ەندى وزبەكستاننىڭ قازىرگى پرەزيدەنتى بيلىك ورىنتاعىنا قايتا سايلانۋعا قۇقىلى. وسى ەلدىڭ باق مالىمەتى بويىنشا وزبەكستاننىڭ وسك باسشىسى زاينيددين نيزامحودجاەۆ باستى زاڭنىڭ جاڭا رەداكتسياسىن 90,21 پايىز حالىق قولداعانىن حابارلاعان.
«رەفەرەندۋمعا شىعارىلعان ماسەلەنى قولداپ 15 040 056 ادام داۋىس بەردى, بۇل – داۋىس بەرۋگە قاتىسقانداردىڭ 90,21 پايىزى. داۋىس بەرۋ ۇلتتىق زاڭناماعا جانە حالىقارالىق ستاندارتتارعا سايكەس ءوتتى», دەدى ز.نيزامحودجاەۆ وسك بريفينگىندە.
ورتالىق سايلاۋ كوميسسياسى باسشىسىنىڭ اقپاراتىنا سايكەس ۋچاسكەلەرگە كەلگەندەردىڭ 9,35%-ى كونستيتۋتسيالىق زاڭ جوباسىنا قارسىلىق بىلدىرگەن, بيۋللەتەندەردىڭ 0,49%-ى جارامسىز دەپ تانىلدى.
ناتيجەسىندە, وزبەكستان كونستيتۋتسياسى 65 پايىزعا جاڭارتىلىپ, 27 جاڭا باپ ەنگىزىلگەن, وسىلايشا باپتاردىڭ جالپى سانى 155-كە جەتتى. زاڭعا ەنگىزىلگەن وزگەرىستەردىڭ ءبىرى پرەزيدەنتتىڭ وكىلەتتىك مەرزىمىن بەس جىلدان جەتى جىلعا دەيىن ۇلعايتۋدى كوزدەيدى.
سونداي-اق باستى قۇجاتتا سەناتورلار سانىن 100-دەن 65-كە دەيىن قىسقارتۋ, پارلامەنتتىڭ تومەنگى پالاتاسىنىڭ بيۋدجەتتىڭ اتقارىلۋىن باقىلاۋ جونىندەگى وكىلەتتىكتەرىن بەكىتۋ, ءولىم جازاسىنا تىيىم سالۋ, ەل ازاماتىن شەت مەملەكەتكە بەرۋگە تىيىم سالۋ باپتارى بار. بۇعان قوسا وزبەكستاننىڭ نەگىزگى زاڭىندا ازاماتتىق قوعام ينستيتۋتتارى جانە ولاردىڭ قىزمەتىنىڭ كەپىلدىكتەرى تۋرالى تاراۋ ەنگىزىلگەن. ال وزبەكستان كونستيتۋتسياسى 1992 جىلى قابىلدانعان, سودان بەرى ەلدىڭ باستى زاڭىنا 15 رەت وزگەرتۋ ەنگىزىلگەن.
«Anadolu» اگەنتتىگىنىڭ مالىمەتى بويىنشا جالپىحالىقتىق داۋىس بەرۋگە ارنالعان بيۋللەتەندە ءبىر عانا سۇراق قويىلعان: ء«سىز «وزبەكستان رەسپۋبليكاسىنىڭ كونستيتۋتسياسى تۋرالى» وزبەكستان رەسپۋبليكاسىنىڭ كونستيتۋتسيالىق زاڭىن قابىلدايسىز با؟». وعان ء«يا» نەمەسە «جوق» دەپ جاۋاپ بەرۋ قاجەت بولعان. 2023 جىلدىڭ 10 ناۋرىزىندا وزبەكستان پارلامەنتىنىڭ زاڭ شىعارۋ پالاتاسى «وزبەكستان رەسپۋبليكاسىنىڭ كونستيتۋتسياسى تۋرالى» جاڭا كونستيتۋتسيالىق زاڭ جوباسىن ماقۇلداپ, رەسپۋبليكا كونستيتۋتسياسىنا وزگەرىستەر مەن تولىقتىرۋلار ەنگىزۋ بويىنشا رەفەرەندۋمدى 30 ساۋىرگە بەلگىلەۋ تۋرالى شەشىم قابىلداعان ەدى. وزبەكستاننىڭ وسك باسشىسى حابارلاعانداي, رەفەرەندۋمدا ەشقانداي زاڭ بۇزۋشىلىقتار تىركەلمەگەن, ساياسي ءىس-شارا ءساتتى وتكەن.
مەملەكەت باسشىسى قاسىم-جومارت توقاەۆ پرەزيدەنت شاۆكات ميرزيوەۆتى وزبەكستان رەسپۋبليكاسىنىڭ كونستيتۋتسياسىنا وزگەرىستەر ەنگىزۋ جونىندەگى جالپىحالىقتىق رەفەرەندۋمنىڭ ءساتتى وتۋىمەن قۇتتىقتادى. قاسىم-جومارت توقاەۆ جالپىۇلتتىق تاڭداۋ ەركىنىڭ قورىتىندىسى پرەزيدەنت شاۆكات ميرزيوەۆتىڭ ستراتەگيالىق باعدارىنا وزبەك حالقىنىڭ زور سەنىم ءبىلدىرىپ, قولداعانىنىڭ دالەلى ەكەنىن اتاپ ءوتتى. «قازاقستان مەن وزبەكستان پرەزيدەنتتەرى ەكى ەل اراسىنداعى ستراتەگيالىق سەرىكتەستىك پەن ىنتىماقتاستىقتى نىعايتۋعا نيەتتى ەكەنىن تاعى دا راستادى», دەلىنگەن حابارلامادا.
