وليمپياداعا 20-دان استام ەلدەن كەلگەن وقۋشىلار قاتىسادى. ونىڭ ىشىندە رەسەي, اۆستريا, ساۋد ارابياسى, ارمەنيا, يزرايل, وزبەكستان جانە باسقا دا مەملەكەتتەردەن قاتىسۋشىلار بار. كوماندا قۇرامالارى بۇعان دەيىنگى ۇلتتىق حيميا وليمپيادالارىنىڭ ناتيجەسىندە انىقتالىپ, ىرىكتەلگەن. قازاقستان اتىنان 15 وقۋشى قاتىسادى.
وليمپيادا ءۇش كەزەڭنەن تۇرادى. ونىڭ ەكەۋى تەوريالىق جانە بىرەۋى تاجىريبە جۇزىندە وتەدى. ءبىرىنشى كەزەڭ تاپسىرمالارى كۇردەلىلىگى بويىنشا ارنايى حيميا سىنىپتارىنىڭ باعدارلاماسىنا سايكەس كەلەدى. ەكىنشى كەزەڭدە قاتىسۋشىلارعا حيميانىڭ بەس ءبولىمى بويىنشا جوعارىراق دەڭگەيدەگى تاپسىرمالار بەرىلەدى. بەس ساعاتتىق تاجىريبەلىك كەزەڭدە وقۋشىلار حيميالىق زەرتحانالاردا زاتتاردىڭ حيميالىق ساراپتاماسىن جۇرگىزىپ, ۇسىنىلعان ادىستەمە بويىنشا سينتەز جاسايدى.
وليمپيادا قورىتىندىسى بويىنشا قاتىسۋشىلارعا سەرتيفيكاتتار مەن ەستەلىك سىيلىقتار بەرىلەدى. جەڭىمپازدار مەن جۇلدەگەرلەرگە دارەجەلەرى بويىنشا ديپلومدار مەن مەدالدار تابىستالادى. ءابسوليۋتتى جەڭىمپازعا جارىستى ۇيىمداستىرۋشىلار تاعايىنداعان اكادەميك ۆالەري لۋنين اتىنداعى سىياقى بەرىلەدى.
وليمپيادانى قازاقستان رەسپۋبليكاسىنىڭ وقۋ-اعارتۋ مينيسترلىگى, رەسەيدىڭ م.ۆ. لومونوسوۆ اتىنداعى ممۋ-ءنىڭ حيميا فاكۋلتەتى جانە اندرەي مەلنيچەنكو اتىنداعى قور ۇيىمداستىرىپ جاتىر.
