تالدىقورعان قالالىق سوتىنىڭ ۇكىمىمەن س.م.كۇدەباەۆ «قاڭتار وقيعاسى» كەزىندە بيلىكتى اسىرا پايدالانعانى ءۇشىن كىنالى دەپ تانىلىپ, 10 جىلعا باس بوستاندىعىنان ايىرىلدى. ول ورتاشا قاۋىپسىزدىك مەكەمەسىندە جازاسىن وتەي وتىرىپ, پوليتسيا گەنەرال مايورى ارنايى اتاعىنان ايىرىلدى.
س.م.كۇدەباەۆ قازاقستان رەسپۋبليكاسى كونستيتۋتسياسىنىڭ, مەملەكەت باسشىسىنىڭ «توتەنشە جاعداي ەنگىزۋ تۋرالى» جارلىعىنىڭ, «قۇقىق قورعاۋ قىزمەتى تۋرالى» جانە «ىشكى ىستەر ورگاندارى تۋرالى» زاڭدارىنىڭ نورمالارىن بۇزىپ, سونداي-اق ۆەدومستۆوىشىلىك بۇيرىقتار مەن ارنايى جوسپارلاردىڭ تالاپتارىن ورىنداماعان.
توتەنشە جاعداي كەزىندە قوعامدىق قاۋىپسىزدىكتى قامتاماسىز ەتۋدىڭ ورنىنا, س.م.كۇدەباەۆ جەكە قۇرامعا عيماراتتان كەتۋگە بۇيرىق بەرگەن. جەرگىلىكتى جەردىڭ كومەندانتى رەتىندە جەدەل شتابتىڭ ءتيىستى جۇمىسىن جانە ايماقتاعى جاعدايدى تۇراقتاندىرۋ بويىنشا ۋاقتىلى شارالار قابىلداۋدى قامتاماسىز ەتپەگەن.
بۇدان سوڭ توناۋشىلار ساۋدا ۇيلەرى مەن بيزنەس نىساندارىن تونادى. بانكوماتتار مەن سۋپەرماركەتتەردىڭ دۇڭگىرشەكتەرىن قيراتىپ, وبلىس اكىمدىگى, «Amanat» پارتياسى عيماراتتارىنا شابۋىل جاساپ, ورتەدى.
قىلمىسكەرلەر قۇقىقتىق ءتارتىپ كۇشتەرى بولماعان كەزدە وبلىستىق پوليتسيا دەپارتامەنتى مەن تالدىقورعان قالاسى پوليتسيا باسقارماسىنىڭ عيماراتتارىن باسىپ الۋ كەزىندە 500-گە جۋىق قارۋ مەن 28 مىڭنان استام وق-ءدارى ۇرلانعان, ولاردىڭ ءبىرازى ءالى تابىلعان جوق.
مەملەكەتكە, ازاماتتارعا جانە كاسىپكەرلەرگە كەلتىرىلگەن زالالدىڭ جالپى سوماسى شامامەن 5 ملرد تەڭگەنى قۇرادى.
2022 جىلعى 7-16 قاڭتار ارالىعىندا پوليتسيا دەپارتامەنتىنىڭ عيماراتىندا 23 ازاماتقا قاتىستى جاپپاي ازاپتاۋ قولدانىلدى.
سونىمەن قاتار س.م.كۇدەباەۆتىڭ كوز الدىندا ونىڭ قاراماعىنداعىلار دەپارتامەنت اۋماعىندا جەتكىزىلگەن ادامداردى ۇرىپ-سوققانى بەينەكامەرالارعا جازىلعان.
تىيىم سالىنعان تەرگەۋ ادىستەرىنىڭ ناتيجەسىندە اتالعان ازاماتتاردىڭ دەنساۋلىعىنا ءارتۇرلى دارەجەدەگى زيان كەلتىرىلگەن.
س.م.كۇدەباەۆتىڭ كىناسى قىلمىستىق ءىس بويىنشا جينالعان دالەلدەمەلەر جيىنتىعىمەن تولىق دالەلدەندى.
