«جەڭىل ونەركاسىپ - ادام ومىرىندە ۇلكەن ماڭىزعا يە سالا. نەگە دەسەڭىز, تۇتىنۋ كولەمى جاعىنان اتالعان سەكتور ەكىنشى ورىندا كەلەدى, سونداي-اق حالىقتى جۇمىسپەن قامتيتىن الەۋمەتتىك تۇرعىدا وتە ماڭىزدى سالا سانالادى. ءبىزدىڭ الدىمىزعا رەسپۋبليكاداعى بارلىق شيكىزاتتى دايىن ونىمگە دەيىن وڭدەپ, شىعارۋ مىندەتى قويىلعان», دەدى قر يدم يندۋستريالىق دامۋ كوميتەتى توراعاسىنىڭ مىندەتىن اتقارۋشى ولجاس ساپاربەكوۆ.
2023 جىلدىڭ قاڭتار-ناۋرىز ارالىعىندا ەلىمىزدە 55,5 ملرد تەڭگە سوماسىنا جەڭىل ونەركاسىپ ءونىمى ءوندىرىلدى, بۇل بىلتىرعى كەزەڭمەن سالىستىرعاندا 37,8%-عا كوپ. سونىمەن قاتار, ءوندىرىستى ۇزدىكسىز جالعاستىرىپ كەلە جاتقان كاسىپورىننىڭ سانى 2022 جىلمەن سالىستىرعاندا 9%-عا نەمەسە 122 نىسانعا ۇلعايعانى بايقالىپ وتىر.
جەڭىل ونەركاسىپتەگى ءوندىرىس ءوسىمى ونىڭ بارلىق تۇرىندە تىركەلدى: توقىما بۇيىمدارىن ءوندىرۋ 57,6%-عا, كيىم ءوندىرىسى 11,7%-عا, بىلعارى جانە وعان قاتىستى ءونىمدى شىعارۋ 7,4%-عا ارتقان.
بۇل باعىتتا وڭىرلەر اراسىندا تۇركىستان وبلىسى (28,5%), شىمكەنت (16%) جانە الماتى قالالارى (8%) مەن اقمولا وبلىسى (5,6%) كوش باستاپ كەلەدى.
بيىل 10-شى ساۋىردە قر يندۋستريا جانە ينفراقۇرىلىمدىق دامۋ ءمينيسترىنىڭ بۇيرىعى كۇشىنە ەنىپ, سوعان سايكەس جەڭىل ونەركاسىپ بويىنشا ىسكە اسىرىلاتىن ينۆەستيتسيالىق جوبالارعا بايلانىستى 3%-دىق سىياقى مولشەرلەمەسىندە قارجىلاي قولداۋ تەتىگى قاراستىرىلعان.
3%-دىق پايىزدىق مولشەرلەمەمەن زايىمدىق اقشانى ۇسىنۋ - وتاندىق جەڭىل ونەركاسىپتى قارجىلاي تۇرعىدا قولداۋدىڭ جاڭا ءتۇرى. ونىڭ وپەراتورى «ونەركاسىپتى دامىتۋ قورى» اق سانالادى. بۇل تەتىك شاعىن جانە ورتا بيزنەستى ىنتالاندىرۋعا باعىتتالىپ, ورتا جانە جوعارى بولىنىستەگى تاۋارلاردى وندىرەتىن, سونداي-اق ىشكى نارىقتان شيكىزات ساتىپ الۋدى كوزدەيتىن كاسىپورىندارعا باسىمدىق بەرىلمەك.
ەكونوميكالىق قىزمەت تۇرلەرىنىڭ جالپى جىكتەلۋىنە سايكەس كەلەسى قىزمەت تۇرلەرىن جۇزەگە اسىراتىن كاسىپورىندار ءتيىستى قاراجاتتى الۋعا مۇمكىندىگى بار:
- توقىما بۇيىمدارىنىڭ ءوندىرىسىن جولعا قويعان (ەقجج 13-ءبولىمى);
- كيىم وندىرەتىن (ەقجج 14-ءبولىمى);
- بىلعارى جانە وعان قاتىستى ونىمدەردى شىعاراتىن كاسىپورىندار (ەقجج 15-ءبولىمى).
بۇل رەتتە ءبىر جوباعا قاراستىرىلاتىن زايىمدىق اقشانىڭ شەكتى مولشەرى – 5 ملرد تەڭگە.
