بۇۇ-نىڭ اتالعان قارارىنا قازاقستان, قىتاي, ارمەنيا, گرۋزيا, يزرايل, ءۇندىستان, برازيليا جانە تۇركيانى قوسقاندا بارلىعى 122 ەل داۋىس بەردى. رەزوليۋتسياعا رەسەي, بەلارۋس, سيريا, نيكاراگۋا جانە سولتۇستىك كورەيا قارسى بولدى. ال تاجىكستان, وزبەكستان جانە قىرعىزستاندى قوسقاندا 18 مەملەكەت قالىس قالدى.
«26 ساۋىردە نيۋ-يوركتەگى بۇۇ باس اسسامبلەياسىنىڭ جيىنىندا «بۇۇ مەن ەۋروپا كەڭەسىنىڭ ىنتىماقتاستىعى تۋرالى» قارار قابىلداندى. اتالعان رەزوليۋتسيانى بۇۇ 2000 جىلدان باستاپ قابىلداپ كەلەدى. قۇجاتتا بۇۇ-نىڭ وڭىرلىك ۇيىمدارمەن ىنتىماقتاستىعى تۋرالى ايتىلاتىن پۋنكتى بار. بۇگىنگە دەيىن وسى ءبولىم ەش داۋىسقا سالىنباستان قابىلدانىپ كەلدى. ال وسى جىلى داۋىس بەرۋ وزگەشە ءوتتى. بيىلعى رەزوليۋتسيانىڭ وسى بولىگىندە «رەسەيدىڭ ۋكرايناعا جانە ونىڭ الدىندا گرۋزياعا قارسى اگرەسسياسىنان كەيىنگى جانە رەسەيدىڭ ەۋروپا كەڭەسىندەگى مۇشەلىگىنىڭ توقتاتىلۋىنا بايلانىستى بۇۇ مەن ەۋروپا كەڭەسىنىڭ ىنتىماقتاستىعىنىڭ نىعايۋى تۋرالى» دەگەن تسيتاتا بار. وسى بويىنشا قۇجات اۆتورلارى يرلانديا مەن يسلانديا تالقىلاۋ كەزەڭىندە رەسەيلىك ارىپتەستەرىمەن ءبىر كەلىسىمگە كەلە الماي داۋلاسىپ قالادى. سوندىقتان رەسەي دەلەگاتسياسى وسى پاراگراف بويىنشا بولەك داۋىس بەرۋدى سۇرايدى. ناتيجەسىندە, 81 ەل جاقتاپ, 10 ەل قارسى داۋىس بەرەدى, 48 ەل قالىس قالدى. وسى قالىس قالعانداردىڭ ىشىندە قازاقستان بار», دەدى ءسىم رەسمي وكىلى ايبەك سمادياروۆ بريفينگتە.
وسىلايشا, قازاقستان ەكى ۇيىمنىڭ – بۇۇ مەن ەۋروپا كەڭەسىنىڭ ۇستانىمىن عانا قولدادى. ال رەسەي مەن ۋكرايناعا قاتىستى ءوز پوزيتسياسىندا قالا بەرەدى.
