جارىستىڭ سالتاناتتى اشىلۋىنا الماتى وبلىسىنىڭ اكىمى مارات سۇلتانعازيەۆ قاتىسىپ, بايگەنى تاماشالاۋعا جيىلعان قاۋىمدى
1 مامىر – بىرلىك كۇنىمەن قۇتتىقتادى. سونداي-اق اتادان بالاعا جەتكەن ۇلتتىق سپورتتى دامىتۋ بويىنشا وڭىردە يگىلىكتى ىستەر ءجىبىن ۇزبەي جالعاسىپ كەلە جاتقاندىعىن, اسىرەسە, ۇلتتىق قۇندىلىقتى دارىپتەپ, جاستاردى جىگەرلەندىرەتىن ات سپورتىنىڭ ءورىسىن كەڭەيتۋگە ءاردايىم اكىمدىك تاراپىنان قولداۋ كورسەتىلەتىندىگىن تىلگە تيەك ەتكەن ول بايگەگە قاتىساتىن شاباندوزدارعا ساتتىلىك تىلەدى.
– ەلىمىزدە كونەدەن كەلە جاتقان قۇنان بايگە, الامان بايگەنىڭ بارىن بىلەمىز. بىراق, الەمدە كەڭ تارالعانى ۇشقىر بايگە. سوندىقتان حالىقارالىق تاجىريبەنى زەرتتەپ, زەردەلەي كەلە ۇشقىر بايگەنىڭ دامۋىنا ۇلەسىمىزدى قوسىپ, ناسيحاتتاۋدى باستاپ كەتتىك. وسى وڭىردە تۋىپ-وسكەن شاباندوز باۋىرجان مىرزاباەۆتىڭ ەسىمى ەۋروپاعا ايگىلى. ونىڭ تالانتى تالايدى تامساندىرىپ ءجۇر. سوندىقتان ءبىزدىڭ ەلىمىزدەن ءالى تالايدىڭ تاڭدايىن قاقتىرار مىقتى جوكەيلەر حالىقارالىق ارەناعا شىعىپ, ەلىمىزدىڭ كوك تۋىن كوكتە جەلبىرەتەتىن بولادى, – دەگەن قازاقستان ۇلتتىق سپورت قاۋىمداستىعىنىڭ پرەزيدەنتى يسلامبەك سالجانوۆ ۇلتتىق سپورتتىڭ دامۋىنا ەل پرەزيدەنتى ەرەكشە ءمان بەرىپ, قولداۋ كورسەتىپ وتىرعانىن ايرىقشا اتادى.
ۇلتتىق سپورتتىڭ دارەجەسىن ارتتىرىپ, حالىقارالىق دەڭگەيگە كوتەرۋ ماقساتىندا قۇرىلعان «Qazaq World Cup» دەپ اتالاتىن بۇل جارىستىڭ جۇلدە قورى شامامان 20 ميلليون تەڭگەدەن اسادى. مامىر ايىنان باستاۋ العان جارىس قاراشا ايىنا دەيىن ءار ەكى اپتا سايىن ۇيىمداستىرىلماق.
تۇڭعىش رەت تۇساۋى كەسىلگەن «Qazaq World Cup» ءتۋرنيرى كەلەر جىلى ەلىمىزدە وتەتىن V دۇنيەجۇزىلىك كوشپەلىلەر ويىندارىنا دايىندىقتىڭ باستاۋى سانالادى.
سونداي-اق بۇل كۇنى بايگەنى تاماشالاۋعا كەلگەن كورەرمەندەر اراسىندا ارقان تارتۋ, قىز قۋ, اسىق اتۋ سىندى ۇلتتىق ويىن تۇرلەرىنەن جارىس ۇيىمداستىرىلىپ, جەڭىمپازدارعا سىيلىقتار تابىس ەتىلدى. تانىمال ونەر جۇلدىزدارى كۇي كۇمبىرلەتىپ, اسەم ءان شىرقادى. ءسويتىپ, ءسانى مەن سالتاناتى كەلىسكەن جارىس ءوز مارەسىنە جەتتى.
قىسقا قاشىقتىقتا اسقان جىلدامدىقپەن مارە سىزىعىن كەسكەن بايگە جەڭىمپازدارى ارنايى كۋبوكپەن جانە قارجىلاي جۇلدەلەرمەن ماراپاتتالدى.
الماتى وبلىسى
