القالى جيىندا مەملەكەت باسشىسى ەل تاۋەلسىزدىگى مەن اۋماقتىق تۇتاستىق بارىنەن قىمبات ەكەنىن تاعى دا ەسكە سالىپ ءوتتى. «ەل بىرلىگى وسى مىزعىماس قۇندىلىقتارمەن قاتار تۇرۋعا ءتيىس. سوندا عانا بولاشاعىمىز باياندى بولادى. تاتۋلىق پەن كەلىسىم تەك مەملەكەتتىك ساياساتتا ەمەس, قوعامدا, ۇيدە, ۇجىمدا, جالپى, بارلىق جەردە دارىپتەلۋى قاجەت», دەگەن پرەزيدەنت سوزدەرى جالاڭ ۇران ەمەس, ءار ازاماتتىڭ كۇندەلىكتى ۇستانىمى بولۋى كەرەك.
قازاقستان حالقىنا ورتاق ۇلتتىق قۇندىلىقتى قالىپتاستىرۋ ءۇشىن ورتاق ءتىل قاجەت. سوندىقتان اسسامبلەيا مۇشەلەرى مەملەكەتتىك ءتىلدىڭ قولدانىس اياسىن كەڭەيتۋگە اتسالىسىپ جاتىر. ويتكەنى ءتىلى ءبىردىڭ – ءدىلى ءبىر. وسى باعىتتا اسسامبلەيا جاستارىنىڭ ويعا العان جوبالارى بار.
ماسەلەن, ءبىز دەبات تۇرىندە جارىس وتكىزۋدى ويلاستىرىپ قويدىق. جارىس تولىعىمەن قازاق تىلىندە وتكىزىلەدى. قازىر «اسسامبلەيا جاستارى» رقب ۇيىمداستىرۋىمەن تۇڭعىش قازاق ءتىلىنىڭ اۋلالىق «ۇيدە سويلە» جوباسى ەندى. ونىڭ ماقساتى – قازاق ءتىلىن وقىتۋ مەن قولدانۋعا, سونداي-اق, ەتنوسارالىق قارىم-قاتىناس ءتىلى رەتىندە دامىتۋعا كەڭ مۇمكىندىكتەر جاساۋ. وسى ورايدا جاستار ۇيدەن الىستاماي قازاق ءتىلىن قىزىقتى فورماتتا قولدانادى. ەندى بۇل باستامانىڭ اياسىن كەڭەيتۋ قاجەت. سەبەبى ەلىمىزدىڭ تۇكپىر-تۇكپىرىنەن, اتاپ ايتساق, شىعىس قازاقستاننان, قاراعاندى وبلىسىنان, سولتۇستىك قازاقستاننان تولاسسىز وتىنىشتەر ءتۇسىپ جاتىر. وڭىرلەردەن وسىنداي كلۋبتار جەلىسىن اشۋدى جۇيەلى تۇردە قولعا الۋىمىز كەرەك. بۇل مەملەكەتتىك ءتىلدى كەڭ جانە شىنايى قولدانۋعا ىقپال ەتەدى.
ولگا سپيرينا,
قازاقستان حالقى اسسامبلەياسىنىڭ مۇشەسى
