تارقاتىپ ايتساق, ساۋد ارابياسىنان كەلگەن كارديوحيرۋرگ, كورولدىك مەملەكەتتىك كارديوحيرۋرگيا سالاسىنداعى كلينيكانىڭ ديرەكتورى مۇحامەد ساللاح الرەشحيدان شەبەرلىك ساباعى بارىسىندا جۇرەكتىڭ قولقا قاقپاقشاسىن اۋىستىراتىن ەڭ جاڭا «Avalus» بيولوگيالىق پروتەزىن 52 جانە 60 جاستاعى ەكى پاتسيەنتكە يمپلانتاتسيالادى.
يننوۆاتسيالىق وپەراتسياعا وڭىرلەردەگى جەتەكشى كارديوحيرۋرگيالىق كلينيكالاردىڭ حيرۋرگتەرى دا ورتاقتاسىپ, ولار جۇرە كەلە پايدا بولعان جانە ءتۋابىتتى قولقا (اورتا) قاقپاقشاسى كەسەلىنە بيولوگيالىق پروتەزدى يمپلانتاتسيالاۋ جونىندەگى وقىتۋدان ءوتتى.
الماتىداعى كارديولوگيا جانە ىشكى اۋرۋلار عزي باسقارما توراعاسى مارات پاشيموۆ: «كلينيكامىزدىڭ بازاسىندا تمد اۋماعىندا العاش رەت ساۋد ارابياسىنىڭ جەتەكشى كارديوحيرۋرگىنىڭ قاتىسۋىمەن جۇرەكتىڭ قولقا قاقپاقشاسىن اۋىستىرۋ ءۇشىن سوڭعى بۋىنداعى بيولوگيالىق پروتەز يمپلانتاتسيالاندى. بۇل بيولوگيالىق جۇرەك قاقپاقشاسىنىڭ پروتەزىن يننوۆاتسيالىق تۇرعىدا جەتىلدىرۋدىڭ 40 جىلدىق تاجىريبەسىنە نەگىزدەلگەن. بۇكىل الەمدىك تاجىريبەدەگى ەڭ ۇزدىكتەرىن بىرىكتىرە وتىرىپ, وسىنداي قاقپاقشا قۇرىلسا, ول جوعارى گەموديناميكالىق كورسەتكىشتەرىمەن, پايدالانۋ جەڭىلدىگىمەن, بەرىكتىگىمەن, ءۆارفاريندى قولدانۋ قاجەتتىلىگى بولماۋىمەن ەرەكشەلەنەدى», دەيدى.
وسى وپەراتسيادان وتكەن, ياعني قولقا قاقپاقشاسىنىڭ قىزمەتىندە كىناراتى بار ەكى ناۋقاس جۇرەك اينالاسىنىڭ قىسىپ اۋىرۋى, كوپ قيمىلداعان كەزىندە ەنتىگۋ, تەز شارشاپ قالۋ سياقتى شاعىمدارىمەن ستاتسيونارعا ءتۇسىپ, ولارعا دارىگەرلەردىڭ حيرۋرگيالىق ارالاسۋى قاجەتتىگى كورىنگەن.
«جۇرەك قاقپاقشالارىن پروتەزدەۋ تەحنولوگيالارى ۇزدىكسىز دامىپ كەلەدى. جۇرەك قاقپاقشالارىن پروتەزدەۋ وپەراتسياسى جۇرەكتەگى قان اعىمىن قالىپقا كەلتىرۋگە, جۇرەك جەتكىلىكسىزدىگىنىڭ دامۋىنا جول بەرمەي, جۇرەككە قوسىمشا سالماقتى جويۋ ءۇشىن جۇرگىزىلەدى. ال اسقىنۋ قاۋپى جوعارى جانە ەگدە جاستاعى ناۋقاستارعا جۇرەك قاقپاقشالارىنىڭ بيولوگيالىق پروتەزدەرىن قولدانعان ءجون. بيولوگيالىق قاقپاقشالاردىڭ ماڭىزدى ارتىقشىلىقتارىنىڭ ءبىرى – قاندى سۇيىلتاتىن دارىلەر-انتيكواگۋليانتتاردى ءومىر بويى قابىلداۋدىڭ قاجەتتىلىگى توقتايدى», دەيدى كارديوحيرۋرگيا بولىمشەسىنىڭ مەڭگەرۋشىسى رۇستەم تولەۋتاەۆ.
مامانداردىڭ ايتۋىنشا, جاڭا بۋىن جۇرەك قاقپاقشاسىنىڭ بيولوگيالىق پروتەزى وڭاي جانە ۇزاق قىزمەت ەتەدى. قاقپاقشا يمپلانتاتسياسى ءۇشىن ستاندارتتى ءتاسىل دە, ستەرنوتوميانى قاجەت ەتپەيتىن, اعزاعا بارىنشا زاقىمى از تەحنيكا دا قولايلى, بۇل كەۋدە قۋىسى قاڭقاسىن ساقتاۋعا, ينفەكتسيالىق اسقىنۋلاردىڭ قاۋپى مەن جانعا باتاتىن اۋىرتپالىقتى تومەندەتۋگە مۇمكىندىك بەرەدى. سونداي-اق وپەراتسيادان كەيىن تىنىس الۋ جەڭىلدەپ, ۇزاق ۋاقىت بويى كورسەت كيۋ قاجەتتىلىگى جويىلادى دا, قالىپتى ومىرگە تەزىرەك ورالۋعا مۇمكىندىك ۇلعايادى.
الماتى
