جىل باستالعالى ءبىر عانا الماتى اۋدانىندا 29 اۆتوكولىك ءورتى تىركەلدى. بۇل وتكەن جىلدىڭ سايكەس كەزەڭىمەن سالىستىرعاندا 2,6 ەسە ارتىق, بىلتىر 11 ءورت وقيعاسى تىركەلگەن. توتەنشە جاعدايلار قىزمەتىنىڭ ماماندارى كوبىنە اقاۋى بار جەڭىل اۆتوكولىكتەر ورتەنەتىنىن ايتادى. «مۇنداي كەزدە كولىك ىشىندە ءورت ءسوندىرۋ قۇرالى بولماسا, قىزىل جالىندى دەر كەزىندە اۋىزدىقتاۋ قيىنعا سوعادى», دەيدى قۇتقارۋشىلار. ال رەيدكە شىققان قۇتقارۋشىلار اۆتوكولىك يەلەرىنە ءورت قاۋىپسىزدىگى ەرەجەلەرىن ساقتاۋ بويىنشا اقپارات بەرىپ, ەسكەرتۋ جاسادى.
«جۇرگىزۋشىلەر باقىلاۋ-ولشەۋ اسپاپتارىن ۇنەمى باقىلاپ وتىرۋعا ءتيىس, ەگەر قۇرىلعىلار كەنەتتەن جۇمىسىن توقتاتسا نەمەسە تۇراقسىز جۇمىس ىستەسە, كولىكتى توقتاتىپ, قوزعالتقىشتى ءوشىرۋ قاجەت. قوزعالتقىش بولىگىن اشىپ, كىلتيپاننىڭ سەبەبىن انىقتاپ الۋ كەرەك. مۇمكىن بولسا, باتارەيانىڭ نولدىك تەرمينالىن اجىراتىپ, قوزعالتقىش بولىگىنىڭ بالقىعان نەمەسە تۇيىقتالعان سىمداردا كورىنۋى مۇمكىن اقاۋلارعا نازار سالعان ءجون», دەدى الماتى اۋدانى تجب باس مامانى, ازاماتتىق قورعاۋ مايورى ەرنۇر رايىمبەكوۆ.
سونىمەن قاتار باس مامان ءورت بولعان جاعدايدا بىردەن «101», «112» تەلەفون نومىرلەرىنە حابار بەرۋ كەرەكتىگىن ەسكەرتەدى. ال قۇتقارۋشىلار كەلەم دەگەنشە جالىندى ءورت سوندىرگىشتىڭ كومەگىمەن, ول بولماعان جاعدايدا تىعىز ماتامەن, توپىراقپەن, قۇممەن وشىرۋگە تىرىسۋ قاجەت.
«كاپوت استىنداعى تۇتانۋدى ءسوندىرۋ كەزىندە بىرتىندەپ جانە ابايلاپ ونى تاياقپەن, مونتاجبەن, بۇيىردەن اشىڭىز, سەبەبى كاپوت كۇرت اشىلعان كەزدە جالىن شىعۋى مۇمكىن جانە ءورت سوندىرگىشتى نەعۇرلىم قارقىندى جانۋ وشاعىنا باعىتتاڭىز نەمەسە جالىندى برەزەنتپەن جابىڭىز, قۇم, بورپىلداق توپىراق, قار تاستاڭىز, سۋ قۇيىڭىز. ەگەر ءوزىڭىز سوندىرە الماساڭىز, وندا اۆتوكولىكتەن الشاق كەتۋ قاجەت, ويتكەنى ءورت جانارماي قۇيىلعان باگقا دەيىن جەتىپ, جارىلىس بولۋى مۇمكىن», دەپ ەسكەرتەدى ازاماتتىق قورعاۋ مايورى ەرنۇر رايىمبەكوۆ.
