حالىقارالىق «ATI.SU جۇك تاسىمالى بيرجاسىنىڭ» حابارلاۋىنشا, ءوسىمنىڭ باستى درايۆەرى رەسەيلىك باعىت بولىپ وتىر. بۇل باعىت بويىنشا ءوتىنىم سانى 222 پايىزعا, ال باعا 67 پايىزعا وسكەن. مۇنداي ديناميكا بەلارۋس باعىتىندا دا بايقالادى. وزبەكستان مەن قىرعىزستانعا تاسىمال دا ايتارلىقتاي وسىمگە يە.
«رەسەيلىك باعىتتاعى ءوسىمنىڭ باستى سەبەبى – كومپانيالاردى سول ەلدىڭ نارىعىنان كەتۋگە ءماجبۇر ەتكەن باتىس سانكتسيالارى. مۇنداي احۋال رەسەيمەن «دوستاس» ءبىراز ەلدە بايقالادى. بىراق قازاقستان تۇركيامەن بىرگە ەۋروپالىق تاۋارلاردى رف-عا جەتكىزۋ بويىنشا نەگىزگى تيەۋ بەكەتى بولىپ وتىر. سونىمەن قاتار تىكەلەي قازاقستاندا وندىرىلەتىن ونىمدەرگە دە سۇرانىس جوعارىلادى», دەلىنەدى حابارلامادا.
وزگە ەلدەردەن قازاقستانعا تاسىمال بويىنشا قالىپتى ءوسىم بار. بىلتىرمەن سالىستىرعاندا ءوتىنىم سانى 49 پايىزعا كوبەيگەن, ال باعا مۇلدە وزگەرمەگەن. ەسەسىنە سۇرانىس ءوسىمى بارلىق باعىت بويىنشا تىركەلگەن: رەسەيدەن دە (+45 پايىز), قىتايدان دا (+63 پايىز), باسقا ەۋروپالىق ەلدەردەن دە.
ATI.SU مالىمەتىنشە, ءبىرىنشى توقساندا ەل ىشىندەگى تاسىمال بويىنشا ءوتىنىم سانىنىڭ 3 ەسە ارتۋىنا ەكونوميكالىق ءوسىم عانا ەمەس, لوگيستيكالىق جۇيەنىڭ قايتا قۇرىلۋى دا سەبەپ بولعان سىڭايلى.
«اۋقىمدى وزگەرىس كەزىندە كوپتەگەن كومپانيا بايىرعى سەرىكتەستەرىمەن شەكتەلمەي, جاڭا جۇك تاسىمالداۋشىلارىن ىزدەۋگە ءماجبۇر بولىپ جاتىر. زاماناۋي جاعدايدا مۇنى بيرجادا جۇزەگە اسىرۋ ءتىپتى وڭاي», دەيدى حالىقارالىق «ATI.SU جۇك تاسىمالى بيرجاسىنىڭ» قازاقستاندىق وكىلدىگىنىڭ ديرەكتورى رەناتا زوبوۆا.
جاقىن كەلەشەكتە نەگىزگى ۇردىستەر ساقتالادى. بىراق وعان جاڭالارى قوسىلۋى دا مۇمكىن ەكەن.
«رەسەيلىك باعىتقا قاراي تاسىمال ءوسىمى باياۋلايدى دەپ بولجايمىز. بىراق جاڭا پەرسپەكتيۆالى باعىتتار اشىلادى. مىسالى, پاندەميادان كەيىن شەكتەۋلەردى بىرتىندەپ الىپ تاستاپ جاتقان قىتايمەن سەرىكتەستىك كەزىندە بىرقاتار مۇمكىندىك اشىلىپ جاتىر», دەيدى ر. زوبوۆا.
