كوروناۆيرۋس پاندەمياسى كۇشەيتكەن سانالى تۇتىنۋ ترەندى قارقىن الىپ كەلە جاتىر دەپ نىق سەنىممەن ايتۋعا بولادى. ەلىمىزدەگى بەلسەندى ماركەتپلەيس سانالاتىن OLX سەرۆيسىنىڭ دەرەكتەرى بويىنشا ازاماتتار «سىيعا بەرەمىن» ساناتىنداعى حابارلاندىرۋلاردىڭ سانى ارتىپ كەلەدى. بۇل ءۇردىس ءۇشىنشى جىل قاتارىنان ساقتالىپ وتىر.
وتكەن جىلدىڭ سايكەس كەزەڭىمەن سالىستىرعاندا, وسى ساناتتاعى حابارلاندىرۋلار سانى 3%-عا ءوستى, ال الدىڭعى ەسەپتى جىلدارى ءوسىم سايكەسىنشە 5% جانە 10%-دى قۇرادى.
«ەلىمىزدەگى مۇنداي ءۇردىس ءماجبۇرلى وقشاۋلاۋ كەزەڭىندە ەرەكشە تانىمالدىلىققا يە بولدى. ءسىرا, پاندەميا سانالى ساتىپ الۋدىڭ وسۋىنە جانە زاتتارعا ۇقىپتى قاراۋعا تۇرتكى بولعان سياقتى. بيىل تۇرعىندار ەرەسەكتەر مەن بالالارعا ارنالعان زاتتاردى, سونداي-اق ءۇي مەن باقشاعا ارنالعان تۇرمىستىق ىدىستاردى سىيعا تارتۋعا دايىن. بۇل ەكونوميكالىق تۇراقسىزدىققا جانە مۇقتاج جاندارعا بارىنشا كومەك كورسەتۋگە دەگەن ۇمتىلىسقا بايلانىستى بولۋى مۇمكىن», دەپ مالىمدەيدى سەرۆيس ساراپشىلارى.
وتانداستارىمىز كەڭسە تاۋارلارى مەن ەلەكتر قۇرالدارىنان باستاپ جيھاز گارنيتۋرالارى مەن تۇرمىستىق تەحنيكاعا دەيىن تەگىن بەرۋگە دايىن ەكەن.
ساراپشىلار قاي قالانىڭ تۇرعىندارى كوبىنە زاتتاردى وتەۋسىز پايدالانۋعا بەرەتىنىن انىقتاپ ءبىلدى. شەرينگ كونتەكسىندەگى ەڭ سانالى قالا – پاۆلودار. بۇل شاھارداعى حابارلاندىرۋلاردىڭ جالپى سانىنىڭ 3%-ىن سىيلىق رەتىندەگى حابارلاندىرۋلار قۇرايدى.
ەلىمىزدىڭ وڭتۇستىك ءوڭىرى ءۇشىن بەيتانىس ادامدارعا شەرينگ اسا ءتان ەمەس: قىزىلوردا, شىمكەنت جانە تۇركىستان قالالارىندا «سىيعا بەرەمىن» ساناتىنداعى حابارلاندىرۋلار وسى قالالارداعى بارلىق حابارلاندىرۋدىڭ 1%-ىنان اسپايدى. مۇمكىن, وڭتۇستىك ايماقتا حابارلاندىرۋ قىزمەتىنە جۇگىنبەستەن جاقىن جانە تانىس ادامدارمەن ءبولىسۋ جانە ولارعا كومەكتەسۋ ادەتكە اينالعان بولار.
