«قارۋلى كۇشتەرىمىز – مەملەكەتتىگىمىزدىڭ مىزعىماس تىرەگى. تۋعان ەلدىڭ تاۋەلسىزدىگىن جانە بەيبىت ءومىرىن قورعاۋ – قاسيەتتى پارىز. تۋعان جەردىڭ اۋماقتىق تۇتاستىعىن ساقتاۋ – قاستەرلى بورىش. باتىر بابالارىمىز عاسىرلار بويى جەرىنىڭ شەتىن جاۋعا باستىرماي, بىزگە ميراس ەتتى. وسى ۇلى مۇرانى كوزدىڭ قاراشىعىنداي ساقتاۋ – باستى مىندەتىمىز. ءبىرتۇتاس ءارى قۋاتتى مەملەكەتتى ۇرپاققا تابىستاۋ – نەگىزگى ماقساتىمىز. ەل ءىشى – تىنىش, قوعام – تۇراقتى بولسا, جاسامپاز ءارى وركەنيەتتى مەملەكەتكە اينالامىز. ياعني, دامىعان ەل بولامىز دەسەك, ەڭ الدىمەن, بەيبىتشىلىك جانە تىنىشتىق كەرەك», دەدى قازاقستان قارۋلى كۇشتەرىنىڭ جوعارعى باس قولباسشىسى قاسىم-جومارت توقاەۆ.
مەملەكەت باسشىسىنىڭ ايتۋىنشا, قازاقستاننىڭ قارۋلى كۇشتەرى وسى قاستەرلى قۇندىلىقتاردى قورعاۋعا ءتيىس. دەسە دە, سوڭعى ۋاقىتتا الەمدە جاپپاي قارۋلانۋ بەلەڭ الىپ بارادى. بۇل رەتتە قازاقستان ارمياسى ەل ەگەمەندىگىن ساقتاۋعا ءاردايىم دايىن بولۋى ءتيىس.
«بارلىق ماسەلە حالىقارالىق قۇقىق اياسىندا بىرىككەن ۇلتتار ۇيىمىنىڭ جارعىسىنا سايكەس شەشىلۋگە ءتيىس دەپ سانايمىز. الايدا, زامان كۇندە قۇبىلىپ جاتىر. مەملەكەتتەر ءوز مۇددەسىن قورعاۋ ءۇشىن ءجيى كۇش قولداناتىن بولدى. الەمدە جاپپاي قارۋلانۋ بەلەڭ الدى. «جاۋ جوق دەمە, جار استىندا» دەگەن ءسوز بار. قازىرگى كۇردەلى كەزەڭدە ارميانىڭ ءرولى كۇشەيە ءتۇستى. ارميا ەگەمەندىگىمىزدى قورعاۋعا ءاردايىم دايىن بولۋ قاجەت. ونىڭ كاسىبي دايىندىعى, زاماناۋي قارۋ-جاراقپەن, وزىق تەحنولوگيامەن جابدىقتالۋى باستى فاكتورعا اينالدى», دەپ اتام ءوتتى پرەزيدەنت.
وتىرىس بارىسىندا قاسىم-جومارت توقاەۆ اسكەردىڭ بىلىكتىلىگى مەن ۇتقىرلىعى ۇرىس ناتيجەسىنە تىكەلەي اسەر ەتەتىنىن قاداپ ايتتى.
«ارميا وسى تالاپقا ساي بولسا, ءوز مىندەتىن ويداعىداي اتقارادى. ءتۇرلى قاۋىپ-قاتەرگە تويتارىس بەرە الادى», دەدى مەملەكەت باسشىسى.
