اسىرەسە دەنساۋلىق ساقتاۋ سالاسىندا كادر تاپشىلىعى ءالى جويىلعان جوق. كەيبىر مەديتسينالىق جابدىقتار ەسكىرگەن. بۇل, ارينە, مەديتسينالىق كومەكتىڭ ساپاسىنا كەرى اسەر ەتەدى. ماسەلەن, وبلىستىق ونكولوگيا ديسپانسەرىنىڭ مۇمكىندىگى شەكتەلىپ وتىر دەۋگە نەگىز بار. ويتكەنى ديسپانسەردىڭ ەسكىرگەن عيماراتى اپاتتى جاعدايدا تۇر. مۇندا مەديتسينالىق جابدىقتاردىڭ ەسكىرۋىنە بايلانىستى مي ىسىكتەرىن, ايەلدەردىڭ رەپرودۋكتيۆتى سىرقاتىن, باسقا دا اۋىر دەرتتەردى تولىق ەمدەۋ مۇمكىن ەمەس. ديسپانسەرگە سىزىقتىق ۇدەتكىش, براحەوتەراپيا اپپاراتى, كومپيۋتەرلىك توموگراف كەرەك.
– وڭىرگە كەلەتىن دارىگەرلەردى تۇرعىن ۇيمەن, كوتەرمەاقىمەن قامتاماسىز ەتۋ, مەديتسينالىق نىسانداردى سالۋ جانە جاڭعىرتۋ ءۇشىن كەشەندى شەشىمدەر قابىلداۋ قاجەت. ماڭىزدى ماسەلەنىڭ ءبىرى – ونكولوگيا ديسپانسەرىنىڭ ماتەريالدىق-تەحنيكالىق بازاسىن جاڭارتۋ. وبلىس اكىمدىگى جەلىلىك ۇدەتكىشتى ورنالاستىرۋعا قاجەت كانوندى ساتىپ الاتىن بولسا, «قازاقستان حالقىنا» قورىنان وزگە قىمبات قۇرال-جابدىقتارعا قارجى ءبولۋ جوسپارلانىپ وتىر. سوندا وبلىس تۇرعىندارى بىلىكتى مەديتسينالىق كومەكتى جەرگىلىكتى جەردەن جەدەل ءارى ساپالى ەم الاتىن بولادى. ەلىمىزدەگى 16 ونكولوگيالىق ورتالىق «قازاقستان حالقىنا» قورى ەسەبىنەن ساۋلەلىك تەراپيا قۇرىلعىلارىمەن جابدىقتالادى, – دەدى التاي كولگىنوۆ.
ءوڭىردىڭ ءبىلىم سالاسىندا دا بىرقاتار شەشىمىن تاپپاعان ماسەلە بار. قازىر ءتورت ءبىلىم ورداسىنىڭ عيماراتى اپاتتى جاعدايدا بولسا, 11 مەكتەپتە ساباق ءۇش اۋىسىمدا وقىتىلادى. ماسەلەن, ماحامبەت اۋىلىنداعى د.تولەنوۆ اتىنداعى گيمنازيا 1938 جىلى سالىنعان ءۇش جەكە عيماراتقا ورنالاسقان. بىراق بۇل عيماراتتارعا روبوتتەحنيكا مەن «STEAM» كابينەتتەرىن ورنالاستىرۋ مۇمكىن ەمەس. ەندى جاڭا وقۋ جىلى باستالعانعا دەيىن 600 ورىندىق زاماناۋي عيمارات پەن 300 ورىندىق مەكتەپ-ينتەرنات سالىنادى.
مەكتەپتەردە پەداگوگيكالىق كادرلار جەتىسپەيدى. وقۋشىلاردىڭ ساپالى ءبىلىم الۋى ءۇشىن مەكتەپتەردە ورىن تاپشى بولىپ وتىر. وقۋ-اعارتۋ مينيسترلىگىنىڭ مالىمەتىنشە, اتىراۋ وبلىسىندا فۋنكتسيونالدىق ساۋاتتىلىق, اكادەميالىق ءبىلىم, سونداي-اق ۇبت ناتيجەلەرى وتە تومەن. اتتەستاتسيا قورىتىندىسىمەن شەكتى ماننەن تومەن ۇپاي جيناعان ءپان مۇعالىمدەرىنىڭ ۇلەسى بويىنشا انتيرەكورد تىركەلگەن.
– بارلىق قۇرالداردى پايدالانىپ, وقۋشىلاردىڭ ءبىلىم دەڭگەيىن ارتتىرۋ قاجەت. مۇعالىمدەردىڭ كاسىبي دەڭگەيىن ارتتىرۋ, وقىتۋ ادىستەمەسىن قايتا قاراپ, حالىقارالىق تاجىريبەنى بارىنشا پايدالانعان ءجون. اۋىلدارداعى ينتەرنەت جىلدامدىعىن ارتتىرۋدىڭ ماڭىزى زور, – دەدى پرەمەر-ءمينيستردىڭ ورىنباسارى.
وڭىردەگى ەڭ ءىرى جوعارى وقۋ ورنىنىڭ ءبىرى – ح.دوسمۇحامەدوۆ اتىنداعى اتىراۋ ۋنيۆەرسيتەتىندە 1000 ورىندىق ستۋدەنتتىك جاتاقحانا قۇرىلىسىن سالۋ جوسپارى جاساقتالعان. جاتاقحانانى سالۋ ءۇشىن بىرنەشە نۇسقا قاراستىرىلىپ وتىر. ونىڭ ءبىرى – قارىزعا الىناتىن قاراجات ەسەبىنەن بولسا, ەكىنشىسى – مەملەكەت-جەكەمەنشىك ارىپتەستىگى.
بۇل وڭىردە جۇمىسپەن قامتۋ وزەكتى ماسەلەنىڭ قاتارىنا تۇسكەن ەمەس. وسى ورايدا اتىراۋداعى «APEC PetroTechnic» جوعارى كوللەدجىنىڭ بازاسىندا ءتورت جىلدان بەرى ءىرى تاۋ-كەن ءوندىرۋشى كومپانيانىڭ دەمەۋشىلىگىمەن ءبىلىم بەرۋ جوباسى جۇزەگە اسىرىلىپ كەلەدى. مۇندا اتىراۋ جانە كورشىلەس ماڭعىستاۋ وبلىسىنىڭ جۇمىسسىز تۇرعىندارىنىڭ مۇناي-گاز سالاسىندا سۇرانىسقا يە كاسىپتەردى مەڭگەرۋىنە مۇمكىندىك بار. وقىتۋدى تاجىريبەلى شەبەرلەر جۇرگىزەدى. ولار تەوريالىق بىلىممەن بىرگە تاجىريبە بەرەدى. سونىڭ ناتيجەسىندە, كاسىبي دايارلىق كۋرسىن بىتىرۋشىلەرىنىڭ 90%-عا جۋىعى جاڭا ماماندىقپەن جاقسى جالاقى الاتىن جۇمىس تابادى.
اۋىلدارداعى جۇمىسپەن قامتۋ ماسەلەسىن شەشۋگە «اۋىل اماناتى» جوباسىنىڭ سەپتىگى ءتيۋى مۇمكىن. پرەمەر-ءمينيستردىڭ ورىنباسارى التاي كولگىنوۆ ماحامبەت اۋدانىنىڭ تۇرعىندارىمەن كەزدەسۋدە اتالعان جوبانىڭ ءتيىمدى تۇستارىنا توقتالدى. ال تۇرعىندار ەلدى مەكەندەردى اباتتاندىرۋ, جول سالۋ, سۋمەن قامتۋ سەكىلدى ماسەلەلەردى كوتەردى.
– كوكتەم – باستامانى ءوز قولىڭىزعا الۋ, ءوز بيزنەسىڭىزدى باستاۋ ۋاقىتى. ونىڭ ۇستىنە مەملەكەت جەكە قوسالقى شارۋاشىلىقتى نەمەسە كاسىپكەرلىكتى دامىتۋ ءۇشىن جەڭىلدەتىلگەن پايىزدىق مولشەرلەمەمەن قولايلى قارجى, نەسيەلىك دەمالىستار مەن باسقا دا مۇمكىندىكتەر بەرەدى. بيىل جەرگىلىكتى اكىمدىكتىڭ تاپسىرىسىنا سايكەس «اۋىل اماناتى» باعدارلاماسىن جۇزەگە اسىرۋ ءۇشىن اتىراۋ وبلىسىنا 1 ملرد 504 ملن تەڭگە ءبولىندى. بۇل قاراجاتقا 188 نەسيە بەرىپ, 200-گە جۋىق جەكە قوسالقى شارۋاشىلىق قۇرۋ جوسپارلانىپ وتىر, – دەپ ءمالىم ەتتى التاي كولگىنوۆ.
اتىراۋ وبلىسى
