اپاتتىڭ ابدەن تامىر جايعان شاعىندا ەكىباستۇز جىلۋ-ەنەرگو ورتالىعى ارتىق پايدالانعان ەلەكتر جارىعى ءۇشىن تۇرعىندارعا وتەماقى رەتىندە 241,8 ملن تەڭگە بولگەنى ەسىمىزدە. ول قاراجاتتان ءار پاتەر باسىنا شامامەن 5 مىڭ تەڭگەدەن ءتيدى. كەيىن وبلىس باسشىسى اسايىن بايحانوۆ جۋرناليستەرمەن وتكىزگەن بريفينگتە تۇرعىنداردىڭ ودان سوڭعى ەلەكتر شىعىندارىن دا وتەپ بەرۋگە تىرىسامىز دەپ ۋادە بەرگەنى ەسىمىزدە. الايدا اكىمنىڭ ۋادەسى ءىس جۇزىندە قۇرعاق ءسوز بولىپ قالعانىنا كۋا بولىپ وتىرمىز.
ەكىباستۇز قالالىق اكىمدىگىنىڭ ءباسپاسوز قىزمەتىنەن حابارلانعانداي, وسى جىلدىڭ قاڭتار, اقپان جانە ناۋرىز ايلارىندا جەكە ابونەنتتەر ءۇشىن جىلۋ ەنەرگياسى بويىنشا قايتا ەسەپتەۋلەر جۇرگىزىلىپ, تولەمدەرىنە 70 پايىز جەڭىلدىك جاسالىپتى. ول قىس بويى پاتەرلەرىندە دىردەكتەپ شىققان ەكىباستۇزدىقتارعا ءبىراز سەپ بولعانى انىق. الايدا ءباسپاسوز قىزمەتىنىڭ جاۋابىندا: «بۇگىنگى كۇنى ەلەكتر ەنەرگياسىن قايتا ەسەپتەۋلەر قاراستىرىلماعان», دەپ انىق جازىلىپتى. ياعني ءوڭىر باسشىلىعى سوزىنەن تايقىپ وتىر. بىلتىرعى جىل سوڭىندا «واەك» كومپانياسىنىڭ باسشىلىعى تۇرعىنداردىڭ بارلىق شىعىنىن جابامىز دەپ ۋادە بەرگەنىمەن, جەمە-جەمگە كەلگەندە ولار دا تەرىس اينالدى.
بۇعان قوسا قالا تۇرعىندارى قازاندىق اگرەگاتتارىنىڭ تەك اعىمداعى جانە كۇردەلى جوندەۋدەن وتەتىنىنە دە كوڭىلدەرى تولماي وتىر. قالا تۇرعىنى داريا ەرعازينا وتكەن جىلۋ ماۋسىمى الدىندا دا جەو-دا وسىنداي جوسپارلى جوندەۋلەر جۇرگىزىلگەنىن, الايدا ول جۇمىستاردىڭ جەتكىلىكسىز بولعانىن توتەنشە جاعداي ايعاقتاپ بەرگەنىن ايتادى. سوندىقتان قىس بويى ەكى يىنىنەن ارەڭ دەم الىپ, قايتا-قايتا ىستەن شىعا بەرگەن قازاندىقتاردىڭ كەيبىرىن ىسىرىپ تاستاپ, ورنىنا جاڭاسىن سالسا دەگەن تىلەكتەرىن جەتكىزدى.
جۇرتشىلىقتىڭ شاعىمىن نەگىزگە الا وتىرىپ, ەكىباستۇز قالالىق اكىمدىگىنە ساۋالدارىمىزدى جولداعان ەدىك. العان جاۋابىمىزدا ستانسا باسىندا جاڭادان قۇرىلىس سالۋ, جابدىق ورناتۋ تۋرالى بىردە-ءبىر ءسوز جوق.
«ەكىباستۇزداعى جىلۋ-ەلەكتر ورتالىعىن مەملەكەت پەن «واەك» اق بىرلەسىپ جوندەيدى. قازىرگى كۇنى ەنەرگەتيكالىق نىساننىڭ 50 پايىزى قالاداعى تۇرعىن ءۇي-كوممۋنالدىق شارۋاشىلىق, جولاۋشىلار كولىگى جانە اۆتوكولىك جولدارى بولىمىنە ءباسىبۇتىن بەرىلگەن. وعان 326,9 شاقىرىم جىلۋ جەلىلەرى مەن ستانساداعى سۋ جىلىتقىش 5 قازاندىق اگرەگاتى ەنىپ وتىر.
قازىرگى ۋاقىتتا كومىرلى شاھارداعى گيرداۆليكالىق سىناقتار ناتيجەسىندە تابىلعان اقاۋلاردى جويۋعا 1,7 ملرد تەڭگە, سونداي-اق بەكىتۋ ارماتۋراسىن اۋىستىرۋعا 370 ملن تەڭگە كولەمىندە قاراجات بولىنگەن. اتالعان جوسپارلى شارۋالاردى اتقارۋعا 40 دانەكەرلەۋ بۋىنىنان تۇراتىن مەردىگەرلىك ۇيىم جۇمىلدىرىلادى دەپ كوزدەلگەن. بۇعان قوسا ەكىباستۇز جىلۋ ەنەرگياسىن جوندەۋ قىزمەتكەرلەرى تارتىلادى», دەلىنگەن جاۋاپتا.
«سەۆكازەنەرگوپروم» جشس جىلۋ جەلىلەرىنە ەنەرگيالىق ءاۋديتتىڭ 1-كەزەڭىن جۇزەگە اسىرىپ, جىلۋ ماگيسترالدارىنىڭ ەڭ توزعان ۋچاسكەلەرىن انىقتاپتى. ولار – №2, 5, 8 جانە 12 ماگيسترالدارى. بۇل رەتتە ەسكيزدىك جوبالار مەن سمەتالىق قۇجاتتامانى ازىرلەۋ اكتسيونەرلەردىڭ قاراجاتى ەسەبىنەن جۇرگىزىلەدى. وتكەن ناۋرىز ايىندا جوعارىدا اتالعان جوبالىق-سمەتالىق قۇجاتتامالار (جسق) بويىنشا مەملەكەتتىك ساراپتامانىڭ وڭ قورىتىندىسى شىعارىلىپ, جالپى ۇزىندىعى 5 357,7 مەتر بولاتىن جۇپتاسقان جىلۋ قۇبىرلارىن اۋىستىرۋ كوزدەلىپ وتىر. وعان جالپى سوماسى 9,4 ملرد تەڭگە قاجەت ەكەن. گيدراۆليكالىق سىناۋلار جۇرگىزىلگەن سوڭ اتالعان جوبالار بويىنشا جۇمىستار شۇعىل باستالادى دەپ كۇتىلۋدە.
ايتىپ وتەيىك, «واەك» اق كومپانياسى ءوز قاراجاتىنا ءۇش ەنەرگەتيكالىق قازاندىقتى كۇردەلى, تاعى ەكەۋىن اعىمداعى جوندەۋدەن وتكىزۋدى جوسپارلاعان. بۇعان قوسا ستانساداعى جالپى قولدانىستاعى جابدىقتاردى: وتىن بەرۋ جۇيەسىن, عيماراتتار مەن قۇرىلىستاردى, حيميالىق تسەحتى جاماپ-جاسقاۋدى ءوز مىندەتىنە الىپ وتىر.
وسىلايشا, كۇن جىلىنىپ, جەو ءوز جۇمىسىن توقتاتقاندا شاھاردا كەڭ اۋقىمدى جوندەۋ جۇمىستارى باستالادى دەپ كۇتىلۋدە. قۇبىرلاردى جاڭارتۋعا – 230, ال ستانساداعى قازاندىق اگرەگاتتارىن جاماپ-جاسقاۋعا 440 مامان تارتىلادى دەپ جوبالانعان. جوندەۋ جۇمىستارى ۋاقىتىندا قالاداعى كوپقاباتتى ۇيلەر مەن الەۋمەتتىك مەكەمەلەر كەزەڭ-كەزەڭىمەن ىستىق سۋدان اجىراتىلاتىنى دا ەسكەرتىلدى. ءبىرىنشى كەزەكتە №1, 5, 8, 12 جىلۋ ماگيسترالدارىنا جالعانعان 48 كوپقاباتتى ءۇي مەن 17 الەۋمەتتىك نىسان 12 ماۋسىمعا دەيىن ىستىق سۋسىز قالادى. بارلىق جوندەۋ جۇمىستارىن 30 قىركۇيەكتە اياقتاۋ كوزدەلگەن.
ايتپاقشى, ەكىباستۇز قالاسىنىڭ اكىمى ايان بەيسەكين جۋىقتا «ەكىباستۇزجىلۋەنەرگو» جشس-ءىن سوتقا بەردى. قالا باسشىسى قىستاعى اپات كەزىندە جانار-جاعارمايعا, جۇمىسشىلاردىڭ جاتىن ورنى مەن اس-سۋىنا جەرگىلىكتى بيۋدجەتتەن جۇمسالعان 22 ملن تەڭگەنى سەرىكتەستىك وتەۋى كەرەك دەگەن تالاپ قويعان. جىلۋ مەكەمەسى ىڭعايعا كونگىسى كەلمەي, اكىمدىك سوتقا جۇگىنۋگە ءماجبۇر بولىپتى. الايدا بۇل قاراجاتتان قالا تۇرعىندارىنا ەش پايدا جوعى بەلگىلى. ءساۋىر ايىنىڭ ورتاسىنان وڭىردە كۇن كۇرت سۋىتىپ, ەكىباستۇزدىقتار ءالى كۇنگە پاتەرلەرىندە جاۋراپ وتىرعانىن ايتۋ كەرەك. الداعى قىس ەكىباستۇز حالقى ءۇشىن جايلى وتە مە, جوق پا, ونى جوندەۋ شارالارىنىڭ ساپاسى كورسەتە جاتار.
پاۆلودار وبلىسى,
ەكىباستۇز قالاسى
