ەكىجاقتى كەزدەسۋ بارىسىندا الماتى قالاسى كاسىپكەرلەر پالاتاسىنىڭ باسقارۋشى ديرەكتورى ناريمان يبراگيموۆ: «پاندەميادان كەيىن ەكونوميكانى جانداندىرۋ ءۇشىن الەم ەلدەرى وسى سالادا ءتۇرلى تەتىكتەردى ىسكە قوسىپ جاتىر. ءبىزدىڭ ۇكىمەتىمىز دە تۋريزم مەن اۋىل شارۋاشىلىعىن دامىتۋدى كوزدەيدى. سوندىقتان قىتايمەن جوسپارلى تۇردە ۆيزاسىز رەجىمدى ەنگىزۋ ءتيىمدى قۇرالعا اينالادى دەپ ويلايمىن», دەدى.
سپيكەر سىرتقى ىستەر مينيسترلىگى «قازاقستان ۇكىمەتى مەن قىتاي ۇكىمەتى اراسىنداعى ۆيزالىق تالاپتاردان ءوزارا بوساتۋ تۋرالى كەلىسىمگە قول قويۋ تۋرالى» ۇكىمەت قاۋلىسىنىڭ جوباسىن قوعامدىق تالقىلاۋعا ۇسىنىلعانىن, مامىردا وسى كەلىسىمگە قول قويىلاتىنىن ەسكە سالدى.
ءتيىستى مامىلەگە سايكەس وتانداستارىمىز قىتايدا ۆيزاسىز, ال قىتاي ازاماتتارى قازاقستان اۋماعىندا شەكارادان وتكەن ساتتەن باستاپ 30 كۇننەن جانە 180 كۇندىك مەرزىمدە 90 كۇننەن اسپايتىن مەرزىمدە بولا الادى. ۆيزاسىز رەجىمگە تۋريستىك, جەكە جانە ىسكەرلىك ساپارلار ءۇشىن رۇقسات ەتىلمەك.
«بىرىنشىدەن, ۆيزاسىز رەجىم تۋريستەر لەگىنىڭ ارتۋىنا يگى اسەر ەتەدى. بۇل باعىتتا الماتىنىڭ تاۋ تۋريزمىنەن باستاپ, قالانىڭ كورىكتى جەرلەرىنە دەيىنگى الەۋەتى زور. قازىردىڭ وزىندە تۋريستىك اعىننىڭ ارتۋى بايقالادى», دەدى الماتى قالاسى كاسىپكەرلەر پالاتاسىنىڭ توراعاسى اۋەز تايمبەتوۆ.
ماسەلەن, «DATA HUB» ءبىرىنشى نەسيەلىك بيۋروسىنىڭ Telegram كانالى قازاقستان قوناقۇيلەرى 2022 جىلى رەكوردتىق تابىسقا قول جەتكىزگەن. بۇل 2021 جىلمەن سالىستىرعاندا 73,8 ملرد تەڭگەگە ارتىق. سالىستىرمالى باعادا (ينفلياتسياعا تۇزەتىلگەن) جىلدىق ءوسىم 55,3% قۇرادى دەپ جازادى.
وڭ جەتىستىكتەرگە بارلىق كورسەتكىشتەردىڭ ءوسۋى اسەر ەتىپ وتىر.
تۋريستىك قىزمەت كورسەتىلگەن كەلۋشىلەر سانى 34%-عا (7,3 ملن ادامعا دەيىن), بوس قالماعان كۇندىك توسەك-ورىندار 28,1%-عا (11,5 ملن توسەك-كۇنگە دەيىن), ءبىر ءتۇننىڭ ورتاشا قۇنى 20,5%-عا (11 مىڭ تەڭگەگە دەيىن) وسكەن.
ءوز كەزەگىندە قىتاي دەلەگاتسياسىنىڭ وكىلى, قىتايدىڭ حۋنان ولكەسى ساۋدا پالاتاسىنىڭ كىشى كوميتەتى توراعاسىنىڭ ورىنباسارى يۋ.بينرۋي پروۆينتسيانىڭ ەكونوميكالىق مۇمكىندىكتەرىنە توقتالدى.
ء«بىزدىڭ حۋنان ايماعى قىتايدىڭ وڭتۇستىگىندە, تاۋلى ايماقتا ورنالاسقان. قىتايداعى ەڭ تانىمال تۋريستىك باعىتتاردىڭ ءبىرى. حۋنان پروۆينتسياسىنىڭ ونەركاسىبى دە دامىعان. ءبىزدىڭ ەكونوميكامىز ءتۇستى مەتاللۋرگيا, تەمىر, بولات, ەلەكتر ەنەرگياسىن ءوندىرۋ, ماشينا جاساۋ, كومىر, حيميا, توقىما مەن تاماق ونەركاسىبى, ەلەكترونيكاعا نەگىزدەلگەن. جەر بەدەرىنىڭ ەرەكشەلىكتەرىنە بايلانىستى وبلىستا اۋىل شارۋاشىلىعى جاقسى دامىعان, نەگىزىنەن كۇرىش ەگەمىز. ءبىز ىنتىماقتاستىققا دا, يمپورتقا دا, ەكسپورتقا دا مۇددەلىمىز», دەدى يۋ.بينرۋي.
قىتاي دەلەگاتسياسىن حۋنان پروۆينتسياسىنداعى قىتاي ساۋدا پالاتاسى كىشى كوميتەتىنىڭ ۆيتسە-پرەزيدەنتى يۋ.بينرۋي, حۋان لۋوداڭ, حۋنان پروۆينتسياسىنداعى قىتاي ساۋدا پالاتاسى كىشى كوميتەتىنىڭ حالىقارالىق بايلانىستار دەپارتامەنتى ديرەكتورىنىڭ ورىنباسارى شي چەنين باستاپ كەلدى. دەلەگاتسيا قۇرامىندا حۋنان پروۆينتسياسىنداعى قىتاي ساۋدا پالاتاسى كىشى كوميتەتىنىڭ ساۋدا جانە ينۆەستيتسيالاردى ىنتالاندىرۋ دەپارتامەنتىنىڭ باسشىسى, دەلەگاتسيا قۇرامىندا ەكولوگيا جانە قورشاعان ورتانى قورعاۋ, كولىك جانە لوگيستيكا, سونداي-اق ينۆەستيتسيا سالالارىنىڭ وكىلدەرى بولدى.
كەزدەسۋ بارىسىندا تاراپتار وڭىرلەر اراسىنداعى ىنتىماقتاستىق تۋرالى مەموراندۋمعا قول قويدى. سونداي-اق الماتىلىق كاسىپكەرلەرمەن B2B كەلىسسوزدەرى جۇرگىزىلىپ, وندا قىتايلىق سەرىكتەستەر ءتيىمدى ەكسپورت ماسەلەلەرى بويىنشا كەڭەس بەردى.
الماتى
