– مەملەكەت باسشىسىنىڭ تاپسىرماسىمەن ەكىنشى جىل قاتارىنان اتىراۋ, ماڭعىستاۋ ءوڭىرى جاستارىنا قوسىمشا نىسانالى ءبىلىم بەرۋ گرانتتارىن ءبولۋ – مەكتەپ ءبىتىرۋشى تۇلەكتەر مەن ولاردىڭ اتا-انالارى ءۇشىن ۇلكەن قولداۋ. باتىس وڭىرلەردىڭ جاستارىن جەتەكشى جوعارى وقۋ ورىندارىندا وقىتۋ ماسەلەسى ۇلكەن جاۋاپكەرشىلىكتى تالاپ ەتەتىن ءىس. اتالعان جوباعا ەلىمىزدىڭ جوعارى دەڭگەيلى ۋنيۆەرسيتەتتەرىنىڭ ەنۋى ءوڭىر جاستارىنىڭ دامۋى ءۇشىن ۇلكەن مۇمكىندىك, جاڭا بەلەستەردى باعىندىرۋدىڭ جارقىن جولى. قوسىمشا ءبىلىم بەرۋ گرانتىن ءبولىپ وتىرعان ۇلتتىق ۋنيۆەرسيتەتتەردىڭ, ورتالىق, سولتۇستىك وڭىرلەردەگى وقۋ ورىندارىنىڭ, رەيتينگى جوعارى جەكەمەنشىك ۋنيۆەرسيتەتتەر باسشىلارىنا راقمەت ايتامىن. ماڭعىستاۋ وڭىرىنە قاجەتتى پەداگوگيكا عىلىمدارى, اقپاراتتىق-كوممۋنيكاتسيالىق تەحنولوگيالار, قۇرىلىس ماماندىقتارىنا بولىنگەن ءبىلىم بەرۋ گرانتتارىن تولىق يگەرۋ – جوعارى وقۋ ورىندارىنىڭ, ءبىلىم باسقارماسىنىڭ, ءبىلىم بولىمدەرىنىڭ, مەكتەپتەردىڭ ورتاق جاۋاپتى مىندەتى, – دەدى ماڭعىستاۋ وبلىسىنىڭ اكىمى نۇرلان نوعاەۆ.
گرانت ماسەلەسى ماڭعىستاۋ ءۇشىن ماڭىزدى. وتكەن جىلى وڭىرگە 6 مىڭعا تارتا گرانت بولىنگەنىمەن, تولىق يگەرىلمەگەن. بۇل بولىنگەن گرانتتاردىڭ تۇلەكتەر تالعامىنان شىقپاۋى ما, الدە وقۋ ورنىن تاڭداۋداعى كەدەرگى مە؟ Yessenov University-دەگى شارا وقۋ ورنىنىڭ الەۋەتىن تانىتۋ ماقساتىنداعى قادام بولدى دەۋگە نەگىز بار. ۋنيۆەرسيتەت باسشىسى بەرىك احمەتوۆ بولاشاق ينجەنەرلەردى, تەحنولوگتەردى, IT ماماندارىن دايارلاۋعا, جاستارعا عىلىمي-تەحنيكانىڭ ءارتۇرلى سالالارىنان ءبىلىم بەرەتىن, ولاردىڭ تەحنيكالىق ويلاۋىن دامىتاتىن جاعداي جاساۋعا باعىتتالعان «Yessonov Technopark» كەشەنىنىڭ جوباسىمەن تانىستىردى.
– كوبىمىز اقش پەن ەۋروپا ەلدەرىندەگى تاريحى عاسىرلارعا ۇلاسقان ۋنيۆەرسيتەتتەردە ءبىلىم الىپ, تاجىريبە جيناپ ءجۇرمىز. ال قازاق ەلىنىڭ ورتالىقتان ەڭ شالعاي ورنالاسقان وبلىسى – ماڭعىستاۋ تۇبەگىندەگى جالعىز جوعارى وقۋ ورنى ەسەنوۆ ۋنيۆەرسيتەتىنىڭ تاريحى قىرىق جەتى جىلعا ەندى عانا تولدى. بىراق تالابى تاۋداي. سوندىقتان ءار باستامامىزعا وزدەرىڭىزدەي ەل ازاماتتارىنىڭ قولداۋىن سەزىنسەك, قاناتتانا تۇسەمىز. بولاشاق ينجەنەرلەردى, تەحنولوگتەردى, IT ماماندارىن ءوسىرىپ جەتىلدىرۋ ءۇشىن جاستارعا عىلىمي-تەحنيكانىڭ ءارتۇرلى سالالارىنان ءبىلىم بەرەتىن, ولاردىڭ تەحنيكالىق ويلاۋىن دامىتاتىن جاعداي جاساۋىمىز قاجەت. ول ءۇشىن ءبىلىم بەرۋ ورتالارىندا «FabLab» وندىرىستىك زەرتحانالارىن ۇيىمداستىرۋ ماسەلەسى اسا ماڭىزدى. مىنە, «Yessonov Technopark» كەشەنىنىڭ قۇرىلىسىن باستاعالى تۇرمىز. بۇل جەردە ستۋدەنتتەر ءۇشىن عانا ەمەس, ونەرتاپقىش قالا تۇرعىندارىنا دا زەرتحانالاردىڭ ەسىگى اشىق ءارى قولجەتىمدى بولادى, – دەدى ب.احمەتوۆ.
جاڭا قۇرىلىس نىسانىنىڭ باستاماسى رەتىندە ماڭعىستاۋ وبلىسىنىڭ اكىمى ن.نوعاەۆ پەن مينيستر س.نۇربەك شار تاستىڭ ىشىنە 2076 جىلى ۋنيۆەرسيتەتتىڭ 100 جىلدىعىنا وراي اشىلاتىن ۋاقىت كاپسۋلاسىن ورنالاستىردى. 0,6 گەكتار جەر بولىنگەن قوس قاباتتى تەحنوپاركتىڭ ءىشى زاماناۋي تەحنيكانىڭ 80-نەن استام تۇرىمەن, ءتۇرلى قۇرال-جابدىقتارمەن, سوڭعى باعدارلامالار قوندىرىلعان الەۋەتتى كومپيۋتەرلەرمەن جاساقتالادى. سونداي-اق ەلەكتر, مەتالل, اعاش, جيھاز, توقىما ونەركاسىبى, باسپاحانا, كەسكىندەمە تسەحى, كونفەرەنتس زال, روبوت تەحنيكا, كوركەمونەر, گالەرەيا, كەڭسە, 3D ەلەكترونيكا, ستۋديا, IT-ايماق تولىق قاجەتتى قۇرالدارمەن قامتىلادى.
– تەحنوپاركتى سالۋداعى باستى ماقسات – ينجەنەرلىك ويلاۋدى قالىپتاستىرۋعا, عىلىمي-تەحنيكالىق شىعارماشىلىقتى دامىتۋعا ىقپال ەتەتىن موتيۆاتسيالىق تاجىريبەگە باعىتتالعان ورتا قۇرۋ. مىندەتىمىز – تەحنيكالىق جانە شىعارماشىلىق ويلاۋدى دامىتۋ ءۇشىن تاجىريبەگە باعىتتالعان ورتا رەتىندە Yessenov University بازاسىندا تەحنوپارك قىزمەتىن ۇيىمداستىرۋ. تەحنوپارك مۇمكىندىكتەرىن پايدالانا وتىرىپ, عىلىمي-تەحنيكالىق جانە يننوۆاتسيالىق جوبالاردى جۇزەگە اسىرۋ, تەحنوپارك قىزمەتىنە ءارتۇرلى زاماناۋي تەحنولوگيالاردى, تەحنيكالىق قۇرالداردى, باعدارلامالىق قامتاماسىز ەتۋدى تاجىريبەگە ەنگىزۋ جوسپارلانعان. بىرىڭعاي عىلىمي-تەحنولوگيالىق كەڭىستىك قۇرۋ, ياعني تەحنيكالىق شىعارماشىلىقتى, ينجەنەرلىك ءبىلىمدى ناسيحاتتاۋ ءارى تاراتۋ, سونداي-اق جوبالاۋ ءىس-ارەكەتىندە, جوبالاۋدا, باعدارلامالاۋدا, مودەلدەۋدە جانە پروتوتيپتەۋدە پراكتيكالىق داعدىلاردى قالىپتاستىرۋعا ەرەكشە كوڭىل بولىنەدى, – دەدى رەكتور.
قوناقتار ۋنيۆەرسيتەت اۋماعىنداعى جىلىجاي, جاسىل تەحنولوگيالار ورتالىعى, سۋ تۇشىتۋ قوندىرعىسى, تەڭىز اكادەمياسى ءۇش قاباتتى عيماراتىنىڭ قۇرىلىسى جانە جاڭا ستاديون جوباسىمەن تانىسىپ, قۇرىلىسى باستالعان ستۋدەنتتىك ساياباققا جاس شىبىقتار وتىرعىزدى. بۇل جوبالاردىڭ قاي-قايسىسى دا قىزىقتى. مىسالى, كەرى وسموس تەحنولوگياسىمەن سۋ تۇشىتۋ قوندىرعىنىڭ قۇرال-جابدىقتارىن وقۋ ورنىنا كاسپي سۋ تۇشىتۋ زاۋىتى سىيلاعان ەكەن. مۇندا ۇڭعىمادان ساعاتىنا 1-3 تەكشە مەترگە دەيىن سۋ شىعادى جانە ۋنيۆەرسيتەت اۋلاسىندا تۇشىتىلعان جەراستى سۋى جىلىجايعا قولدانىلادى. ال تەڭىز اكادەمياسى عيماراتىنىڭ قۇرىلىس جوباسى ستاندارتتارعا ساي جابدىقتالعان جانە ءبىر سۇيسىنەرلىگى اكادەميا قۇرىلىسىنىڭ بيۋدجەتى ۋنيۆەرسيتەتتىڭ ءوز ەسەبىنەن قارجىلاندىرىلعان. قۇرىلعىلاردى قارجىلاندىرۋعا مەملەكەت تاراپىنان قولداۋ كورسەتىلمەك.
شاراداعى ماڭىزدى وقيعانىڭ ءبىرى 500 ورىندىق جاڭا ستۋدەنتتەر جاتاقحاناسىنىڭ اشىلۋى بولدى. جاسىراتىنى جوق, جاتاقحانا – ەلىمىزدەگى ەڭ كۇردەلى, قوردالانعان ماسەلەلەردىڭ ءبىرى. ماسەلەنى ءوز قاداعالاۋىنا العان پرەزيدەنت قاسىم-جومارت توقاەۆ جۋىردا «جاتاقحانا سالۋ – وتە وزەكتى ماسەلەنىڭ ءبىرى. قازىر ستۋدەنتتەرگە 13 مىڭعا جۋىق ورىن جەتىسپەيدى. الايدا ۇكىمەت بۇل تۇيتكىلدى شەشۋگە ءمان بەرىپ وتىرعان جوق. عىلىم جانە جوعارى ءبىلىم مينيسترلىگى وسى ماسەلەلەردى ەرەكشە باقىلاۋعا الۋى كەرەك...» دەگەن بولاتىن. اقتاۋدا جاتاقحانا بويىنشا ماسەلە شەشىمىن تاۋىپ كەلەدى. Yessenov University قۇزىرىندا ءۇش جاتاقحانا بار. بىراق تابيعي جانە كوشىپ كەلۋشىلەر سانى ەسەبىنەن تۇرعىندار, جاستار سانى ارتىپ كەلە جاتقان وبلىستا جاتاقحاناعا قاجەتتىلىك الداعى جىلدارى ارتا ءتۇسۋى دە مۇمكىن.
قوناقتار ءۇشىن ۋنيۆەرسيتەتتىڭ باس كورپۋسىندا كامپۋس-تۋر ۇيىمداستىرىلدى. مينيستر س.نۇربەك Yessenov University ستۋدەنتتەرىمەن كەزدەسىپ, ءدارىس وقىدى.
Yessenov University-دە ءمينيستردىڭ قاتىسۋىمەن وتكىزىلگەن شارا جوعارى دەڭگەيدە ءوتتى. اقتاۋدىڭ قاق ورتاسىنداعى قالاشىقتا جاستاردىڭ الاڭسىز ءبىلىم الۋى, دەمالۋى ءۇشىن بارلىق جاعداي جاساۋدى ماقسات ەتكەن ۋنيۆەرسيتەت باسشىلىعىنىڭ باستاماسى قۇپتارلىق. بىراق مينيستر ساپارىندا ءبىر ساۋالدىڭ جاۋابى ايتىلماي قالدى – وتكەن جىلى ماڭعىستاۋ وبلىسىنا ءبولىنىپ, بىراق يگەرىلمەگەن 6 مىڭ گرانتتى يگەرۋ ماسەلەسى بيىل قالاي شەشىلمەك؟ ءمينيستردىڭ ايتۋىنشا, وسى جىلى وبلىسقا 5 مىڭ گرانت بولىنەدى ەكەن. سوندا ماسەلە گرانت سانىن قىسقارتۋمەن عانا شەشىلە مە؟ بۇل جاستارعا جاسالعان قامقورلىق نەمەسە ماسەلەنى شەشۋدىڭ ءتيىمدى جولى ەمەس. كەرىسىنشە مۇمكىندىكتەر شەڭبەرىن تارىلتۋ. گرانت سانىن ازايتقاننان گورى ءبىلىم, ءومىر ءسۇرۋ ساپاسىنىڭ دەڭگەيىن كوتەرۋ ارقىلى جاستاردىڭ قىزىعۋشىلىعىن ارتتىرۋ ماڭىزدى.
ماڭعىستاۋ وبلىسى
