«ەلگە ەل قوسىلسا – قۇت» دەيدى دانا حالقىمىز. بۇگىنگى دەپۋتاتتىق ساۋالىم تەرىسكەيگە كوش جايىندا بولماق. ەلىمىزدەگى ەڭبەك كۇشىن رەتتەۋ ماقساتىندا جۇزەگە اسىرىپ كەلە جاتقان وڭتۇستىكتەن-سولتۇستىككە قونىس اۋدارۋ باعدارلاماسىنىڭ جۇزەگە اسىپ جاتقانىنا دا بىرنەشە جىلدىڭ ءجۇزى بولدى. «قۋاتتى وڭىرلەر – ەلدى دامىتۋدىڭ درايۆەرى» ۇلتتىق جوباسىن ىسكە اسىرۋ شەڭبەرىندە 2022 جىلى تەرىسكەيگە 7923 ادام قونىس اۋدارعان. ولاردىڭ 1320 قانداس جانە 6603 ىشكى قونىس اۋدارۋشىلار بولعان. ال بيىلعا 8652 ادامعا كۆوتا بولىنگەن. 2021-2025 جىلدارعا بۇل باعدارلاماعا 46,7 ميلليارد تەڭگە بولىنسە دە وڭ ناتيجەسىن بەرمەي وتىر. سەبەبى كوشىپ بارعاندار كوپ ۇزاماي ءوز ايماقتارىنا قايتادان كوشىپ جاتىر. رەسمي ستاتيستيكاعا سۇيەنسەك, سولتۇستىك قازاقستان وبلىسىنىڭ وزىندە-اق ميگراتسيا سالدوسى تەرىس مانگە يە. سوڭعى جىلدارى وڭتۇستىك ايماقتان كوشىپ كەلگەن 600 ادام بۇل وبلىستان قايتا كوشىپ كەتكەن», دەدى ءماجىلىس دەپۋتاتى.
ءماجىلىس دەپۋتاتى ماسەلە ادامداردى كوشىرۋدە ەمەس سول وڭىردە تۇراقتاپ قالۋىندا ەكەنىن ايتتى.
«ادامداردى كوشىرۋ ەمەس, كوشىپ بارعانداردى سول مەكەندە ۇستاپ قالۋ قيىن. ارقا جايلى بولسا, ارقار اۋىپ نەسى بار. سولتۇستىك قازاقستاندا جۇمىس كوزى از, ءومىر ءسۇرۋ دەڭگەيى تومەن, بەرىلگەن باسپانالاردىڭ ساپاسى سىن كوتەرمەيدى. بەرىلگەن جوسپاردى ورىنداۋ ءۇشىن سان قۋىپ جۇرگەندە ساپا ۇمىت قالعانداي. سولتۇستىككە كوشۋگە ىنتالى ازاماتتار كوپ», دەدى داۋلەت مۇقاەۆ.
ونىڭ ايتۋىنشا, باعدارلاما اياسىندا سولتۇستىككە قونىس اۋدارعانداردىڭ كوبى بەرىلگەن ءۇيدىڭ ساپاسىنا سىن ايتقان. سونداي-اق ءماجىلىس دەپۋتاتى سولتۇستىككە قونىس اۋداراتىن وتباسىلارعا قوسىمشا جاعداي جاساۋ تۋرالى ۇسىنىس ءبىلدىردى. ءارى باسىمدىق كوپبالالى وتباسىلارعا بەرىلۋ كەرەك دەدى.
«قونىس اۋدارعان اعايىنعا جات جەردىڭ تىنىس-تىرشىلىگىنە ۇيرەنىسۋگە جاردەمشى بولاتىن ارنايى بەيىمدەۋ ورتالىعى مەن بىرەگەي سايت, جەدەل جەلى تەلەفونى ىسكە قوسىلۋى كەرەك. سەبەبى قونىس اۋدارۋشى قانداستارىمىزدىڭ كوبى كيريلل قارىپتەرىن وقىعاندا قينالعاندارى بايقالادى. ال ءوزىمىزدىڭ جەرگىلىكتى حالىق بولسا كوشى-قون جايلى تولىق اقپارات بىلە بەرمەيدى. سەبەبى اقپاراتتاندىرۋ, تۇسىندىرمە جۇمىستارى وتە از. قونىس اۋدارۋشىلاردى ارنايى كوميسسيا نەگىزىندە ىرىكتەپ, كاسىپكە يكەمى بار, كوپبالالى وتباسىلارعا باسىمدىق بەرىلۋ كەرەك. قونىس اۋدارعاننان كەيىن تۋعان ءار سابيگە دە بەرىلەتىن جاردەماقى دەڭگەيىن ارتتىرۋ دەموگرافياعا سەرپىن بەرەرى ءسوزسىز», دەدى ءماجىلىس دەپۋتاتى.
