2018 جىلى ەلىمىزدىڭ ەنەرگەتيكا مينيسترلىگىنىڭ قولداۋىمەن «شەلل» كومپانياسى جانە نازارباەۆ زياتكەرلىك مەكتەپتەرى «مەكتەپتەرگە كۇن ەنەرگياسى» اتتى قاناتقاقتى جوبانى قولعا العان-دى. جوبانىڭ ماقساتى – ەلىمىزدەگى بەس مەكتەپتە ەنەرگيانىڭ شاعىن قۋاتتى جۇيەسىن قۇرۋعا باعىتتالعان بىرەگەي پلاتفورما جاساۋ. سونداي-اق جاس بۋىننىڭ جاراتىلىستانۋ عىلىمدارىنا, تەحنولوگياعا, يننوۆاتسياعا جانە كاسىپكەرلىككە دەگەن قىزىعۋشىلىعىن ارتتىرۋ.
كۇن ستانساسىنىڭ قۇرىلىسى وتكەن جىلدىڭ قاراشا ايىندا قولعا الىندى. ەندى مەكتەپتىڭ ەلەكتر ەنەرگياسىنا جۇمسايتىن جىلدىق شىعىنى ورتا ەسەپپەن 30 پايىزعا, ياعني 2-6 ملن تەڭگەگە دەيىن ۇنەمدەلەدى. ەڭ باستىسى 240 فوتوەلەكترلىك پانەلدەن تۇراتىن جۇيەلەر سو2 كولەمىن ازايتۋعا مۇمكىندىك بەرەدى. ال ارتىلعان ەلەكتر قۋاتى قالالىق جەلىگە جونەلتىلىپ, ەنەرگيانى ۇنەمدەۋگە سەپتىگىن تيگىزەدى. فوتوەلەكترلىك جۇيەنىڭ ۇزىندىعى – 75 مەتر, بيىكتىگى 5 مەترگە دەيىن جەتەدى.
تۇركىستان قالاسىنىڭ اكىمى نۇربول تۇراشبەكوۆ ءبىر جارىم جىل بۇرىن اشىلعان ءبىلىم ورداسىنىڭ بالامالى ەنەرگيا كوزدەرىن پايدالانۋى ۇلكەن جەتىستىك ەكەنىن اتاپ ءوتتى. «مەكتەپتەرگە كۇن ەنەرگياسى» بىرلەسكەن جوباسىنىڭ جەمىسىن كورىپ وتىرمىز. جوبا اياسىنداعى بەسىنشى فوتوەلەكترلىك جۇيەنىڭ تۇركىستاندا ورناتىلۋى – تاريحي ءسات. بۇل ماقساتتى ىسكە اسىرۋدا زياتكەرلىك وقۋ ورداسىنىڭ ورنى ەرەكشە. ءبىلىم ۇياسى اشىلعاننان بەرى تۇركىستان حالقىنىڭ زياتكەرلىك الەۋەتىن ارتتىرۋعا قىزمەت ەتىپ كەلەدى. سوندىقتان مۇنداعى العىر دا اقىلدى شاكىرتتەردەن ەكولوگيا, ەكونوميكا تاقىرىپتارىنا ارنالعان تىڭ جوبالار كۇتەمىز», دەدى ول.
سونىمەن قاتار كومپانيا جاسوسپىرىمدەردىڭ تابيعي قۋات كوزدەرىن زەرتتەۋگە قىزىعۋشىلىعىن ارتتىرۋ ءۇشىن مۇعالىمدەرگە ارناپ «شەلل NXplorers» باعدارلاماسىن ۇيىمداستىرىپتى. 2022 جىلدىڭ قازان ايىندا تۇركىستان وبلىسىنىڭ ۇستازدارى ءۇشىن ارنايى ءبىلىم بەرۋ باعدارلاماسى بويىنشا وقىتۋ ترەنينگى وتكىزىلگەن. «مەكتەپتەرگە كۇن ەنەرگياسى» جوباسى – NIS ستراتەگياسىنىڭ ماڭىزدى بولىگى. بۇل STEM-ءبىلىمدى ەنگىزۋ مەن ەڭ باستىسى, وقۋشىلار اراسىندا ەكو-مادەنيەتتى قالىپتاستىرۋ, سونداي-اق قورشاعان ورتاعا ۇلكەن جاۋاپكەرشىلىكپەن قاراۋعا تاربيەلەۋدەگى تابىستى باستاما ەكەنىن بەسىنشى مارتە دالەلدەدى. قازىرگى تاڭدا عالىمدار ەكولوگيالىق مادەنيەتتى ادامزاتتىڭ تابيعاتپەن بىرلىگى نەگىزىندە قاراستىرىپ ءجۇر. راسىندا, مۇنداي ادام قورشاعان ورتاعا قامقورلىق جاساپ, ونىڭ جويىلۋى مەن لاستانۋىنا جول بەرمەيدى», دەيدى «نازارباەۆ زياتكەرلىك مەكتەپتەرى» دەربەس ءبىلىم بەرۋ ۇيىمىنىڭ باسقارما توراعاسى ءانۋار جانعوزين.
ايتا كەتەيىك, ەل بويىنشا ءدال وسىنداي كۇن ەلەكتر ستانساسى استانا, ورال, اتىراۋ جانە اقتاۋ قالالارىندا ورنالاسقان زياتكەرلىك مەكتەپتەردە دە بار. بۇل جۇيەلەر ءار وقۋ ورداسىنا 100 كۆت ەنەرگيا وندىرۋگە مۇمكىندىك بەرەدى. كۇن باتارەيالارى ءار مەكتەپتىڭ قاجەتتىلىگىن قاناعاتتاندىرۋ ءۇشىن ارنايى ازىرلەنگەن مەتالل قوندىرعىلارعا بەكىتىلگەن. «كۇن پانەلدەرىنىڭ قوندىرىلۋى جاس بۋىن ءۇشىن جاڭارتىلعان ەنەرگيا كوزدەرى بويىنشا تابىستى عىلىمي جوبالار جاساۋدىڭ, ماماندىق تاڭداۋ مەن بولاشاقتى ايقىنداۋدىڭ قاينار كوزىنە اينالدى», دەيدى NIS قامقورشىلىق كەڭەسىنىڭ مۇشەسى كۇلاش ءشامشيدينوۆا.
تاياۋ شىعىس, سولتۇستىك افريكا جانە تمد ەلدەرى بويىنشا «شەلل» كونتسەرنىنىڭ كورپوراتيۆتىك قاتىناستار جونىندەگى ۆيتسە-پرەزيدەنتى دجواننا كۋنزبەرگ ەلىمىزدىڭ قورشاعان ورتانى قورعاۋ مەن بالامالى ەنەرگيا كوزدەرىن وندىرىسكە ەنگىزۋ باعىتىنداعى باستامالارىنا ەرەكشە توقتالدى. «قازاقستان «جاسىل» ەكونوميكاعا كوشۋ ءۇشىن ۇلكەن ماقساتتار قويىپ وتىر. ءبىزدىڭ كومپانيا مەملەكەتتىڭ وسى باعىتتاعى بارلىق باستاماسىن قولدايدى. «مەكتەپتەرگە كۇن ەنەرگياسى» جوباسى وسى وتپەلى كەزەڭگە ءوز ۇلەسىمىزدى قوسۋعا باعىتتالعان جوبالاردىڭ ءبىرى», دەدى ول.
