ەندى اۆتوكولىك يەلەرى بۇدان بىلاي قۇجاتتارىن وزىمەن بىرگە الىپ جۇرۋگە مىندەتتى ەمەس. سەبەبى قۇجاتتاردىڭ تسيفرلىق انالوگتارى پايدا بولدى. بۇل كولىك جۇرگىزۋشىلەرى ءۇشىن وتە ءتيىمدى. قۇجاتتىڭ مەرزىمى وتۋىنە شاق قالعاندا جۇرگىزۋشىگە ارنايى سمس كەلەدى. ازاماتتار قۇجاتىن ۋاقىتىلى اۋىستىرا الادى.
ايتا كەتۋ كەرەك, بۇرىن جىل سايىن حقكو-عا قولدانىلۋ مەرزىمى ءوتىپ كەتكەن جۇرگىزۋشى كۋالىكتەرىن اۋىستىرۋ ءۇشىن 400 مىڭعا جۋىق ازامات جۇگىنەتىن.
«ەندى جۇرگىزۋشى كۋالىگىن ونلاين رەجيمدە ەكىنشى دەڭگەيلى بانكتەردىڭ ءموبيلدى قوسىمشالارى ارقىلى اۋىستىرۋعا بولادى. جۇرگىزۋشى كۋالىگىن جاڭارتۋ ءۇشىن وسىنداي قوسىمشالاردىڭ بىرىنە كىرىپ, بيومەتريالىق تەكسەرۋدەن ءوتىپ, ءوز سمارتفونىڭىزعا سۋرەتكە ءتۇسۋ جەتكىلىكتى. ءوتىنىم ءىىم دەرەكقورىندا وڭدەلگەننەن كەيىن جاڭا جۇرگىزۋشى كۋالىگى 10-15 مينۋت ىشىندە اۆتوماتتى تۇردە شىعارىلادى. ازامات حقكو-دان جاڭا قۇجاتتى وزىنە ىڭعايلى كەز كەلگەن ۋاقىتتا الا الادى, ال اۆتوكولىكتى سمارتفونداعى تسيفرلىق جۇرگىزۋشى كۋالىگى نۇسقاسى بويىنشا بىردەن باسقارا بەرۋىنە بولادى», دەلىنگەن ىشكى ىستەر مينيسترلىگىنىڭ حابارلاماسىندا.
