وسىلايشا شەبەرلىك ساعاتىنىڭ اياسىندا جۇرەكتىڭ قولقا قاقپاقشاسىن اۋىستىرۋ ءۇشىن ەڭ جاڭا «Avalus» بيولوگيالىق پروتەزى 52 جانە 60 جاستاعى ەكى پاتسيەنتكە يمپلانتاتسيالاندى.
مەديتسيناداعى ەلەۋلى وقيعاعا ەل وڭىرلەرىندەگى جەتەكشى كارديوحيرۋرگيالىق كلينيكالاردىڭ كارديوحيرۋرگتارى دا ورتاقتاسىپ, ماماندارىمىز جۇرە كەلە پايدا بولعان جانە تۋا ءبىتتى قولقا (اورتا) قاقپاقشاسى كەسەلىنە بيولوگيالىق پروتەزدى يمپلانتاتسيالاۋ جونىندەگى وقىتۋدان ءوتتى.
كارديولوگيا جانە ىشكى اۋرۋلار عزي باسقارما توراعاسى مارات پاشيموۆتىڭ ايتۋىنشا, مەديتسيناداعى جاڭا تەحنولوگيالار مىڭداعان ادامداردىڭ دەنساۋلىعىن دەر كەزىندە دۇرىستاۋعا كومەكتەسىپ وتىر. وسىنىڭ ارقاسىندا دەنساۋلىق ساقتاۋ سالاسى جوعارى دەڭگەيگە كوتەرىلىپ, ادام ءومىرى ۇزارىپ, دەنساۋلىعى جاقسارىپ, جوعارى تەحنولوگيالىق مەديتسينالىق كومەك كورسەتۋ ديناميكاسى ءوسىپ كەلەدى.
ء«بىزدىڭ كلينيكامىزدىڭ بازاسىندا تمد اۋماعىندا العاش رەت ساۋد ارابياسىنىڭ جەتەكشى كارديوحيرۋرگىنىڭ قاتىسۋىمەن جۇرەكتىڭ قولقا قاقپاقشاسىن اۋىستىرۋ ءۇشىن سوڭعى بۋىنداعى بيولوگيالىق پروتەز يمپلانتاتسيالاندى. بۇل بيولوگيالىق جۇرەك قاقپاقشاسىنىڭ پروتەزىن يننوۆاتسيالىق تۇرعىدا جەتىلدىرۋدىڭ 40 جىلدىق تاجىريبەسىنە نەگىزدەلگەن. بۇكىل الەمدىك تاجىريبەدەگى ەڭ ۇزدىكتەرىن بىرىكتىرە وتىرىپ, وسىنداي قاقپاقشا قۇرىلسا, ول جوعارى گەموديناميكالىق كورسەتكىشتەرىمەن, پايدالانۋ جەڭىلدىگى, بەرىكتىگىمەن, ءۆارفاريندى قولدانۋ قاجەتتىلىگى بولماۋىمەن ەرەكشەلەنەدى», دەيدى مارات ورىنباسار ۇلى.
وسى وتادان وتكەن, ياعني قولقا قاقپاقشاسىنىڭ قىزمەتىندە كىناراتى بار ەكى ناۋقاس جۇرەك ايماعىنداعى قىسىپ اۋىرتۋ, كوپ قيمىلداعان كەزىندە ەنتىگۋ, تەز شارشاپ قالاتىندىقتارى سياقتى شاعىمدارىمەن ستاتسيونارعا تۇسكەن. ولارعا دارىگەرلەردىڭ حيرۋرگيالىق ارالاسۋى ۇسىنىلعان.
ساۋد ارابياسىنان كەلگەن كارديوحيرۋرگ, كورولدىك مەملەكەتتىك كارديوحيرۋرگيا سالاسىنداعى كلينيكانىڭ ديرەكتورى مۇحامەد ساللاح الرەشحيدان ينستيتۋتتىڭ جاقسى جابدىقتالعانىن ايتىپ وتىر.
«جۇرەك قاقپاقشالارىن پروتەزدەۋ تەحنولوگيالارى ۇزدىكسىز دامىپ كەلەدى. جۇرەك قاقپاقشالارىن پروتەزدەۋ وپەراتسياسى جۇرەكتەگى قان اعىمىن قالىپقا كەلتىرۋگە, جۇرەك جەتكىلىكسىزدىگىنىڭ دامۋىنا جول بەرمەي, جۇرەككە قوسىمشا سالماقتى جويۋ ءۇشىن جۇرگىزىلەدى», دەيدى كارديوحيرۋرگيا بولىمشەسىنىڭ مەڭگەرۋشىسى رۇستەم تولەۋتاەۆ.
«ال اسقىنۋ قاۋپى جوعارى ناۋقاستاردا, سونداي-اق ەگدە جاستاعى ادامداردا جۇرەك قاقپاقشالارىنىڭ بيولوگيالىق پروتەزدەرىن قولدانعان ءجون. بيولوگيالىق قاقپاقشالاردىڭ ماڭىزدى ارتىقشىلىقتارىنىڭ ءبىرى – قاندى سۇيىلتاتىن دارىلەردى-انتيكواگۋليانتتاردى ءومىر بويى قابىلداۋدىڭ قاجەتتىلىگى توقتايدى», دەپ ءتۇسىندىردى دوكتور.
جاڭا بۋىن جۇرەك قاقپاقشاسىنىڭ بيولوگيالىق پروتەزى وڭاي جانە ۇزاق قىزمەت ەتەدى. بۇل قاقپاقشانىڭ قىزمەت ەتۋ مەرزىمى ستاندارتتى كلاپاندارعا قاراعاندا ۇزاعىراق.
قاقپاقشا يمپلانتاتسياسى ءۇشىن ستاندارتتى ءتاسىل دە, ستەرنوتوميانى قاجەت ەتپەيتىن, اعزاعا بارىنشا زاقىمى از تەحنيكا دا قولايلى, بۇل كەۋدە قۋىسى قاڭقاسىن ساقتاۋعا, ينفەكتسيالىق اسقىنۋلاردىڭ قاۋپىن ازايتۋ مەن اۋىرسىنۋ سيندرومىنىڭ زاردابىن تومەندەتۋگە مۇمكىندىك بەرەدى. سونداي-اق وپەراتسيادان كەيىنگى كەزەڭدە تىنىس الۋ جەڭىلدەپ, ۇزاق ۋاقىت بويى كورسەت كيۋ قاجەتتىلىگى جويىلادى دا, قالىپتى ومىرگە تەزىرەك ورالۋعا مۇمكىندىك ۇلعايادى دەيدى ماماندار.
