ەڭ باستى يدەيانىڭ ءبىرى – قازاق ۇلتىنىڭ جاڭا ساپاسى. بايقاساڭىز, ءالى كۇنگە دەيىن قازاق ماسەلەسى كوتەرىلگەن كەزدە «قازاق دەگەن قۇرىپ بارا جاتقان ۇلت», «قازاق دەگەن جويىلايىن دەپ جاتقان ۇلت» دەگەن سەكىلدى وتكەن عاسىردىڭ 60-70-جىلدارى, راسىمەن ۇلتقا قاۋىپ ءتونىپ تۇرعان كەزدەگى «ۇراندار» باسىم. ءبىز ەندى بۇكىل دەرەككە سايكەس, 70 پايىزدان استىق. مىسالى, وسىدان 30 جىل بۇرىن قازاقتىڭ تەڭ جارتىسى انا ءتىلىن بىلمەسە, قازىرگى جاعداي مۇلدەم باسقاشا. قازىر وزگە ەتنوس وكىلدەرى دە قازاق ءتىلىن بەلسەندى مەڭگەرىپ جاتىر. اسسامبلەيا سوعان مۇرىندىق بولۋى كەرەك. بۇل – وسىعان دەيىنگى سەكتسيالىق وتىرىستا كوتەرىلگەن ماسەلە.
قازاقستاندا ەكى ەتنوس وكىلى بولسا دا, اسسامبلەيا ءوزىنىڭ جۇمىسىن توقتاتپايدى. قۇرىلىمنىڭ ەڭ باستى ماقساتى – مەملەكەتتى نىعايتۋ, ۇلتتى توپتاستىرۋ, ءبىرتۇتاس قىلۋ, بىرىزدىلىك پەن بىرەگەيلىككە الىپ كەلۋ جانە قاراپايىم تىلمەن ايتقاندا, وزگە ەتنوس وكىلدەرىنە قازاق ءتىلىن ۇيرەتۋ, قازاق مادەنيەتىن ءتۇسىندىرۋ, ءتۇيسىندىرۋ.
الدا-جالدا ەگەر ەكى وزگە ەتنوس اراسىندا نەمەسە ەكى توپتىڭ اراسىندا كيكىلجىڭ تۋىنداي قالسا, قحا سوعان ەڭ ءبىرىنشى بولىپ ارالاساتىن, ازاماتتاردى بىرلىككە, تاتۋلىققا شاقىراتىن ۇيىم بولىپ قالۋى كەرەك. ورتاق جۇمىستى ىستەيتىن, ارينە, مەملەكەتتىك ورگاندار, ساياسي پارتيالار, پارلامەنت مۇشەلەرى جانە تاعى باسقالار. الايدا اسسامبلەيانىڭ ىشكى مىندەتى, جۇمىسى – وزگە ەتنوستاردى ءبىرتۇتاس يدەيا اينالاسىنا توپتاستىرۋ, بىرىكتىرۋ.
ايدوس سارىم,
ءماجىلىس دەپۋتاتى
