فورۋم بيزنەس-قوعامداستىق اراسىنداعى ىسكەرلىك بايلانىستى دامىتۋعا جانە ەكى مەملەكەت اراسىنداعى ساۋدا جانە ينۆەستيتسيا سالاسىنداعى ىنتىماقتاستىقتى نىعايتۋعا باعىتتالعان. تسيفرلىق دامۋ, يننوۆاتسيالار جانە اەروعارىش ونەركاسىبى ۆيتسە-ءمينيسترى اسقار جامباقين اتاپ وتكەندەي, تۇركيا – ەلىمىزدىڭ ەڭ باسىم ساۋدا-ەكونوميكالىق جانە ينۆەستيتسيالىق سەرىكتەستەرىنىڭ ءبىرى. سونىڭ ىشىندە ءىت سالاسىنىڭ الەۋەتى زور.
ەكى كۇندىك فورۋمدا قازاق جانە تۇرىك بيزنەس-دەلەگاتسيالارى بەتپە-بەت ديدارلاسۋ, كوللابوراتسيا مەن ىنتىماقتاستىق پەرسپەكتيۆالارىن تالقىلاۋ ءۇشىن جەكە كەلىسسوزدەر جۇرگىزۋگە مۇمكىندىك الدى.
– ءبىز قازاقستاندىق كومپانيالارمەن ىنتىماقتاستىقتى نىعايتۋ ءۇشىن B2B كەزدەسۋلەرىن ۇيىمداستىردىق. ءدال وسىنداي شارا الماتىدا دا ءوتتى. فورۋمنىڭ ناتيجەسىندە جاڭا كەلىسىمشارتتار جاسالىپ, جەرگىلىكتى كومپانيالارمەن ۇزاق مەرزىمدى ىنتىماقتاستىق ورناتىلدى, – دەدى «Bilkent CYBERPARK» باس ديرەكتورى فارۋك ينالتەكين.
كەلىسسوزدەر باعدارلامالىق قامتاماسىز ەتۋ, IoT, پورتال ازىرلەۋ, ەنەرگەتيكالىق مونيتورينگ جانە باسقارۋ, اۆتوماتتاندىرۋ, سمارت قالا شەشىمدەرى, جاساندى ينتەللەكت, ماشينالىق وقىتۋ, ءموبيلدى قوسىمشا, فينتەح, تسيفرلىق ترانسفورماتسيا, ونىمدىلىك, سمارت ءۇي جۇيەسى, قورعانىس ونەركاسىبى, گەوگرافيالىق اقپاراتتىق شەشىمدەر, IT, ەلەكتروندى قۇجات اينالىمى, ەلەكتروندى قولتاڭبا شەشىمدەرى, دەنساۋلىق سالاسى سەكىلدى بيزنەس-ساناتتاردى قامتىعانىن ايتا كەتەيىك.
– ءبىز جۋىردا مينيستر باعدات مۋسين باستاعان ۇلكەن دەلەگاتسيانىڭ قۇرامىندا تۇركيانىڭ تەحنولوگيالىق كاسىپكەرلىك ەكوجۇيەسىندە ماڭىزدى ورىن الاتىن «Bilkent Cyberpark»-تە بولدىق. بۇل جولعى فورۋم – «Digital Bridge» حالىقارالىق فورۋمىندا قول قويىلعان مەموراندۋم اياسىنداعى سەرىكتەستىگىمىزدى ودان ءارى دامىتۋدىڭ تاعى ءبىر دالەلى, – دەدى وتاندىق تەحنوپارك ەكوجۇيەسىن تانىستىرۋ بارىسىندا «Astana Hub» باس ديرەكتورى ماعجان ماديەۆ.
ەسكە سالا كەتەيىك, 2022 جىلدىڭ 28 قىركۇيەگىندە «Digital Bridge» حالىقارالىق فورۋمىنىڭ الاڭىندا تۇركى ەلدەرىنىڭ تەحنوپاركتەرى – «Bilkent Cyberpark» (تۇركيا), «Astana Hub» (قازاقستان), «Sabah Lab» (ازەربايجان), «پۆت» (قىرعىزستان), «Bilisim Vadisi» (تۇركيا), «IT Park Uzbekistan» (وزبەكستان) ىنتىماقتاستىق تۋرالى مەموراندۋمعا قول قويعان بولاتىن. ايماقتاعى اقپاراتتىق-كوممۋنيكاتسيالىق تەحنولوگيالار مەن يننوۆاتسيالىق ەكوجۇيەنى بىرلەسىپ دامىتۋعا باعىتتالعان بۇل كەلىسىم تۇركى مەملەكەتتەرى ۇيىمىنىڭ سەگىزىنشى سامميتىندە تۇركى ەلدەرىنىڭ زاماناۋي تەحنوپاركتەر ورتالىعىن قۇرۋدى ۇسىنعان ەل پرەزيدەنتى قاسىم-جومارت توقاەۆتىڭ باستاماسى اياسىندا جاسالعان ەدى.
