ءىس-شارادا ءسوز العان وبلىستىق مادەنيەت, تىلدەردى دامىتۋ جانە ارحيۆ ءىسى باسقارماسىنىڭ باسشىسى سايران دۇيسەنوۆ رافحات ەلجاس ۇلىنا ساتتىلىك تىلەپ, العىس حات تابىستادى. ءوز كەزەگىندە قازاقستاننىڭ ەڭبەك سىڭىرگەن قايراتكەرى, ءانشى-كومپوزيتور دونەدىل قاجىموۆ ىزگى نيەت-تىلەگىن اقتارىپ, قادىر مىرزا ءالىنىڭ سوزىنە جازىلعان «قازاقتاردى شەتەلدىك قوناقتارعا تانىستىرۋ» ءانىن شىرقادى.
ولكەتانۋشى سارا تاناباەۆا فوتوسۋرەتشىنىڭ شىعارماشىلىعىنا از-كەم توقتالىپ وتسە, تالعات مىقي, اينابەك بيسەنعاليەۆ, ءانۋار امانجولوۆ سەكىلدى اقىندار قادىر مىرزا ءالىنىڭ ولەڭدەرىن جاتقا وقىدى.
رافحات حالەلوۆ ءوز شىعارماشىلىعى تۋرالى ايتا كەلىپ, فوتوسۋرەتتىڭ وتكەن كۇننىڭ بەلگىسى, تاريحي ساتتەردىڭ دالەلى ەكەنىن جەتكىزدى. وعان قوسا قادىر اقىن جونىندە ءبىراز ەستەلىك ايتتى.
– قادىردى ءسۇيىپ وقيتىن, ەرەكشە قۇرمەت تۇتاتىن وقىرماندار جەتەرلىك. سولار قاداۋ تۇلعانىڭ وزىمەن كەزدەسكەندەي كۇي كەشسە ەكەن دەگەن ماقساتپەن وسى كورمەنى ۇيىمداستىرۋعا بەل بۋىپ ەدىك. التىن ۋاقىتتارىڭىزدى ءبولىپ, قادىر سارايىنىڭ تورىنەن تابىلعاندارىڭىزعا مىڭ العىس. بۇل – مەنىڭ اقجايىق ءوڭىرىنىڭ اياۋلى پەرزەنتىنىڭ شىعارماشىلىعىن ناسيحاتتاۋعا قوسقان ۇلەسىم, – دەدى رافحات ەلجاس ۇلى.
قادىر اقىننىڭ سوزىنە جازىلعان «ورال – ءانىم سەنسىڭ شالقىعان», «اتامەكەن» اندەرىن ء«ىنجۋ», «BatysStar» توپتارى ورىنداپ, كورەرمەننىڭ ىستىق ىقىلاسىنا بولەندى.
– ساپالى سۋرەت ءتۇسىرۋ ءۇشىن قاعىلەزدىك, شاپشاڭدىق قاجەت. بۇل قاسيەتتەر رافحات ەلجاس ۇلىنىڭ بويىندا بار. قادىرداي الىپ تۇلعاعا وسىلايشا قۇرمەت كورسەتكەن تالانتتى فوتوسۋرەتشىگە ريزاشىلىعىمدى بىلدىرەمىن, – دەگەن قادىر مىرزا ءالى اتىنداعى مادەنيەت جانە ونەر ورتالىعىنىڭ ديرەكتورى باۋىرجان حاليوللا ءىس-شارانى قورىتىندىلاپ, رافحات ەلجاس ۇلىنا العىس حات جانە ەستەلىك سىيلىق ۇسىندى. سونىمەن قاتار فوتوكورمەنىڭ قادىرلى مەيمانى, ەڭبەك ارداگەرى مارات كەنجەتاي ۇلىنا ايتىس اقىندارى مەن جىرشى-تەرمەشىلەردىڭ حالىقارالىق وداعى باتىس قازاقستان ايماعى بويىنشا بولىمشەسىنىڭ ۇسىنىسىمەن دايىندالعان دالا رەفورماتورى, داڭقتى باتىر سىرىم دات ۇلى اتىنداعى توسبەلگىنى تابىس ەتتى.
مارلەن عيلىمحان
