يدەياسىنىڭ ىسكە اسقان ءبىر ءساتى. ءبىز شەتەل كلاسسيكتەرىنىڭ درامالارىن انا تىلىمىزگە كوپتەپ اۋدارىپ, ءجيى-ءجيى ساحنالاپ كەلەمىز, ال ەندى ءتول تۋىندىمىزدى شەتەل تىلدەرىنە اۋدارىپ كورسەتۋ, كوركەمدىك كوكجيەگىمىزدى كەڭىتەتىنى ءسوزسىز. بۇل رەتتە كاسىبي تەا­تر ەمەس, جاستارىمىزدىڭ ءوزى تالپىنىپ, درا­ماتۋرگتىڭ وسى شىعارماسىن تاڭداپ الىپ, ونى اعىلشىن تىلىندە ءساتتى قويىپ شىعۋى قۋانا قوستاۋدى قاجەت ەتەدى. تۋىندىنىڭ تاعى ءبىر ەرەكشەلىگى, ونىڭ تاقىرىبىنىڭ ءوزى شەتەلدە تۇرىپ قالعان قانداستارىمىزدىڭ تاعدىرىمەن تىعىز بايلانىستى. قويىلىمعا كەلگەن كورەرمەندەر قويۋ­شى رەجيسسەر جامبىل تىلەپوۆكە, كوركەم­دىك جەتەكشى ەسبول توكەەۆكە, جاس تالاپ­كەر­لەر ءداۋىر نۇربولاتوۆ, امانبەك ماعزۇم­حان, انار ىزەت, دانا جانابەكقىزى, ەسبول ءتو­كەەۆ, اي­نۇر الىبەكقىزى, الديار جاپار­حانوۆ­تار­دىڭ ونەرلەرىنە ءوز ريزا­شى­لىقتارىن ءبىلدىردى. «ءبىز بۇل قويىلىمدى الداعى ۋاقىتتا استاناداعى بارشا شەتەلدىك ەلشىلىك وكىلدەرىنە كورسەتۋدى قالايمىز, ونى الىس-جاقىن مەملەكەتتەرگە ۇيالماي الىپ بارۋعا بولاتىنىن دا بايقادىق», – دەيدى سىرتقى ىستەر مينيسترلىگى حالىقارالىق اقپارات كوميتەتىنىڭ توراعاسى ر.ۆاسيلەنكو. اينۇر نايمانباي, مادەنيەتتانۋشى.