مۇنىڭ باستى سەبەبى – شيكىزاتتىق تاۋارلار ەكسپورتىنا دەگەن تاۋەلدىلىك. ءبىز شيكىزاتتىق تاۋارلار ساتىلىمىنان تۇسكەن كىرىسكە تىم قاتتى تاۋەلدىمىز جانە ەكونوميكانىڭ وزگە سەكتورلارىن دامىتۋعا كوڭىل قويمادىق. ورتاشا كىرىس تۇزاعىنان قۇتىلۋ ءۇشىن قۇرىلىمدىق رەفورمالار جاساپ, ينفراقۇرىلىمدى جاقسارتىپ, ءبىلىم مەن عىلىمنىڭ دەڭگەيىن ارتتىرۋ كەرەك.
سونىمەن قاتار يننوۆاتسيا مەن ەكونوميكانىڭ جاڭا سالالارىن دامىتۋدى ىنتالاندىرۋ دا ماڭىزدى. مۇنداي تىعىرىقتان شىعۋدىڭ ۇزدىك مىسالى رەتىندە وڭتۇستىك كورەيانى ايتا الامىز. وتكەن عاسىردىڭ ورتا شەنىندە جانە سوڭىندا, كورەي سوعىسى اياقتالعاننان كەيىن وڭتۇستىك كورەيا قيراعان جانە ابدەن كەدەيلەنگەن ەل ەدى. الايدا ودان كەيىنگى ونجىلدىقتا ايتارلىقتاي ەكونوميكالىق ءوسىم مەن ترانسفورماتسياعا قول جەتكىزدى. سينگاپۋر دا مۇنداي تۇزاقتان سىتىلىپ شىعۋدىڭ تاماشا ۇلگىسىن كورسەتتى. 60-جىلدارى, مالايزيادان تاۋەلسىزدىك العاننان كەيىن ولار اسا قيىن ەكونوميكالىق جانە الەۋمەتتىك تاۋەكەلدەرمەن بەتپە-بەت كەلگەن ەدى.
ءبىز ەكونوميكانى ارتاراپتاندىرۋعا تىرىسىپ جاتىرمىز, بىراق سونىڭ ۇلەسى وتە تومەن. نارىقتىق ەكونوميكا جاعدايىندا ۇكىمەت ءوزى زاۋىت اشىپ, ەلەكتر ستانسالارىن تۇرعىزىپ, بيزنەس جاساي المايدى. بيلىك تەك ويىننىڭ اشىق ەرەجەسىن جاساپ بەرە الادى. ودان كەيىن ينۆەستور تارتىپ, وعان جوبا مەن كەپىلدىك بەرۋ كەرەك. ينۆەستيتسيا مەن بيزنەس ءۇشىن جايلى ورتا قالىپتاستىرۋدا وتاندىق بانكتەردى تارتۋ دا ماڭىزدى. ەلىمىزدەگى بانكتەر نەسيە بەرۋگە قارسى بولمايدى. دەگەنمەن بۇل ۇدەرىستى تەجەپ تۇرعان فاكتورلار بار. سونىڭ العاشقىسى – 16,75 پايىز دەڭگەيىندەگى بازالىق مولشەرلەمە. دەمەك, وسى ستاۆكادان تومەن پايىزبەن كرەديت بەرىلمەيدى. ياعني بيزنەسكە نەسيە كەم دەگەندە 20-22 پايىزبەن بەرىلەدى. ونداي پايىزبەن زايم راسىمدەۋگە كاسىپكەرلەر دايىن ەمەس. بانكتەردى دە تۇسىنۋگە بولادى. ەگەر ولار بازالىق ستاۆكادان تومەن نە سونىمەن دەڭگەيلەس پايىزبەن نەسيە ۇسىنسا, وندا ءوز شىعىنىن جابا المايدى, ول تۇرماق قىزمەتكەرلەرىنە جالاقى تولەي الماي قالادى.
