جەتىسۋ وبلىسىنىڭ اقسۋ, الاكول, ەسكەلدى, كەربۇلاق, سارقان اۋداندارى مەن تالدىقورعان, تەكەلى قالالارى كەنە ەنتسەفاليتىنەن ەندەميالىق ايماقتارعا جاتادى. قازىر ماماندار اتالعان ۆيرۋسپەن كۇرەسۋدىڭ امالدارىن جاساۋدا.
«سىرقاتتانۋشىلىقتىڭ ماۋسىمدىلىق كەزەڭى ناۋرىز-قازان ايلارى ارالىعىنا كەلەدى. اۋرۋدىڭ الدىن الۋ ماقساتىندا ءساۋىر ايىنان باستاپ كەنەلەرگە قارسى وڭدەۋ جۇمىستارى جۇرگىزىلەدى. جەتىسۋ وبلىسىندا بيىل 230 گەكتار جەر كەنەگە قارسى وڭدەلەدى. بۇل جۇمىستار اقسۋ, الاكول, ەسكەلدى, كەربۇلاق, سارقان اۋداندارى مەن تالدىقورعان, تەكەلى قالالارىن قامتيدى», دەيدى وڭىرلىك سانيتارلىق-ەپيدەميولوگيالىق باقىلاۋ دەپارتامەنتىنىڭ باسشىسى ەرعالي سىدىمانوۆ.
ونىڭ ايتۋىنشا, ۇلتتىق ساراپتاما ورتالىعىمەن وڭدەۋگە ارنالعان 230 ليتر «فاۆوريت» ءدارىسى جەتكىزىلىپ, بارلىق اۋدان, قالاعا تاراتىلعان. وڭدەۋ جۇمىستارى الاكول, ەسكەلدى اۋداندارىندا باستالعان.
كەنە ەنتسەفاليتىنىڭ ەپيدەميولوگيالىق ماۋسىمدىلىق كەزەڭىنىڭ باستالۋىنا بايلانىستى اپتالىق مونيتورينگ ەنگىزىلىپ, سوعان ساي جۇمىستار جۇرگىزىلۋدە. 1-ءشى اپتالىق مونيتورينگكە سايكەس وبلىس بويىنشا كەنە شاعۋمەن مەديتسينالىق كومەككە 35 ادام جۇگىنگەن. ونىڭ ىشىندە 14 جاسقا دەيىنگى بالالار 46 پايىزدى قۇراپ وتىر. بىلتىرعى جىلمەن سالىستىرعاندا, كەنە شاعۋمەن مەديتسينالىق كومەككە جۇگىنگەن ادام سانى 9 جاعدايعا جوعارىلاعان.
«13-14 ءساۋىر كۇنى تالدىقورعان قالاسىنىڭ ارداگەرلەر پاركىندە دەزينسەكتسيالىق پرەپاراتتىن قولدانۋ ارقىلى جۇرگىزىلەدى. قايتا وندەۋ جۇمىستارى مامىر ايىندا وتكىزىلەدى. بيىل ناۋرىز ايىندا باسقارما ماماندارىمەن 200 دانا كەنە جينالىپ, ۇلتتىق ساراپتاما ورتالىعىنىڭ اسا قاۋىپتى زەرتحاناسىنا جىبەرىلدى. كەنەلەردى كونگو-قىرىم بەزگەككە, كەنە ەنتسەفاليتىنە جانە تۋليارەمياعا سىرقاتتانۋشىلىعىنا زەرتتەۋ جۇرگىزەتىن بولادى», دەيدى تالدىقورعان قالالىق سانيتارلىق-ەپيدەميولوگيالىق باقىلاۋ باسقارماسىنىڭ باسشىسى ساكەن مەلدەباەۆ.
ماماندار تۇرعىندار اراسىندا كەنە ەنتسەفاليتىمەن سىرقاتتانۋشىلىقتىڭ الدىن الۋ ماقساتىندا تابيعاتقا شىعۋ, ساياباقتاردا سەرۋەندەۋ جانە اۋماقتى جيناۋ كەزىندە ساقتىق شارالارىن ۇستانۋعا شاقىرادى.
جەتىسۋ وبلىسى
