قازىرگى كۇنى ايماقتىڭ دەنساۋلىق ساقتاۋ سالاسىنداعى بىلىكتى مەديتسينا قىزمەتكەرلەرىنىڭ سانى 2 مىڭنىڭ ۇستىندە. بىلتىر ەل بويىنشا مەديتسينالىق جوعارى وقۋ ورىندارىن تامامداعان ءۇش مىڭعا جۋىق تۇلەكتىڭ نەبارى 112-ءسى عانا ءبىزدىڭ وڭىرگە جىبەرىلگەن. ەمدەۋ مەكەمەلەرىنە قوسىمشا 150-گە جۋىق مامان قاجەت ەكەن. «ديپلوممەن – اۋىلعا!» باعدارلاماسى اياسىندا اۋىلداعى مەديتسينالىق مەكەمەلەرگە جۇمىسقا ورنالاسىپ جاتقان جاستارعا ماتەريالدىق كومەك جەتكىلىكتى دەڭگەيدە كورسەتىلىپ وتىر. بىلتىر اۋىلدارعا بارعان جاس ماماندارعا 318 مىڭ تەڭگە كولەمىندە كوتەرمە جاردەماقى جانە باسپانا ساتىپ الۋعا 4,7 ملن تەڭگەگە دەيىن ارزان نەسيە بەرىلدى. الايدا بۇل جەڭىلدىكتى پايدالانىپ وتىرعاندار ءتىپتى از. اۋىلدارعا بىلتىر وقۋ ورىندارىن بىتىرگەن نەبارى 17 جاس دارىگەر عانا بارىپتى.
دارىگەرلەردىڭ جەتىسپەۋشىلىگى جەلەزين, ۋسپەن, شارباقتى اۋداندارىندا ەرەكشە بايقالادى. ماسەلەن, جەلەزين اۋدانى ورتالىعىنداعى اۋرۋحانادا ەندوكرينولوگ جوق. بۇل ماسەلەنى ايتىپ حابارلاسقان جەرگىلىكتى تۇرعىن (اتى-ءجونىن اتاعىسى كەلمەدى) ءوزىنىڭ ەكىنشى توپتاعى مۇگەدەك ەكەنىن, دارىگەرگە بارۋ ءۇشىن سوناۋ 200 شاقىرىم جەردەگى پاۆلودار قالاسىنا جول جۇرۋگە ءماجبۇر بولاتىنىن جەتكىزدى. ونىڭ ۇستىنە ۇيىندەگى 74 جاستاعى شەشەسىن قاراۋسىز قالدىرىپ كەتەتىن كورىنەدى. اۋدان باسشىلىعى دا, وڭىرلىك دەنساۋلىق ساقتاۋ باسقارماسى دا بۇل تۇيتكىلدى شەشۋگە قاۋقارسىز.
وبلىستىق دەنساۋلىق ساقتاۋ باسقارماسىنىڭ باسشىسى ايدار سەيىتقازينوۆتىڭ سوزىنە سۇيەنسەك, جالپى جەلەزين اۋدانىندا 4 ارنايى دارىگەر جانە ءبىر جالپى تاجىريبە دارىگەرى جەتىسپەيدى. بۇل تىعىرىقتان شىعۋ ءۇشىن وڭىردەگى شتاتتان تىس دارىگەر مامانداردىڭ كوشپەلى قابىلداۋلارىن تۇراقتى ۇيىمداستىرىپ كەلە جاتقاندارىن, جۋىردا اق جەلەڭدىلەر بريگاداسى جەلەزيندە بولىپ, 68 تۇرعىندى قابىلداعانىن مالىمدەدى.
– بىزدە جىلجىمالى مەديتسينالىق پۋنكتتەر بار. ونىڭ ءبىرى وسى شالعاي اۋداننىڭ حالقىنا قىزمەت كورسەتەدى. بيىلعى جىلى ايماقتاعى ەمدەۋ ۇيىمدارىنا 58 ارنايى دارىگەر جاڭادان كەلەدى دەپ كۇتىلۋدە. وكىنىشكە قاراي, ولاردىڭ اراسىندا ەندوكرينولوگتار جوق. وبلىس بيۋدجەتىنەن مەديتسينا قىزمەتكەرلەرىن دايارلاۋعا 50 گرانت ءبولىنۋى كەرەك بولعان. باس دارىگەرلەر مەديتسينالىق جوعارى وقۋ ورىندارىن ارالاپ, جاس مامانداردى شاقىرۋ شارالارىن ۇنەمى ۇيىمداستىرادى, دەيدى ول.
ەرتىس-بايان اۋماعىندا ارنايى دارىگەرلەردىڭ جەتىسپەۋشىلىگى كوپ جىلدان بەرى جالعاسىپ كەلە جاتىر. اسىرەسە, پاندەميا ۋاقىتىندا ولاردىڭ تاپشى ەكەنى ايقىن ءبىلىندى. ەمدەۋ ۇيىمدارى الدەقاشان قۇرمەت دەمالىسىنا شىعىپ كەتكەن ارداگەرلەرىن جۇمىسقا شاقىرۋعا ءماجبۇر بولدى. بۇل جاعداي وڭىردەگى مەديتسينا كادرلارىنىڭ جەتىسپەۋشىلىگىن شەشۋگە بۇعان دەيىنگى باسشىلار باس قاتىرماعانىن بايقاتسا كەرەك. پاندەميادان بەرى ءۇش جىلعا جۋىق ۋاقىت وتسە دە, «باياعى جارتاس – سول جارتاس» بولىپ, تۇيتكىل ساقتالىپ قالىپ وتىر.
اتاپ وتەرلىگى, كەيبىر اكىمدىكتەر دارىگەرلەردى تارتۋ ءۇشىن اۋدان ورتالىعىندا تۇرعىن ۇيلەر سالۋعا بەت بۇرا باستاعان. مۇنداي جوبالار شارباقتى مەن ۋسپەن اۋداندارىندا باستالىپ تا كەتتى. ايماقتىڭ بۇل سالاداعى كادر تاپشىلىعىن شەشۋگە دەگەن كەشەندى جوسپارى ازىرلەنبەي, اۋىلداعى مەديتسينانىڭ دەڭگەيىن كوتەرۋ ويعا سىيمايتىنداي.
پاۆلودار وبلىسى
