ىشكى ىستەر مينيسترلىگىنىڭ مالىمەتىنشە, 18 ساۋىردە الماتى قالاسى اۋەجايىنداعى جەلىلىك پوليتسيا بولىمىنە Lufthansa اۋەكومپانياسىنىڭ «فرانكفۋرت – الماتى» باعىتىنداعى رەيسىمەن كەلگەن 43 جاستاعى گەرمانيا ازاماتى شاعىمدانعان. ول ءوزىن اۋەجايدان قوناقۇيگە جوعارى باعامەن, ياعني 45 مىڭ تەڭگەگە جەتكىزگەن تاكسي جۇرگىزۋشىسىنە قاتىستى شارا قولدانۋدى سۇراعان.
كولىك پوليتسەيلەرى جەدەل-ىزدەستىرۋ ءىس-شارالارىن جۇرگىزۋ بارىسىندا تاكسي جۇرگىزۋشىسىن انىقتادى. ول الماتىنىڭ 45 جاستاعى تۇرعىنى بولىپ شىقتى. ەر ادام گەرمانيا ازاماتىنا تاكسي قىزمەتىن ۇسىنىپ, الماتى قالاسىنىڭ حالىقارالىق اۋەجايىنان قالاداعى قوناەۆ كوشەسىندە ورنالاسقان قوناقۇيگە اپارعانى ءۇشىن جوعارى تولەم العان.
تاكسي جۇرگىزۋشىسى كەلتىرگەن شىعىندى وتەدى. قۇقىق بۇزۋشى قر اقبتك-ءنىڭ 449-بابىنىڭ 1-بولىگى (قوعامدىق ورىنداردا ءتيىسۋ) بويىنشا اكىمشىلىك جاۋاپكەرشىلىككە تارتىلدى.
گەرمانيا ازاماتى كولىك پوليتسەيلەرىنە جوعارى كاسىبيلىك تانىتقاندارى جانە قاراجاتىن كەرى قايتارىپ الۋعا كومەكتەسكەندەرى ءۇشىن العىس ايتتى.
