ء«ان سۇيمەگەن ءومىردى دە سۇيمەيدى, ءوزىم جوقتا ءانىم ءجۇرسىن قۇلاقتا» دەگەن اقىن قابدىكارىم ىدىرىسوۆتىڭ جىرلارى حالىق جۇرەگىنەن تەرەڭ ورىن الدى. بەلگىلى عالىم تۇرسىن جۇرتباي اتاپ وتكەندەي, «ولەڭ ولكەسىندەگى ءارتۇرلى اۋەننىڭ اراسىنان قابدىكارىم ىدىرىسوۆتىڭ ءوز ءۇنى ەرەكشە ەستىلەدى. اقىن شىعارماسىن تۇتاستاي تۇجىرىمداعانداعى بايقالاتىن باستى دارالىق – پاتريوتتىق رۋح جانە قازاق حالقىنىڭ وزىق داستۇرىنە دەگەن قۇرمەت».
اقىن ەلىمىزدىڭ تالاي جەرىن ارالاپ ءجۇرىپ, ارقايسىسىنىڭ سۇلۋلىعىن جىرعا قوسقان. سونىڭ ىشىندە ارقا دالاسىنىڭ جەر ءجانناتى – باياناۋىل جۇرتىنىڭ ءانۇرانىنا اينالعان «باياناۋىل ءۆالسى» ءانىنىڭ جازىلۋ تاريحى دا ايرىقشا. 1962 جىلى باياناۋىلدا جازۋشى زەيىن شاشكيننىڭ 50 جىلدىعى اتالىپ وتەدى. سول تويدا اقىن قابدىكارىم ىدىرىسوۆ ورتاعا شىعىپ ءبىر ولەڭىن وقيدى. ولەڭدە باياناۋىلدىڭ تابيعاتى مەن ەرەكشەلىگى ادەمى بەينەلەنگەن. مارجانداي تىزىلگەن اسەم ءسوز جينالعانداردى سەلت ەتكىزدى. سول ارادا اتاقتى كومپوزيتور, كۇيشى نۇرعيسا تىلەنديەۆتىڭ ولەڭگە ىنتاسى اۋىپ, ءان جازۋعا بەكىنەدى.
كونتسەرتتىك كەشتە اقىننىڭ ولەڭدەرىنە جازىلعان تانىمال اندەر شىرقالدى. ءبىر ەرەكشەلىگى, بارلىق ءاندى سۇيەمەلدەگەن رۇستەمبەك وماروۆ اتىنداعى قازاق ۇلت اسپاپتار وركەسترىنە قالامگەردىڭ نەمەرەسى, رەسپۋبليكالىق كونكۋرستاردىڭ لاۋرەاتى ءاليحان ىدىرىسوۆ ديريجەرلىك ەتتى. ادەمى كەشتىڭ شىمىلدىعىن تۇركەشتىڭ «كوڭىلاشار» كۇيىمەن اشقان ونەرپازدار بۇدان سوڭ تىڭدارماننىڭ قۇلاق قۇرىشىن قاندىرعان ءان مەن كۇيدى كەزەگىمەن تۇيدەكتەتتى. اقىننىڭ ورىسشادان اۋدارعان «ارقاشان كۇن سونبەسىن», ءانىن كومپوزيتور كەنجەبەك كۇمىسبەكوۆ جازعان «قارقارالىم», «جۇمباقباي اتايدىڭ ءانى», «تۋعان ەل», «كەلشى, كەلشى, بالاشىم», «قازاقستانىم مەنىڭ» اندەرى شىرقالدى. دوستىق ءانۇرانىنا اينالعان ايگىلى «قايداسىڭدار, دوستارىم» ءانى دە تىڭدارماندى ەلىتتى.
قابدىكارىمتانۋشى, جۋرناليست نۇربول جايىقباەۆتىڭ ايتۋىنشا, 1978 جىلى اقىن جازۋشىلار وداعىنىڭ باسشىلىعى اتىنان پاۆلودار وڭىرىندەگى مەرەيتويلىق ءىس-شارالارعا قاتىسقاندا, ونىمەن بىرگە ليريك اقىن ساعي جيەنباەۆ, اتاقتى كومپوزيتور اسەت بەيسەۋوۆ بىرگە ءجۇرىپتى. وسى ساپاردا اسەت بەيسەۋوۆ ق.ىدىرىسوۆتىڭ سوزىنە «تۋعان قالام – پاۆلودارىم» اتتى ءان جازعانى تۋرالى دەرەك بار. كوپ ۋاقىت بويى ەلەۋسىز قالعان بۇل ءان دە ساحنا تورىندە ورىندالدى.
پاۆلودار
