وقيعا اقش-تىڭ مايامي قالاسىندا بولعان. جەرگىلىكتى ءۇش ادامنان قۇرالعان توپ ولجاس قانىبەككە تاپانشا كەزەپ, سومكەسىن تارتىپ الماقشى بولعان. ولجاستىڭ ايتۋىنشا, سومكەسىندە قۇجاتتارى, تەلەفونى مەن اقشاسى بار ەكەن. ول بۇزاقىلاردىڭ بىرىنە قۋىپ جەتىپ, قارۋىن تارتىپ العان. قاراقشىنىڭ ەكى دوسى ونى بوساتۋ ءۇشىن قايتا ورالعان ەكەن. قارۋلى قاراقشىلار وعان شابۋىل جاساعان. الايدا ولجاس قارسىلىق كورسەتىپ, ولاردىڭ دا قارۋلارىن تارتىپ العان. كەيىن قاراقشىلار وقيعا ورنىنان ءىزىن سۋىتقان.
كوپ ۇزاماي وقيعا ورنىنا پوليتسەيلەر كەلەدى. قاراقشىلاردى ىزدەۋگە 6 پوليتسيا كولىگى مەن تىكۇشاق شىققان. «بەتىمە تاپانشا تاقاعاندا قورقىپ كەتتىم. بىراق قاراقشىلارعا سىر الدىرعان جوقپىن. كەلگەن پوليتسيا قىزمەتكەرلەرى دە «نە دەگەن جۇرەگىنىڭ تۇگى بار جىگىتسىڭ» دەپ تاڭعالىپ جاتىر», دەيدى ولجاس قانىبەك.
وقيعا ورنىنا پسيحولوگتەر مەن دارىگەر دە كەلىپ, ولجاستىڭ جاعدايىن تەكسەرىپتى. سونداي-اق كيىمدەرىن دنق ساراپتاماسىنا تەكسەرۋگە جىبەرگەن. «قازاق جىگىتى قاراقشىلاردان تاپانشا پەن اۆتوماتتى تارتىپ العان, وزدەرىن ۇرىپ-سوققان, ءبىرىنىڭ ءتىسىن سىندىرعان. مۇندايدى اقش-تا بۇعان دەيىن ەشكىم كورمەگەن», دەيدى پوليتسەيلەردىڭ ءبىرى.
ولجاستىڭ ايتۋىنشا, وقىس جاعداي كۇتپەگەن جەردەن بولعان. ول جارناما بولىمىنە بارىپ, تەلەفونىنداعى ارنايى قوسىمشانى جاڭارتپاق بولعان ەكەن. الايدا ونى تاپانشامەن ءۇش جىگىت كۇتىپ العان.
ەلىمىزدىڭ اقش-تاعى كونسۋلدىعى ولجاسپەن بايلانىسقا شىققان. ء«بىزدىڭ كونسۋل قازاقستان ازاماتىن تاۋىپ, ونىمەن جانە جەرگىلىكتى قۇقىق قورعاۋ ورگاندارىمەن بايلانىستى. توبەلەس بارىسىندا كىشىگىرىم جاراقات العانىنا قاراماستان, ولجاس ەم قابىلداۋدان باس تارتتى. ونىڭ دەنساۋلىعىنا ەش قاۋىپ جوق. امان-ەسەن», دەدى ءسىم رەسمي وكىلى ايبەك سمادياروۆ.
ءسىم مالىمەتى بويىنشا ولجاس قانىبەك اقش-قا 2 ايلىق وقۋعا بارعان. ول لاتۆيادا اەروناۆيگاتسيا ينستيتۋتىندا وقىعان. ماماندىعى – اۆياديسپەتچەر. كەزىندە بوكسپەن دە اينالىسقان ەكەن. 24 جاستاعى وتانداسىمىز – كەنتاۋ قالاسىنىڭ تۋماسى. «بۇرىن مۇناي-گاز سالاسىندا جۇمىس ىستەدىم. كەيىنگى ۋاقىتتا اۆياتسيا سالاسىندا وقىپ ءجۇرمىن. «قازاەروناۆيگاتسيا» كومپانياسى ۇشۋدى پراكتيكالىق تۇردە ۇيرەنۋ ءۇشىن اقش-قا وقۋعا جىبەردى. قازىر مايامي قالاسىندامىن», دەيدى ولجاس قانىبەك.
