كاسىپورىنداردىڭ قامقورلىعى

اقتوبەلىك ءىرى كاسىپورىندار كوللەدجدەرگە شەفتىك كومەك كورسەتۋ ءۇردىسىن قالىپتاستىرۋدا. العاشقىلاردىڭ قاتارىندا «اقتوبە حروم قوسىندىلارى زاۋىتى» اق پەن «سەرۆيس ي ك» جشس اقتوبە تەحنيكالىق كوللەدجىمەن كەلىسىمشارتقا قول قويدى. كەلىسىمشارت اياسىندا كوللەدج وقۋشىلارى كاسىپورىندارعا بارىپ, وزدەرىنە بەكىتىلگەن تالىمگەرلەردىڭ باسشىلىعىمەن وندىرىستىك تاجىريبەدەن وتەدى. بۇدان باسقا ارناۋلى پاندىك وقىتۋشىلاردى كاسىپورىندا كاسىبي بىلىكتىلىگىن ارتتىرۋ تاجىريبەسىنەن وتكىزۋ دە قارالعان. – وقىتۋشىلاردىڭ وندىرىستە كاسىبي بىلىكتىلىگىن ارتتىرۋ بويىنشا تاجىريبەدەن ءوتۋى وتە ماڭىزدى. ولار وندىرىستەگى بارلىق تەحنولوگيانى تالداپ, زەرتتەيدى, سونان سوڭ وقۋشىلارعا كاسىبي ءبىلىم بەرەدى. قازىر كوللەدج تۇلەكتەرىن جۇمىسقا قابىلداۋعا ءازىر كاسىپورىندارعا ماماندار دايارلاۋعا ايرىقشا ماڭىز بەرىلەدى. كەيىن كوللەدج تۇلەكتەرىنىڭ ءبىلىمىن اتتەس­تاتتايتىن كوميسسيا مۇشەلەرىنىڭ 75 پايىزى جۇمىس بەرۋشىلەر بولادى. ياعني, ولار اتتەستاتتاۋ كەزىندە-اق وزدەرىنە قاجەتتى كادرلاردى تاڭداپ الا الادى. ءبىز بۇل باعىتتاعى جۇمىستى الدا دا جانداندىرا تۇسەمىز. ايماقتاعى ءىرى كاسىپورىنداردى وقۋ ورىندارىنا بەكىتۋدىڭ مەحانيزمدەرىن قاراستىرامىز, –دەيدى اقتوبە وبلىستىق كاسىپكەرلەر پالاتاسىنىڭ ساراپتاماشىسى ۆەنەرا شاۆكيلوۆا. ونىڭ ايتۋىنشا, «اقتوبە حروم قوسىندىلارى زاۋىتى» اق ەلەكتريكتەردى تاجىريبەدەن وتكىزىپ, كەيىن جۇمىسقا قابىلداۋعا ىنتالى بولسا, «سەرۆيس ي ك» جشس اۆتوموبيل كولىكتەرىنىڭ تەحنيك-مەحانيكتەرىنە جانە مەحانيك-دياگنوستيكتەرىنە ءزارۋ كورىنەدى. سونداي-اق, بۇل كاسىپورىندار كەلىسىمشارت اياسىندا كوللەدجدىڭ ماتەريالدىق بازاسىن ارناۋلى قوندىرعىلارمەن جاراقتاندىرۋعا قولدان كەلگەنىنشە كومەكتەسەتىن بولادى. ساتىبالدى ءساۋىرباي, «ەگەمەن قازاقستان».  اقتوبە وبلىسى.