جارىسقا 50-دەن اسا ءوتىنىم تۇسكەن. سونىڭ ىشىندە 11 ستارتاپ فينالدىق دوداعا ءوتتى. ولار ءوز جوبالارىن 3 مينۋتتىڭ ىشىندە قازىلار القاسىنا تانىستىرىپ, كاسىبي كەڭەستەر, ۇسىنىستار مەن الەۋەتتى سەرىكتەستەر تابۋ مۇمكىندىگىنە يە بولدى.
– ءبىز «Astana Hub»-پەن سەرىكتەستىك اياسىندا «اI Battle» بايقاۋىن ۇيىمداستىرىپ, جاساندى ينتەللەكتىنىڭ شەكسىز الەۋەتىن پايدالانۋعا ۇمتىلاتىن جاڭا ستارتاپتارعا قولداۋ كورسەتۋگە نيەتتىمىز. ماقساتىمىز – جاساندى ينتەللەكت ارقىلى اۋقىمدى دەرەكتەردى تالداۋداعى تاجىريبەمىزگە سۇيەنە وتىرىپ, ولارعا دامىپ, جاڭا بايلانىستار تابۋ ءۇشىن قاجەتتى رەسۋرستار مەن پلاتفورمانى ۇسىنۋ. جەڭىمپازدار يندۋستريانىڭ دامۋىنا ۇلكەن ۇلەس قوسادى دەگەن ويدامىز, – دەيدى «Presight AI» باس ديرەكتورى توماس پراموتەدحام.
«Alaqan», «Relive» جانە «ARA» ستارتاپتارى ءۇش نەگىزگى اتالىمدا جەڭىمپاز اتانىپ, سايكەسىنشە 10 مىڭ دوللار, 5 مىڭ دوللار جانە 3 مىڭ دوللار جۇلدە قورىنا يە بولدى.
– جاساندى ينتەللەكت جانە ۇلكەن دەرەكتەر سالاسىندا بەلسەندى جۇمىس ىستەپ جاتقان وتاندىق ستارتاپتاردىڭ كوبەيگەنى قۋانتادى. بۇگىنگى داۋىردە دەرەكتەرگە نەگىزدەلگەن اناليتيكا ماڭىزدى ءرول اتقارادى جانە ولاردى ءوز بيزنەسىنە ەنگىزەتىن ستارتاپتارىمىزدى دامىتۋ قاجەت. «Astana Hub» مەن «Presight AI» سەرىكتەستىگى جانە الداعى بىرلەسكەن باعدارلامالارىمىز ارقىلى كاسىپورىندار مەن ستارتاپتارعا وزدەرىنىڭ يننوۆاتسيالارىن ەنگىزۋ ءۇشىن قاجەتتى قولداۋ كورسەتۋدى ماقسات ەتىپ وتىرمىز, – دەيدى تسيفرلىق دامۋ, يننوۆاتسيالار جانە اەروعارىش ونەركاسىبى ۆيتسە-ءمينيسترى اسقار جامباقين.
ەستەرىڭىزدە بولسا, بيىل قاڭتاردا «Astana Hub» بىرىككەن اراب امىرلىكتەرىنىڭ «Presight AI» كومپانياسىمەن ىنتىماقتاستىق تۋرالى مەموراندۋمعا قول قويعان بولاتىن. وسى كەلىسىم اياسىندا «Group42» وپەراتسيالىق كومپانياسى «Presight AI» «Astana Hub» قاتىسۋشىلارىنىڭ ستارتاپ جوبالارىن ۆەنچۋرلىق قارجىلاندىرۋ مۇمكىندىگىن قاراستىرىپ جاتىر. سونداي-اق «Presight AI» قازاقستان, ورتالىق ازيا, ازەربايجان جانە موڭعوليادان كەلگەن تەحنوپارك قاتىسۋشىلارىنىڭ ستارتاپ جوبالارىنا تاياۋ شىعىس پەن افريكا نارىعىنا شىعۋعا كومەكتەسەدى.
جاساندى ينتەللەكت – اسا ماڭىزدى جانە ەڭ جىلدام دامىپ كەلە جاتقان تەحنولوگيالىق ءۇردىس. ساراپشىلاردىڭ دەرەگى بويىنشا AI جاھاندىق نارىعىنىڭ كولەمى باعدارلامالىق-تەحنيكالىق قۇرالدار مەن قىزمەتتەردى قوسقاندا, 2021 جىلى 383,3 ملرد دوللاردى قۇرادى. بۇل 2020 جىلمەن سالىستىرعاندا 20,7 پايىزعا جوعارى. وتكەن جىلى نارىق شامامەن 450 ملرد دوللارعا ءوستى جانە الداعى ۋاقىتتا دا وسىنداي ديناميكا جالعاسپاق.
