جاقسىلىققا ۇندەر شارا

جىل سايىن ماۋسىم ايىنىڭ اياعىنا تامان الەمدىك قوعامداستىق ناشاقورلىققا جانە ەسىرتكىنىڭ زاڭسىز اينالىمىنا قارسى كۇرەس كۇنىن اتاپ ءوتۋدى داستۇرگە اينالدىرعان. ونداعى ماقسات – جۇرتشىلىقتى سالاماتتى ءومىر سالتىن ۇستانۋعا شاقىرۋ, جاھاندىق دەرتپەن جۇمىلا كۇرەسۋگە ۇندەۋ. وسىعان بايلانىس­تى بيىل وڭتۇستىك قازاقستان وبلىسى اكىمدىگىنىڭ, وبلىستىق دەنساۋلىق ساقتاۋ باسقارماسىنا قاراستى «سالاماتتى ءومىر سالتىن قالىپتاستىرۋ» مەملەكەتتىك مەكەمەسىنىڭ ۇيىمداستىرۋىمەن ءوڭىردىڭ بارلىق اۋداندارى مەن قالالارىندا «سەنىڭ ەسىرتكىڭ – سالاماتتى ءومىر سالتى بولسىن!» ۇرانىمەن ءىس-شارالار وتكىزىلدى. بۇۇ-نىڭ سوڭعى مالىمەتتەرى بويىنشا قازىرگى تاڭدا الەمدە ناشاقورلاردىڭ سانى 185 ميلليوننان كەم ەمەس كورىنەدى. ونىڭ ىشىندە ناركولوگ-دارىگەرلەردى الاڭداتاتىن ماسەلەنىڭ ءبىرى – جاسوسپىرىمدەردىڭ ەسىرتكىگە تاۋەل­دىلىگىنىڭ جىل سايىن ارتىپ بارا جاتۋى. وسىدان ءۇش-ءتورت جىل بۇرىن ەسىرتكى پايدا­لانا­تىن­داردىڭ ەڭ جاسى 16-17-لەر شاماسىندا بولسا, بۇل قازىر 13-14 جاسقا تومەندەگەنىنە ناقتى دالەل كەلتىرىپ وتىر ساراپشىلار. سوندىقتان دا ەڭ الدىمەن ەلىكتەگىش كەزەڭىندەگى جاسوسپىرىمدەرگە بەيجاي قاراۋعا بولمايتىنىن ۇمىتپاعانىمىز ابزال. بۇل ورايدا وڭتۇستىكتە وتكەن ءىس-شارالار لەگىنىڭ جاسوسپىرىمدەرگە ارنالعان قويىلىمنان باستالعانىن ايت­قىمىز كەلەدى. وڭتۇستىك قازاقستان وبلىستىق ساتيرا, ءازىل-سىقاق تەاترىنىڭ ناشاقورلىققا قارسى دايىنداعان «بارون» اتتى دراماسى الدىمەن ءۇش كۇن قاتارىنان شىمكەنت قالاسىندا قويىلىپ, سوسىن اۋداندارعا جول تارتتى. سامات التاەۆ ساحنالاعان بۇل پسيحولوگيالىق دراما جازعى لاگەرلەردە دەم الىپ جاتقان بالالار ءۇيىنىڭ تاربيەلەنۋشىلەرىنە, «قيىن بالالار» دەپ ەسەپتەلەتىن جاسوسپىرىمدەرگە كورسەتىلدى. ناشاقورلىقتىڭ ازابىن پسيحو­لوگيالىق تۇرعىدان جان-جاقتى بەينەلەگەن دراما بالالارعا ۇلكەن اسەر قالدىردى دەپ ەسەپتەيمىز. سالاماتتى ءومىر داعدىسىن بالالاردىڭ بويىنا ەرتە جاستان ءسىڭىرۋ, ولاردى زياندى ادەتتەردەن اۋلاق بولۋعا ۇگىتتەۋ ماقساتىندا ورتالىق قىزمەتكەرلەرى ماشات شاتقالىندا ورنالاسقان لاگەرلەردە سان تاقىرىپتى قامتيتىن ءىس-شارالار مەن بايقاۋلار ۇيىم­داستىرىپ وتكىزدى. ونىڭ ىشىندە سۋرەت بايقاۋلارىن, سپورتتىق جارىس­تاردى, «سەنىڭ تاڭداۋىڭ بار ما؟» اتتى شاراسىن اتاپ ايتۋعا بولادى. پسيحولوگتار بالالارمەن ترەنينگتەر جۇرگىزدى. سونداي-اق, ورتالىق «سامال» بالالار ءۇيىنىڭ تاربيەلەنۋشىلەرىنە ۆەلوسيپەدتەر مەن سپورتتىق سومكەلەر, سكەيتبوردتار تابىستاپ, كوڭىلدەرىن كوتەرىپ تاستادى. سودان كەيىن ءوڭىر ورتالى­عىندا وبلىس اكىمدىگىنىڭ قولداۋى­مەن, وبلىستىق ىشكى ىستەر دەپار­تامەنتىنىڭ, پروكۋراتۋرانىڭ, دەنساۋلىق ساقتاۋ, ءبىلىم, جاستار ساياساتى ماسەلەلەرى جونىندەگى باسقارمالارىنىڭ, قالا اكىمدىگى مەن باسقا دا ۇيىمداردىڭ, تۇرعىندار مەن قوناقتاردىڭ, جاستاردىڭ قاتىسۋىمەن ۆەلوشەرۋ بولدى. بۇل شەرۋگە بالالارمەن قاتار قارتتار, ۇزىن سانى 300 ادام قاتىستى. ولاردى «ناۋرىز» الاڭىندا كوپشىلىك قارسى الدى. بۇل جيىندا وبلىس اكىمىنىڭ ءبىرىنشى ورىنباسارى بەرىك وسپانوۆ, وبلىس پروكۋرورىنىڭ ءبىرىنشى ورىنباسارى باتىرحان جانىبەكوۆ ءسوز سويلەپ, كوپشىلىكتى سالاماتتى ءومىر سالتىن ۇستانۋعا شاقىردى. شەرۋگە بەلسەندى اتسالىسقان ەڭ جاس ۆەلو­شەرۋشى مەن ەڭ ەگدە ۆە­لو­شەرۋشىگە ۆەلوسيپەد سىيعا ­تارتىلدى. مەكەمەمىزدەگى دەنساۋ­لىق ساقتاۋ ورتالىعىنىڭ ەرىكتىلەرى جانە ماماندارى قالا كوشەلەرى مەن ساياباقتارىن جاياۋ ءجۇرىپ ءوتتى. جاستار اسەرلى ۆيكتورينا ويىندارىن جۇرگىزىپ, ناشاقورلىقپەن باتىل كۇرەسۋگە شاقىردى. جاياۋ جۇرگىنشىلەرگە ارنالعان جولدارعا «ەسىرتكىگە جول جوق!» دەگەن جازۋ جازىپ, وسى كەسەلدەن مۇلدەم باس تارتۋعا ۇندەۋ تاستادى. وسىلايشا ناشاقورلىقتىڭ الدىن الۋعا باعىتتالعان ءتۇسىندىرۋ جۇمىستارى ايماقتىڭ بارلىق اۋداندارىندا جۇرگىزىلدى. جانات توعايبەكوۆا, «وبلىستىق سالاماتتى ءومىر سالتىن قالىپتاستىرۋ» مەملەكەت­تىك مەكەمەسىنىڭ ديرەكتورى. شىمكەنت.