سوناۋ تارازدان ات ارىتىپ كەلگەن ەلىمىز قۇراما كومانداسىنىڭ اعا باپكەرى ماقسات وسپانوۆتىڭ ايتۋىنشا, تامىز ايىندا برازيليانىڭ ريو-دە-جانەيرو قالاسىندا ۇيىمداستىرىلاتىن الەمدىك گيمنازيادادا سپورتتىڭ 22 تۇرىنەن جان الىسىپ, جان بەرىسكەن سايىستار وتپەك. سونىڭ ءبىرى – بوكس. سودان كەيىن قازان ايىندا دۋبايدا ازيا چەمپيوناتىنىڭ جالاۋى جەلبىرەمەك. مىنە, وسى ەكى سايىسقا دا ەلىمىزدىڭ ورەندەرى قاتىسىپ, نامىستى قولدان بەرمەۋگە تىرىسادى.
ەل چەمپيوناتىنىڭ سالتاناتتى اشىلۋىندا وبلىستىق دەنە شىنىقتىرۋ جانە سپورت باسقارماسى باسشىسىنىڭ ورىنباسارى سەرىك قۇسامباەۆ, جاڭادان تاعايىندالعان وبلىستىق فەدەراتسيانىڭ پرەزيدەنتى, «مۇزتاۋ جانە ك» جشس ديرەكتورى جانبولات قازانوۆ, بوكستىڭ ارداگەرلەرى ءسوز الىپ, وسكىن بوكسشىلارعا ساتتىلىك تىلەدى.
جارىس 15 سالماق دارەجەسى بويىنشا ءوتتى. جارىستىڭ ءبىرىنشى كۇنى تۇركىستان وبلىسىنان, شىمكەنتتەن, جامبىل وبلىسىنان, وسكەمەننەن كەلگەن ايان جاندوس ۇلى, قانىبەك باقداۋلەت, باقىتبەك جىگەر, قۇرالباي باقداۋلەت, تاعى باسقالار شارشى الاڭدا ادەمى جۇدىرىقتاستى. 33 جانە 70 كيلودان جوعارى سالماقتاعى بوكسشىلار ءبىر رەت ۇتىلسا, شىعىپ قالادى. ۇلىتاۋ وبلىسىنان وسكەمەندەگى سايىسقا سەگىز بوكسشى كەلىپتى. ساتباەۆ قالاسىنداعى بالالار جانە جاسوسپىرىمدەر سپورت مەكتەبىنىڭ جاتتىقتىرۋشىسى ەسىركەپ ءدۇسىپوۆ ءوزىنىڭ ەكى شاكىرتىن الىپ كەلگەنىن, الايدا بىرەۋى جارىستان شىعىپ قالعانىن وكىنە ايتتى.
جارىسقا بوكستان ەلىمىزدىڭ مەملەكەتتىك جاتتىقتىرۋشىسى, الەم چەمپيونى مەرەي اقشالوۆ, «استانا ارلاندارى» ساپىندا الەم چەمپيونى اتانعان ميراس بايىرحانوۆ, كسرو سپورت شەبەرى ۆلاديمير رەچينسكي, كاسىپقوي بوكستان الەم چەمپيونى مارات مازىمباەۆ, كسرو سپورت شەبەرى ەرجان ايجىگىتوۆ پەن تاعى باسقا دا اتاعىنان ات ۇركەتىن بوكس ارداگەرلەرىنىڭ قاتىسۋى جارىستىڭ كورىگىن قىزدىرا ءتۇستى. ال كەزدەسۋلەر اسا تارتىستى ءوتتى. ماسەلەن, ەڭ جەڭىل سالماق – 33 كيلودا پاۆلودارلىق ءۋاليحان رامازانوۆ اقمولالىق قورعانبەك ءبالتيندى ءۇش راۋند بويى شابۋىلداپ, ناتيجەسىندە قارسىلاسىن ءشۇباسىز ۇتتى. 35 كيلو سالماقتا الماتى قالاسىنان كەلگەن تەمىرلان قانسەيىتوۆ قارسىلاسى جامبىلدىق سۇلتان سىرىمنان باسىم ءتۇسىپ, چەمپيون اتاندى. بۇل ەكەۋى دە سپورت شەبەرلىگىنەن ۇمىتكەر اتاندى. جارىستىڭ ەرەجەسى بويىنشا باس جۇلدەگە يە بولعاندار وسى اتاققا يە بولىپ, الداعى ءدۇبىرلى ەكى دوداعا ۇمىتكەر اتانادى. 49 كيلو سالماقتا ماڭعىستاۋ وبلىسىنان كەلگەن دارىن تاسمۇحانبەتوۆ قارسىلاسى جامبىلدىق ايتجان ءادىلجاننان ەكى راۋند بويى ۇتىلىپ جاتقان. سوڭعى شەشۋشى راۋندتا بەلسەندى قيمىلداپ, جەڭىستى ج ۇلىپ اكەتتى. جارىستىڭ قورىتىندىسىندا دارىن «چەمپيوناتتىڭ ەڭ ۇزدىك بوكسشىسى» اتاندى. ال اباي وبلىسىنىڭ بوكسشىسى قايىرعازى نۇراسىل «جەڭىسكە دەگەن جىگەرى ءۇشىن» اتالىمىنا يە بولدى.
سوڭعى فينالدىق سايىسقا تۇركىستان مەن جامبىل وبلىسىنان جەتىدەن, ال شىعىس قازاقستان وبلىسىنان بەس بوكسشى شىقتى. جينالعان جانكۇيەرلەر وسى ءۇش وبلىس رەت-رەتىمەن كوماندالىق ەسەپتە جۇلدەلى ورىنداردى بولىسەتىن شىعار دەپ ويلاعان. ولاي بولمادى. ناتيجەسىندە, تۇركىستان وبلىسى 5 التىن, 2 كۇمىس, 2 قولامەن توپ جاردى. ەكىنشى ورىندى 4 التىن, 1 قولامەن شىعىس قازاقستان وبلىسىنىڭ كومانداسى يەلەندى. ال بارلىعى 11 مەدال – 3 التىن, 4 كۇمىس, 4 قولا العان جامبىل وبلىسىنىڭ تۇلەكتەرى ءۇشىنشى ورىنعا جايعاستى.
قورىتا ايتقاندا, جاسوسپىرىمدەر اراسىنداعى ەل چەمپيوناتى جوعارى دەڭگەيدە ءوتتى. قازاق ەلىنىڭ 13-14 جاستاعى بوكسشىلارىنىڭ ءدۇبىرلى ەكى دوداعا ازىرلىگى ويداعىداي دەۋگە نەگىز بار. شىعىس قازاقستان وبلىستىق بوكس فەدەراتسياسىنىڭ پرەزيدەنتى جانبولات قازانوۆ, ورىنباسارى ميراس بايىركەنوۆ, تاعى باسقالارعا جينالعاندار العىسىن ءبىلدىردى. الدا تۇرعان مىندەت – بوكسشىلاردىڭ شەبەرلىگىن شىڭداپ, ريو-دە-جانەيرو جانە دۋبايداعى ءدۇبىرلى دودالارعا بابىمەن شىعارىپ سالۋ. الماتىداعى وليمپيادالىق دايارلاۋ ورتالىعى (باسشىسى سەرىك جاراسباەۆ) ناعىز تالانتتى بوكسشىلاردى دۇرىس تاڭدايدى دەگەن ويدامىز.
وڭداسىن ەلۋباي,
قازاقستاننىڭ قۇرمەتتى سپورت قايراتكەرى
وسكەمەن
