قازاقستان رەسپۋبليكاسىنىڭ پرەزيدەنتى قاسىم-جومارت توقاەۆ جانە تاجىكستان رەسپۋبليكاسىنىڭ پرەزيدەنتى ەمومالي راحمون 1993 جىلعى 13 قاڭتارداعى قازاقستان رەسپۋبليكاسى مەن تاجىكستان رەسپۋبليكاسى اراسىنداعى قاتىناستاردىڭ نەگىزدەرى تۋرالى شارتتىڭ جانە 2015 جىلعى 14 قىركۇيەكتەگى قازاقستان رەسپۋبليكاسى مەن تاجىكستان رەسپۋبليكاسى اراسىنداعى ستراتەگيالىق ارىپتەستىك تۋرالى شارتتىڭ ەرەجەلەرىن باسشىلىققا الا وتىرىپ,
بىرىككەن ۇلتتار ۇيىمى جارعىسىنىڭ ماقساتتارى مەن قاعيداتتارىن, سونداي-اق حالىقارالىق قۇقىقتىڭ جالپىعا بىردەي تانىلعان نورمالارىن ۇستاناتىنىن راستاي وتىرىپ,
ەكى ەل حالىقتارىنىڭ دوستىق پەن ءوزارا سىيلاستىقتىڭ مىزعىماس قاعيداتتارىنا نەگىزدەلگەن عاسىرلار بويعى تاريحي, رۋحاني جانە مادەني تۇرعىدان ورتاق تۇستارىنا سۇيەنىپ,
قازاقستان رەسپۋبليكاسى مەن تاجىكستان رەسپۋبليكاسى اراسىنداعى ديپلوماتيالىق قاتىناستاردىڭ ورناعانىنا 30 جىل تولۋىنىڭ جوعارى ماڭىزى بارىن, تاۋەلسىز دامۋ جىلدارىندا قول جەتكىزىلگەن مەملەكەتارالىق ديالوگتىڭ جوعارى دەڭگەيىن, سونداي-اق سان سالالى ىنتىماقتاستىقتى دامىتۋدىڭ وڭ سەرپىنىن اتاپ كورسەتە وتىرىپ,
ءوزارا سىيلاستىق, سەنىم جانە قولداۋ قاعيداتتارىنا نەگىزدەلگەن ەكىجاقتى قاتىناستاردى ۇزاق مەرزىمدى جانە جان-جاقتى تەرەڭدەتۋ باعىتىنىڭ وزگەرمەيتىندىگىن راستاي وتىرىپ,
ەكىجاقتى ءوزارا ءىس-قيمىلدى جاڭا ساپالىق دەڭگەيگە شىعارۋعا دەگەن ءوزارا ۇمتىلىستىڭ قازاقستان مەن تاجىكستان حالىقتارىنىڭ بايىرعى مۇددەلەرىنە تولىق جاۋاپ بەرەتىنىنە, سونداي-اق ەكىجاقتى ىنتىماقتاستىقتىڭ بارلىق قولدا بار الەۋەتىن ەكى مەملەكەتتى ەكونوميكالىق جاعىنان ودان ءارى وركەندەتۋ مەن وڭىرلىك تۇراقتىلىقتى نىعايتۋ ماقساتىندا كەشەندى تۇردە ىسكە اسىرۋعا جاردەمدەسەتىنىنە سەنىمدى بولا وتىرىپ,
وسى دەكلاراتسيانى قابىلدايدى جانە مىنالاردى مالىمدەيدى:
1. قازاقستان رەسپۋبليكاسى مەن تاجىكستان رەسپۋبليكاسى سان سالالى جانە كوپقىرلى بايلانىستاردى نەعۇرلىم جوعارى دەڭگەيگە شىعارۋدى كوزدەيتىن وداقتاستىق ءوزارا ءىس-قيمىلدى ورناتادى.
2. تاراپتار تاۋەلسىزدىكتى, مەملەكەتتىك ەگەمەندىكتى, اۋماقتىق تۇتاستىقتى نىعايتۋ ماقساتىندا مۇددەلەر مەن تەڭ قۇقىقتىلىقتى ءوزارا ەسكەرۋ نەگىزىندە وداقتاستىق ءوزارا ءىس-قيمىلدى جولعا قويۋعا, سونداي-اق ەكى مەملەكەتتىڭ ستراتەگيالىق ارىپتەستىگى مەن وداقتاستىق ءوزارا ءىس-قيمىلىنا نۇقسان كەلتىرەتىن كەز كەلگەن ارەكەتتەن قالىس قالۋعا نيەتتى.
3. تاراپتار ساياسي, ەكونوميكالىق, ينۆەستيتسيالىق, عىلىمي-تەحنيكالىق, مادەني-گۋمانيتارلىق, اسكەري جانە اسكەري-تەحنيكالىق سالالارداعى ىنتىماقتاستىقتى جان-جاقتى دامىتۋعا دايىن ەكەنىن بىلدىرەدى.
4. قازاقستان رەسپۋبليكاسى مەن تاجىكستان رەسپۋبليكاسى پارلامەنتارالىق دوستىق توپتارىنىڭ قىزمەتىن جانداندىرۋ جانە حالىقارالىق پارلامەنتارالىق ۇيىمدار جەلىسى بويىنشا بىرلەسكەن جۇمىستى كۇشەيتۋ ارقىلى پارلامەنتارالىق ىنتىماقتاستىقتى ودان ءارى نىعايتۋدى جاقتايدى.
5. پرەزيدەنتتەر ەكىجاقتى ساۋدا-ەكونوميكالىق ءوزارا ءىس-قيمىلدىڭ بۇكىل كەشەنىن ۇدەمەلى تۇردە ۇلعايتۋ مەن جەتىلدىرۋدىڭ, تاراپتاردىڭ اۋماقتارىندا ەكى ەل كومپانيالارىنىڭ كاسىپكەرلىك قىزمەتتى جۇزەگە اسىرۋىنا قولايلى ەكونوميكالىق, قارجىلىق جانە قۇقىقتىق جاعدايلاردى قالىپتاستىرۋ, بىرلەسكەن وندىرىستەردى قۇرۋ جانە بىرلەسكەن ەكونوميكالىق باعدارلامالاردى دامىتۋ ءۇشىن قوسىمشا كۇش سالۋدىڭ ماڭىزدى ەكەنىن اتاپ وتەدى.
6. تاراپتار ءوزارا تاۋار اينالىمىنىڭ كولەمىن ۇلعايتۋ بويىنشا, ونىڭ ىشىندە تاۋارلار مەن كورسەتىلەتىن قىزمەتتەردى ىلگەرىلەتۋگە, ساۋدا قۇرىلىمىن ارتاراپتاندىرۋعا, بەرىلەتىن تاۋارلاردىڭ نومەنكلاتۋراسىن كەڭەيتۋگە, سونداي-اق قازاقستان مەن تاجىكستاننىڭ ىسكەر توپتارىنىڭ قاتىسۋىمەن تاۋار وندىرۋشىلەردىڭ ءوزارا ساۋدا-ەكونوميكالىق ميسسيالارى مەن بيزنەس-فورۋمدارىن ۇيىمداستىرۋعا قولايلى جاعدايلار جاساۋ ارقىلى قاجەتتى شارالاردى قابىلدايدى.
7. تاراپتار ينۆەستيتسيالىق ءوزارا ءىس-قيمىلدى ودان ءارى دامىتۋدىڭ, ينۆەستيتسيا تارتۋعا قولايلى جاعدايلار جاساۋ مەن ولاردى مەملەكەتتىك دەڭگەيدە قورعاۋدىڭ ماڭىزدى ەكەنىن اتاپ ءوتتى. تاراپتار ءوزارا ينۆەستيتسيالاردى جان-جاقتى قولداۋ تەتىكتەرىن جەتىلدىرۋ بويىنشا شارالار قابىلداۋعا بەكەم نيەتىن ءبىلدىردى.
8. قازاقستان رەسپۋبليكاسى مەن تاجىكستان رەسپۋبليكاسى مۇناي-گاز جانە حيميا كەشەندەرى, ماشينا جاساۋ, تاۋ-كەن, تاماق جانە جەڭىل ونەركاسىپ, كولىك جانە بايلانىس كاسىپورىندارى اراسىنداعى تىعىز كووپەراتسيانى دامىتۋدى قولدايدى.
9. پرەزيدەنتتەر ءتيىمدى ءوزارا ءىس-قيمىل جاساۋعا, ساۋدا, شارۋاشىلىق, مادەني جانە گۋمانيتارلىق بايلانىستاردى نىعايتۋعا قولايلى جاعدايلار جاساۋ ماقساتىندا قازاقستان رەسپۋبليكاسى مەن تاجىكستان رەسپۋبليكاسىنىڭ وڭىرلەرى اراسىنداعى ىنتىماقتاستىقتى دامىتۋعا جاردەمدەسۋگە دايىن ەكەنىن بىلدىرەدى.
10. تاراپتار اگروونەركاسىپتىك كەشەن سالاسىندا, ونىڭ ىشىندە اۋىل شارۋاشىلىعى تاۋارلارىن ءوزارا بەرۋ, اۋىل شارۋاشىلىعى ونىمدەرىن ءوندىرۋدىڭ, قايتا وڭدەۋ مەن ساقتاۋدىڭ پروگرەسسيۆتى تەحنولوگيالارىن پايدالانۋ ماسەلەلەرى بويىنشا بايلانىستاردى ەكىجاقتى نىعايتۋعا جانە تاجىريبە الماسۋعا جاردەمدەسەتىن بولادى.
11. قازاقستان رەسپۋبليكاسى مەن تاجىكستان رەسپۋبليكاسى كولىكتىك ءوزارا بايلانىس سالاسىندا, ۇلتتىق جانە حالىقارالىق كولىك ينفراقۇرىلىمدارىن بىرلەسىپ پايدالانۋ, ءوز اۋماقتارىندا قولايلى لوگيستيكالىق جاعدايلاردى تيىسىنشە قامتاماسىز ەتۋ جانە ترانزيتتىك تاسىمالداردى جۇزەگە اسىرۋ ىسىندە ءوزارا ءىس-قيمىلدى ۇلعايتۋعا نيەتتى.
12. تاراپتار عارىش كەڭىستىگىن بەيبىت جولمەن يگەرۋ سالاسىنداعى كەشەندى ىنتىماقتاستىقتى, ونىڭ ىشىندە بىرلەسكەن جوبالاردى, ونىمدەر مەن كورسەتىلەتىن قىزمەتتەردى ىسكە اسىرۋ جانە ىلگەرىلەتۋ ارقىلى جولعا قويۋ مەن دامىتۋعا دايىن ەكەنىن بىلدىرەدى, سونداي-اق قازاقستان مەن تاجىكستان ەكونوميكاسىنىڭ سەكتورلارىن تسيفرلاندىرۋ سالاسىنداعى ءوزارا ءىس-قيمىلدى دامىتۋ قاجەتتىگىن اتاپ وتەدى.
13. تاراپتار تسيفرلىق ەكونوميكا جانە ساۋدا, اقپاراتتىق تەحنولوگيالار, IT-قاۋىپسىزدىك جانە جاساندى ينتەللەكت سالاسىنداعى ەكىجاقتى ىنتىماقتاستىقتى دامىتۋدىڭ ماڭىزدى ەكەنىن اتاپ وتەدى.
14. قازاقستان رەسپۋبليكاسى مەن تاجىكستان رەسپۋبليكاسى بەلگىلەنگەن ماقساتتار مەن مىندەتتەرگە قول جەتكىزۋ ماقساتىندا ەكونوميكالىق ىنتىماقتاستىق جونىندەگى قازاقستان-تاجىكستان ۇكىمەتارالىق كوميسسياسىنىڭ قىزمەتىن جانداندىرۋعا نيەتتى.
15. تاراپتار ءوڭىردىڭ سۋ رەسۋرستارىنىڭ ورتاق جانە ءبىر ەكەنىن مويىنداي كەلىپ, سۋ-ەنەرگەتيكالىق رەسۋرستاردى ءوڭىردىڭ بارلىق مەملەكەتىنىڭ مۇددەلەرىن ەسكەرە وتىرىپ, كەشەندى جانە ۇتىمدى تۇردە پايدالانۋ ورتالىق ازياداعى سالاماتتىلىق پەن ورنىقتى دامۋدىڭ نەگىزگى فاكتورلارىنىڭ ءبىرى بولىپ تابىلاتىنىن اتاپ كورسەتەدى.
16. قازاقستان رەسپۋبليكاسى مەن تاجىكستان رەسپۋبليكاسى ارال تەڭىزى باسسەينىندەگى ەكولوگيالىق داعدارىستى ەڭسەرۋگە جانە الەۋمەتتىك-ەكونوميكالىق جاعدايدى جاقسارتۋعا باعىتتالعان بىرلەسكەن باستامالار مەن باعدارلامالاردى ىسكە اسىرۋ بويىنشا ءوڭىر ەلدەرىنىڭ ءوزارا ءىس-قيمىلىن تەرەڭدەتۋ ءۇشىن ورتالىق ازيانىڭ سۋ-ەكولوگيالىق پروبلەمالارىن شەشۋدەگى جالعىز وڭىرلىك ينستيتۋتسيونالدىق الاڭ بولىپ تابىلاتىن حالىقارالىق ارالدى قۇتقارۋ قورىنىڭ ماڭىزدى ءرولىن راستايدى.
17. تاراپتار قورشاعان ورتانى قورعاۋ, تابيعي جانە تەحنوگەندى سيپاتتاعى توتەنشە جاعدايلاردىڭ الدىن الۋ جانە ولاردىڭ سالدارىن جويۋ سالاسىنداعى ىنتىماقتاستىقتى دامىتۋدى جالعاستىرا بەرەدى.
18. قازاقستان رەسپۋبليكاسى مەن تاجىكستان رەسپۋبليكاسى ورتالىق ازياداعى بەيبىتشىلىك پەن تۇراقتىلىقتى قامتاماسىز ەتۋ ماقساتىندا وڭىرلىك ءوزارا
ءىس-قيمىل جونىندەگى ءوزارا مۇددەلەر مەن باستامالاردى ىلگەرىلەتە وتىرىپ, سىرتقى ساياسات سالاسىندا تىعىز ىنتىماقتاسۋعا نيەتتى.
تاراپتار ورتالىق ازيا مەملەكەتتەرى باسشىلارىنىڭ كونسۋلتاتيۆتىك كەزدەسۋلەرىنىڭ الەۋەتىن تولىق ىسكە اسىرۋ ماقساتىندا ولاردىڭ فورماتىن جەتىلدىرۋگە مۇددەلى ەكەنىن راستايدى.
19. قازاقستان رەسپۋبليكاسى مەن تاجىكستان رەسپۋبليكاسى بىرىككەن ۇلتتار ۇيىمىنىڭ جانە ونىڭ ينستيتۋتتارىنىڭ, دۇنيەجۇزىلىك ساۋدا ۇيىمىنىڭ, تاۋەلسىز مەملەكەتتەر دوستاستىعىنىڭ, ۇجىمدىق قاۋىپسىزدىك تۋرالى شارت ۇيىمىنىڭ, شانحاي ىنتىماقتاستىق ۇيىمىنىڭ, ازياداعى ءوزارا ءىس-قيمىل جانە سەنىم شارالارى جونىندەگى كەڭەستىڭ, ەۋروپاداعى قاۋىپسىزدىك جانە ىنتىماقتاستىق ۇيىمىنىڭ, ەكونوميكالىق ىنتىماقتاستىق ۇيىمىنىڭ, يسلام ىنتىماقتاستىعى ۇيىمىنىڭ جانە باسقا دا حالىقارالىق جانە وڭىرلىك قۇرىلىمدار مەن فورۋمداردىڭ اياسىندا تىعىز ءوزارا ءىس-قيمىل جاساۋدى جالعاستىرا بەرەدى.
20. قازاقستان رەسپۋبليكاسى مەن تاجىكستان رەسپۋبليكاسى ەكىجاقتى, سونداي-اق كوپجاقتى دەڭگەيلەردە حالىقارالىق تەرروريزمگە, ەكسترەميزمگە, ەسىرتكى جانە پسيحوتروپتىق زاتتاردىڭ زاڭسىز اينالىمىنا, ترانسۇلتتىق ۇيىمداسقان قىلمىسكەرلىككە, قارۋدىڭ زاڭسىز ساۋداسىنا, كيبەرقىلمىسكەرلىككە جانە حالىقارالىق جانە وڭىرلىك قاۋىپسىزدىكتىڭ باسقا دا سىن-قاتەرلەرى مەن قاۋىپ-قاتەرلەرىنە قارسى كۇرەستە ىنتىماقتاستىقتى نىعايتۋ بويىنشا بىرلەسىپ كۇش جۇمسايتىن بولادى.
21. تاراپتار حالىقارالىق يادرولىق قارۋدى تاراتپاۋ رەجيمىنىڭ ماڭىزدى قۇرامداس بولىگى بولىپ تابىلاتىن ورتالىق ازياداعى يادرولىق قارۋدان ازات ايماق تۋرالى شارتتىڭ ەرەجەلەرىن ۇستاناتىنىن راستايدى.
22. پرەزيدەنتتەر ەكى ەل حالىقتارىنىڭ رۋحاني جانە مادەني جاقىندىعىن ساقتاۋعا, مادەنيەت پەن ونەر, عىلىم, ءبىلىم, تۋريزم, جاستار جانە بۇقارالىق اقپارات قۇرالدارى سالاسىنداعى ءوزارا بايلانىستاردى تەرەڭدەتۋگە جان-جاقتى ىقپال ەتەتىن بولادى.
ەكى مەملەكەتتىڭ اۋماعىندا ۇلتتىق مادەني ورتالىقتاردىڭ, قوعامدار مەن قاۋىمداردىڭ قىزمەتىنە قولايلى جاعدايلار جاساۋعا, سونداي-اق ءبىر مەملەكەتتىڭ اۋماعىندا جۇرگەن باسقا مەملەكەت ازاماتتارىنىڭ قۇقىقتارىن قامتاماسىز ەتۋ جانە مۇددەلەرىن قورعاۋ بويىنشا شارالار قابىلداۋعا دايىن ەكەنىن راستايدى.
23. قازاقستان رەسپۋبليكاسى مەن تاجىكستان رەسپۋبليكاسى عىلىمي زيالى قاۋىم وكىلدەرى, مادەنيەت, ادەبيەت, ونەر قايراتكەرلەرى, قوعامدىق ۇيىمدار مەن مادەني-گۋمانيتارلىق باعىتتاعى باسقا دا مەكەمەلەر اراسىنداعى كوپجىلعى بايلانىستار مەن قاتىناستاردىڭ نەگىزىندە ورتاق مادەني كەڭىستىكتى نىعايتاتىن بولادى.
بۇقارالىق اقپارات قۇرالدارىنىڭ وكىلدەرى, شىعارماشىلىق جانە سپورتتىق ۇجىمدار, جاستار جانە ايەلدەر ۇيىمدارى, كاسىپتىك وداقتار جانە باسقا دا ازاماتتىق قوعام ينستيتۋتتارى اراسىندا تىكەلەي بايلانىستاردى دامىتۋعا جانە تاجىريبە الماسۋعا باسا كوڭىل بولىنەتىن بولادى.
24. مەملەكەت باسشىلارى جاس ۇرپاقتى رۋحاني-ادامگەرشىلىك تۇرعىسىنان تاربيەلەۋدى, ولاردىڭ قۇقىقتارىن قورعاۋدى جانە تالانتتارى مەن تالپىنىستارىن قوعام مۇددەسىندە ىسكە اسىرۋدى قوسا العاندا, ەكى ەلدىڭ جاستارىن قولداۋعا باعىتتالعان بىرلەسكەن ءىس-شارالاردى وتكىزۋدى تولىعىمەن قۇپتاپ-كوتەرمەلەيتىن بولادى.
25. العا قويىلعان جوعارى ماقساتتاردى ىسكە اسىرۋ ماقساتىندا پرەزيدەنتتەر ءوز ۇكىمەتتەرىنە جاقىن ارادا قازاقستان رەسپۋبليكاسى مەن تاجىكستان رەسپۋبليكاسى اراسىنداعى وداقتاستىق قاتىناستار تۋرالى شارتتىڭ جوباسىن ازىرلەۋدى جانە كەلىسۋدى تاپسىردى.
