پرەزيدەنت ەكونوميكانى قايتا جانداندىرۋ بويىنشا ۇلكەن مىندەتتەر قويدى. وتاندىق ءوندىرىستى دامىتۋعا نەگىزگى باسىمدىق بەرىلۋگە ءتيىس. سونىڭ ىشىندە شەتەل ينۆەستيتسياسىن تارتۋ ماسەلەسى دە ەسكەرىلگەنى ءجون.
بىرىنشىدەن, اگروونەركاسىپ كەشەنىنىڭ ونىمدىلىگىن ارتتىرۋدىڭ ماڭىزى زور. بۇل رەتتە ءونىمدى تەك شىعارىپ قانا قويماي, ساقتاۋ قاجەت. شاعىن جانە ورتا بيزنەستى, اسىرەسە, اۋىلدى جەرلەردە دامىتۋدى ىنتالاندىرۋ ماڭىزدى. «قازاقستاندا جاسالعان» ونىمدەر باسەكەگە قابىلەتتى جانە قولجەتىمدى باعادا بولۋى كەرەك. باعا وسىمىمەن كۇرەسىپ, قازاقستاندىقتاردىڭ تابىسىن ارتتىرۋدىڭ بىردەن-ءبىر جولى وسى.
ەكىنشىدەن, مەملەكەت باسشىسى ونداعان جىلدار بويى جيناقتالعان ينفراقۇرىلىم ماسەلەلەرىن شەشۋ جانە تۇرعىن ءۇي-كوممۋنالدىق شارۋاشىلىعىن جاڭعىرتۋدى قولعا الۋدى تاپسىردى.
حالىق پەن بيزنەس ءۇشىن تاريفتەردى كوتەرىپ قانا قويماي, تۇرعىن ءۇي-كوممۋنالدىق شارۋاشىلىق سالاسىن ينۆەستورلارعا ۇزاق مەرزىمگە تارتىمدى ەتۋ ماڭىزدى. بۇل جەردە پرەزيدەنتتىڭ «ينۆەستيتسياعا ايىرباس ءتاريفى» باستاماسىنىڭ الەۋەتى مول. ينۆەستورلارعا مەملەكەتتىڭ كەپىلدىگىمەن ءادىل ءارى قولايلى جاعداي جاساۋ قاجەت. بۇل وسى سالاعا جەكە قارجى تارتۋعا جول اشادى.
دەپۋتاتتىق كورپۋس مەنشىك يەلەرى قاۋىمداستىعى ماسەلەلەرىن شەشۋ ءۇشىن كوزقاراسىن ءبىلدىرىپ, ۇسىنىسىن بەرۋگە ءتيىس. تۇرمىستىق زورلىق-زومبىلىققا قاتىستى ماسەلەلەر بويىنشا دا ءوز پايىمىمىز بار.
ۇشىنشىدەن, مەملەكەت باسشىسىنىڭ باستاماسىمەن قولعا الىنعان كونستيتۋتسيالىق رەفورمالاردىڭ ناتيجەسىندە, ءماجىلىس ەلىمىزدەگى نەگىزگى زاڭ شىعارۋشى الاڭعا اينالدى. سوندىقتان دەپۋتاتتىق كورپۋس پرەزيدەنت جۇكتەگەن مىندەتتەردىڭ بارلىعىن زاڭنامالىق تۇرعىدا قامتاماسىز ەتۋگە بۇگىننەن باستاپ كىرىسەدى.
بۇل جۇمىس كونسترۋكتيۆتى ديالوگ ارقىلى ۇكىمەتپەن, اكىمدىكتەرمەن تىعىز قارىم-قاتىناستا اتقارىلۋى كەرەك. دەپۋتاتتار وسى ۇستانىمدى تولىق قولدايدى جانە ناتيجەلى جۇمىس ىستەۋگە دايىن.
ءماجىلىس پرەزيدەنت رەفورمالارىن قوعامنىڭ بەلسەنە قاتىسۋىمەن تالقىلاۋعا ارنالعان اشىق ديالوگ الاڭى بولماق. وسىعان وراي پالاتادا اگروونەركاسىپتىك كەشەنگە جەڭىلدەتىلگەن نەسيەلەردى ءبولۋ, سونداي-اق ايەلدەر مەن بالالارعا قاتىستى زورلىق-زومبىلىققا توزبەۋشىلىك مادەنيەتىن قالىپتاستىرۋ بويىنشا ەكى بەيىندى كوميتەتتىڭ وتىرىسى وتەدى.
سونىمەن قاتار «جايلى مەكتەپ» ۇلتتىق جوباسىن جۇزەگە اسىرۋدا ەلىمىزدىڭ ۇلەستى ارتتىرۋ ماسەلەلەرى بويىنشا «Amanat» فراكتسياسىنىڭ وتىرىسى بولادى. الداعى 5 جىلدا 401 مەكتەپتىڭ قۇرىلىسىنا 2,6 تريلليون تەڭگە باعىتتالادى. بۇل جوباعا وتاندىق بيزنەس بارىنشا اتسالىسۋى قاجەت. سوندا عانا بولىنگەن قارجى ەكونوميكاعا وڭ اسەر ەتەدى.
تورتىنشىدەن, مەملەكەت باسشىسى ەلىمىزدىڭ 2025 جىلعا دەيىنگى جاڭا ۇلتتىق دامۋ جوسپارىن ازىرلەۋدى تاپسىردى. وعان ماجىلىسكە وتكەن پارتيالاردىڭ سايلاۋالدى باعدارلامالارىنداعى ەڭ ماڭىزدى تارماقتار ەنگىزىلەدى.
بۇگىندە ماجىلىستە ساياسي پارتيالاردىڭ التى فراكتسياسى, سونداي-اق ءبىر مانداتتى وكرۋگتەردەن سايلانعان 29 دەپۋتات قىزمەت اتقارادى. ولاردىڭ بارلىعى سايلاۋالدى ناۋقان كەزىندە جۇرتشىلىقپەن بەلسەنە كەزدەسىپ, حالىققا ءبىراز ۋادە بەردى. سول فراكتسيالارعا ۇلتتىق جوسپارعا ەنگىزىلەتىن ۇسىنىستاردى قازىردەن باستاپ دايىنداۋدى ۇسىندىم.
ماسەلەن, «Amanat» پارتياسىنىڭ سايلاۋالدى باعدارلاماسىندا اۋىلداعى جاس دارىگەرلەردىڭ كوتەرمە جاردەماقىسىن 10 ميلليون تەڭگەگە دەيىن ارتتىرۋ تۋرالى ۇسىنىس بولعان. بۇل – مەديتسينا قىزمەتكەرلەرىنىڭ تاپشىلىعىن جويۋعا جاسالعان يگى قادام. اۋىل تۇرعىندارىنىڭ, كاسىپكەرلىك سۋبەكتىلەرىنىڭ, جاستاردىڭ, بيۋدجەت سالاسى قىزمەتكەرلەرىنىڭ تابىسىن ارتتىرۋ, جاڭا وندىرىستەر اشۋ بويىنشا دا ءتيىستى شارالار قاراستىرىلعان. وسىنىڭ بارلىعى ۇلتتىق دامۋ جوسپارىندا كورىنىس تابادى.
مەملەكەت باسشىسى تاپسىرمالارىنىڭ ەلىمىزدىڭ ودان ءارى دامۋى, ازاماتتاردىڭ تۇرمىسىن جاقسارتۋ ءۇشىن ماڭىزى زور. بۇل – ءماجىلىس دەپۋتاتتارىنىڭ ورتاق پىكىرى.
ەندى حالىق پەن بيزنەستىڭ مۇددەسىن, ەكونوميكانىڭ مۇمكىندىكتەرىن ەسكەرە وتىرىپ, العا قويعان مىندەتتەردىڭ ناقتى ءارى ءتيىمدى ورىندالۋىن قامتاماسىز ەتۋگە ءتيىسپىز.
ەرلان قوشانوۆ,
ءماجىلىس توراعاسى
