وقۋ-اعارتۋ ءمينيسترى عاني بەيسەمباەۆ وسى باعىت بويىنشا بالاباقشالاردا 300 مىڭ جاڭا ورىن اشۋ, ءبىلىم بەرۋ جۇيەسىندەگى جاڭاشىلدىقتىڭ – 1000 كوشباسشىسى كادرلىق رەزەرۆىن قۇرۋ, مەكتەپتەردە 7 مىڭ پاندىك كابينەت اشۋ, 100 قوسىمشا ءبىلىم بەرۋ وبەكتىسىن سالۋ, كوللەدجدەردەگى مەملەكەتتىك تاپسىرىستى 150 مىڭ ورىنعا دەيىن ۇلعايتۋ, 100 بيزنەس-ينكۋباتور قۇرۋ جانە ت. ب. شارالاردىڭ جوسپارلانعانىن حابارلادى.
عىلىم جانە جوعارى ءبىلىم ءمينيسترى ساياسات نۇربەك جوعارى وقۋ ورىندارىنىڭ ءبىلىم بەرۋ باعدارلاماسىن جاڭارتۋ, وڭىرلىك كادرلىق قاجەتتىلىك كارتاسىن جاساۋ, عىلىمي قىزمەت ناتيجەلەرىن كوممەرتسيالاندىرۋ بويىنشا جۇرگىزىلىپ جاتقان جۇمىستارعا توقتالدى. ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا ۇلتتىق بىلىكتىلىك جۇيەسىن دامىتۋ شارالارى تۋرالى ايتتى. ءبىلىم بەرۋ باعدارلامالارىنىڭ نەگىزى بولىپ تابىلاتىن كاسىپتىك ستاندارتتاردى ازىرلەۋگە جۇمىس بەرۋشىلەردىڭ قاتىسۋى قاجەت دەپ اتاپ ءوتىلدى. سونىمەن قاتار اسىرەسە, جاستاردىڭ جۇمىسقا ورنالاسۋىنا كەدەرگىلەردى جويۋعا باعىتتالعان تاۋەلسىز سەرتيفيكاتتاۋدى ەنگىزۋگە نازار اۋدارىلدى.
جيىنعا قاتىسۋشىلار ەكونوميكا سالالارىنا كادر دايارلاۋ, تۇلەكتەردى جۇمىسقا ورنالاستىرۋ, دۋالدى وقىتۋ, كاسىبي ستاندارتتاردى ازىرلەۋ, عىلىمي-زەرتتەۋ جانە تاجىريبەلىك-كونسترۋكتورلىق جۇمىستاردى (عزتكج) قارجىلاندىرۋ, سالىق تولەۋگە ىنتالاندىرۋ, جەكە مەنشىك مەكتەپتەر مەن مەكتەپكە دەيىنگى ءبىلىم بەرۋ ۇيىمدارىن دامىتۋ, ينجەنەرلىك قىزمەت جانە باسقا دا ماسەلەلەردى جان-جاقتى تالقىلادى.
پرەمەر-مينيستر ەكونوميكا قاجەتتىلىكتەرى ءۇشىن مامان دايارلاۋ ۇكىمەتتىڭ باسىم مىندەتتەرىنىڭ ءبىرى ەكەنىن اتاپ ءوتتى. وسىعان بايلانىستى ازاماتتار مەن بيزنەستىڭ بەلسەندى قاتىسۋىمەن ەكونوميكانىڭ ناقتى قاجەتتىلىكتەرىنە نازار اۋدارا وتىرىپ, ءبىلىم بەرۋ جۇيەسىن جەتىلدىرۋ جانە جاقسارتۋ بويىنشا جۇمىستاردى جالعاستىرۋ قاجەت.
ء«بىلىم بەرۋ گرانتتارىن جانە باسقا دا دامىتۋ شارالارىن الدىن الا قاراستىرۋ ءۇشىن ەڭبەك نارىعىن زەرتتەۋگە جانە 5-7 جىلدان كەيىن ەكونوميكاعا قانداي كادرلار قاجەت بولاتىنىن بولجاۋعا كوڭىل ءبولۋ قاجەت. بۇل تەك جوعارى وقۋ ورىندارىنا عانا ەمەس, كوللەدجدەر مەن باسقا دا ءبىلىم بەرۋ ۇيىمدارىنا قاتىستى. ءبىلىم بەرۋ باعدارلامالارى نارىق سۇرانىسىنا ساي بولۋى ءتيىس», دەدى ءاليحان سمايىلوۆ.
كەڭەس قورىتىندىسى بويىنشا پرەمەر-مينيستر وقۋ-اعارتۋ, عىلىم جانە جوعارى ءبىلىم, ەڭبەك جانە حالىقتى الەۋمەتتىك قورعاۋ مينيسترلىكتەرىنە ايتىلعان بارلىق ۇسىنىستى جۇمىس بارىسىندا نازارعا الۋدى جانە «اتامەكەن» ۇلتتىق پالاتاسىمەن بىرلەسە, كوتەرىلگەن ماسەلەلەردى شەشۋ جولدارىن قاراستىرۋدى تاپسىردى.
ءىس-شاراعا ورتالىق مەملەكەتتىك ورگانداردىڭ, «اتامەكەن» ۇلتتىق كاسىپكەرلەر پالاتاسىنىڭ, قازاقستاننىڭ ۇزدىكسىز ءبىلىم بەرۋ قاۋىمداستىعىنىڭ, «ەۋرازيالىق توپ» جشس-ءنىڭ جانە باسقا دا سالالىق ۇيىمدار باسشىلارى قاتىستى.
