مىقتىنى شارشى الاڭ انىقتايدى

الماتىدا بوكستان ەرەسەكتەر اراسىندا ءوتىپ جاتقان «قازاقستان رەسپۋبليكاسى پرەزيدەنتىنىڭ كۋبوگى» IV حالىقارالىق تۋرنيرىندە 10 قازاقستاندىق بوكسشىنىڭ التاۋى كەلەسى اينالىمعا شىقتى. ءتۋرنيردىڭ ءبىرىنشى كۇنى ءتورت بوكسشىمىز قارسىلاستارىنا ەسە جىبەرىپ الدى. ەڭ جەڭىل, ياعني 49 كگ سالماقتا ازيا چەمپيونى تەمىرتاس ءجۇسىپوۆ, ادىلەت قۇرمەتوۆ (52 كگ), ەرلان تامەموۆ (52 كگ) پەن الماسبەك ورىنعاليەۆ ءبىرىنشى اينالىمدا جەڭىلىپ قالدى. ال باسقا بوكسشىلارىمىز جومارت ەرجان (49 كگ) موڭعول گانگارادا گانەردەننەن, ءىلياس سۇلەيمەنوۆ (52 كگ) تاجىك زاينۋددين حودجامكۋلوۆتان باسىم ءتۇستى. سول سياقتى بەرىك ءابدىراحمانوۆ (60 كگ) قىرعىزستان چەمپيونى اكجول سۋيلامبەك ۋلۋنى, زاكىر سافيۋللين (60 كگ) ازەربايجان اريز يبراگيموۆتى ۇتتى. كوماندا كاپيتانى دانيار ەلەۋسىنوۆ (69 كگ) پەن رەسەيلىك دميتري مۋراتوۆتىڭ جەكپە-جەگى وتە تارتىستى ءوتتى. ءبىرىنشى راۋندتا ءبىزدىڭ بوكسشىمىز نوكداۋندا دا بولدى. الايدا, سوڭعى ەكى راۋندتا دانيار ءوزىن تەز جيناپ, رەسەيلىك بوكسشىنى ساباپ تاستادى. بۇل كەزدەسۋ 3:0 ەسەبىمەن ەلەۋسىنوۆتىڭ باسىمدىعىمەن اياقتالدى. 81 كگ سالماق دارەجەسىندە قولعاپ تۇيىستىرگەن ادىلبەك نيازىمبەتوۆ تە رەسەيلىك قارسىلاسىن قۋىپ ءجۇرىپ سابادى دەسە بولادى. ول دا ەۆگەني ۆورونوۆتى 3:0 ەسەبىمەن ۇتتى. كەشە قازاقستان قۇراماسىنان شارشى الاڭعا ەرجان ورداباەۆ (56 كگ), بەرىك ءابدىراحمانوۆ, زاكىر سافيۋللين مەن دارحان جۇمساقباەۆ (60 كگ), الماسبەك الىبەكوۆ, 2011 جىلعى ازيا چەمپيونى ايدار امىرزاقوۆ پەن اسلانبەك شىمبەرگەنوۆ (64 كگ), ازيا چەمپيونى انتون پينچۋك, اسكار ابدۋللاەۆ پەن الەكسەي سەۆوستيانوۆ (91 كگ-دان جوعارى) شىقتى. ولار  رەسەيلىك زينات جاندىباەۆ, دميتري چەرنياك (ۋكراينا), وتگوندالاي (موڭعوليا), چارلي ساۋرەز (فيليپپين), يۆان دانچا (ۋكراينا), ساحم كاررار (يراك), ەدۋارد حۋساينوۆ (رەسەي), يارگال وتونيارگال (موڭعوليا), سەرگەي رادچەنكو (ۋكراينا) مەن كوردوۆا حەريحپەن (كۋبا) قولعاپ ءتۇيىستىردى. بۇل تۋرنير حالىقارالىق بوكس قاۋىمدىستىعىنىڭ قامقورلىعى اياسىندا ءوتىپ جاتىر. قازاقستان  بوكس فەدەراتسياسىنىڭ ۆيتسە-پرەزيدەنتى سەرىك قوناقباەۆتىڭ ايتۋىنشا, بولاشاقتا «قازاقستان رەسپۋبليكاسى پرەزيدەنتىنىڭ كۋبوگى» ءتۋرنيرىن ايبا-نىڭ «ا» سىنىپتى تۋرنيرلەر كۇنتىزبەسىنە ەنگىزۋ كوزدەلىپ وتىر. ەگەر تۋرنير «ا» سىنىپقا ەنگىزىلسە, وندا وعان بولاشاقتا 20-دان استام ەلدەردىڭ بوكسشىلارى قاتىسا الادى. ال ازىرگە وعان الەمنىڭ 12 ەلىنەن 106 بوكسشى قاتىسۋدا. بيىلعى ءتۋرنيردىڭ جۇلدە قورىنا كەلسەك, ونىڭ جەڭىمپازدارىنا 4 000 دوللاردان تابىس ەتىلەدى. ەكىنشى ورىن العان جۇلدەگەرلەر 2000 دوللاردان السا, قولا جۇلدەگەرلەرگە 1000 دوللاردان بەرىلەدى. س.قوناقباەۆتىڭ ايتۋىنشا, ءبىزدىڭ بوكسشىلاردىڭ وسى تۋرنيردە كەم دەگەندە 5 التىن مەدالدى جەڭىپ الۋعا مۇمكىندىكتەرى بار. ويتكەنى, وتانداستارىمىز تۋرنيرگە  ءۇش قۇراممەن قاتىسۋدا. ولاردىڭ دايىندىعى دا جاقسى. – بيىلعى جارىسقا قازاقستان قۇراما كومانداسىنىڭ ءۇش قۇرامى دا قاتىسۋدا. ونداعى ماقسات – كوماندانىڭ الداعى قىركۇيەك ايىندا وڭتۇستىك كورەيانىڭ ينچحون قالاسىندا وتەتىن ازيا ويىندارىنا دايىندىعىن بايقاۋ. سودان كەيىن بوكسشىلارىمىز تۇركيانىڭ انتاليا قالاسىنا بارىپ, ەكى اپتا دەمالىپ قايتادى. ال 2015 جىلدىڭ تامىز ايىندا ناعىز دايىندىق باس­تالادى. وسى كەزدەن باستاپ بوكس­شىلارىمىز وليمپياداعا جولداما بەرەتىن الەم چەمپيوناتىنا قاتىسۋعا دايىندالادى, – دەيدى س.قوناقباەۆ. داستان كەنجالين,                   «ەگەمەن قازاقستان».