جۋىردا وڭىردەگى الەۋمەتتىك قورعاۋ جانە حالىقتى جۇمىسپەن قامتۋ سالاسىنداعى سىبايلاس جەمقورلىق تاۋەكەلدەرىنە سىرتقى تالداۋ قورىتىندىلارى جاريا ەتىلدى. وبلىستىق سىبايلاس جەمقورلىققا قارسى ءىس-قيمىل دەپارتامەنتىنىڭ باسشىسى دارحان قۇراقباەۆ اتاپ وتكەندەي, تىركەلگەن زاڭ بۇزۋشىلىقتاردىڭ سانى 30-دان اسقان. ولاردىڭ قاتارىندا بيزنەستى دامىتۋعا باعىتتالعان مەملەكەتتىك گرانتتاردى ۇلەستىرۋگە قاتىستى جوبالار دا بار. قازىنادان بولىنگەن گرانت قاراجاتتارىن ۇلەستىرۋدە جوبانى جۇزەگە اسىرۋشىلار «بارماق باستى, كوز قىستى» ارەكەتتەرگە بارعان. گرانت قاراجاتتارىن ءۇشىنشى تۇلعاعا اۋدارۋ, جوباعا قاتىسۋشىعا گرانتتىڭ ەكى رەت بەرىلۋى, سونداي-اق تۇراقتى ەڭبەك ورنى بار ازاماتقا راسىمدەلۋى سياقتى زاڭ بۇزۋشىلىقتار تىركەلدى. مۇنداي كەمشىلىككە جول بەرگەن بەس ادام تارتىپتىك جازاعا تارتىلسا, تاعى ەكەۋى لاۋازىمىنان بوساتىلدى. تاعى 20 زاڭ بۇزۋشىلىق الەۋمەتتىك جۇمىس ورىندارى مەن قوعامدىق جۇمىس ورىندارىن قۇرۋعا قاتىستى ەكەن. ونىڭ 14-ءى بويىنشا جەمقورلىق ارەكەتتەرى دالەلدەنىپ, جۇمىسپەن قامتۋ ورتالىقتارىنىڭ سەگىز قىزمەتكەرى جازالانسا, ءتورت ادام جۇمىستان قۋىلدى.
«ەكىباستۇزدا ورەسكەل زاڭ بۇزۋشىلىقتى تىركەدىك. الدەبىر ەر ازامات جۇمىسپەن قامتۋ ورتالىعى ارقىلى جەرگىلىكتى شارۋا قوجالىعىنا جۇمىسقا تىركەلىپ قويىپتى. الايدا جۇمىس ۋاقىتىندا ناقتى تۇردە ول جەردە بولماعان, ءتىپتى ەل اۋماعىنان تىس جەردە تۇرىپ جاتقان. سايكەسىنشە ول ادامنىڭ فەرمادا جۇمىس ىستەۋ مۇمكىندىگى جوق ەدى. ال مەملەكەتتەن اي سايىن الەۋمەتتىك جۇمىس ورنى ءۇشىن ءتيىستى قاراجات قوجالىققا اۋدارىلىپ كەلگەن. تەكسەرۋ ءىس-شارالارىنىڭ ناتيجەسىندە جۇمىس بەرۋشى زاڭسىز يەلەنگەن 420 مىڭ تەڭگەنى قازىناعا قايتاردى», دەيدى د.قۇراقباەۆ.
بۇدان بولەك, پاۆلودار مەن ەكىباستۇز قالالارىندا جانە جەلەزين اۋدانىندا سۋبسيديالاناتىن جۇمىس ورىندارىنا تۇرعان ازاماتتار ناقتى جۇمىس ورىندارىنا مۇلدە بارماعانى ايقىندالدى. ەكى قالاداعى جۇمىس بەرۋشىلەر مەملەكەتكە جالپى سوماسى ءبىر ميلليون تەڭدەگەن استام زالال كەلتىرگەن.
«قازاننان قاقپاق كەتسە, يتتەن ۇيات كەتەدى» دەمەكشى, ەكىباستۇز قالاسىنىڭ بيلىگى وتكەن قىستا قالاداعى توتەنشە جاعداي زاردابىمەن كۇرەسىپ جۇرگەندە جەرگىلىكتى بىرقاتار شەندى وزدەرىنىڭ ارام نيەتتەرىن جۇزەگە اسىرىپ جىبەرگەن. شاھارداعى مەملەكەتتىك مەكەمەلەردىڭ وكىلدەرى قونىس اۋدارۋشىلارعا تيەسىلى 15 پاتەردى وزگەلەرگە تاراتىپ بەرگەن. ولاردىڭ زاڭسىز ارەكەتىن جەمقورلىققا قارسى اگەنتتىك وكىلدەرى اشكەرەلەدى. باسپانا ءبولۋ جونىندەگى ارنايى كوميسسيانىڭ قۇرامىندا جۇمىسپەن قامتۋ جانە الەۋمەتتىك باعدارلامالار ءبولىمىنىڭ ماماندارى عانا بولعان. قوعامدىق ۇيىم وكىلدەرىن مۇلدە كىرگىزبەگەن. ال پاتەرلەردى ءبولۋ بويىنشا شەشىم قابىلداۋ كەزىندە زالداعى بەينەكامەرانى ءسوندىرىپ قويىپتى. پاتەر بەرىلگەن الگى ادامداردىڭ مەملەكەتتىك باعدارلاما جەڭىلدىگىن پايدالاناتىنداي ەش قۇقىعى بولماعان. بەلگىلى بولعانداي, بۇل پاتەرلەر جۇمىسپەن قامتۋ ورتالىعىنىڭ قىزمەتكەرلەرىنە, تۋىستارىنا نەمەسە تانىستارىنا بەرىلگەن.
سىبايلاس جەمقورلىققا قارسى ءىس-قيمىل اگەنتتىگىنىڭ وكىلدەرى تۇرعىن ءۇي ءبولۋ جونىندەگى وتىرىستاردىڭ قۇرامى مەن ءتارتىبىن وزگەرتۋدى, حالىقتى جۇمىسپەن قامتۋ ورتالىعىمەن بىرلەسىپ, زاڭسىز بەرىلگەن پاتەرلەر بويىنشا كەلىسىمشارتتاردى بۇزۋدى ۇسىندى. تەك وسى ءبىر زاڭسىزدىقتان مەملەكەتكە 75 ملن تەڭگەنىڭ ماتەريالدىق شىعىنى كەلگەن.
پاۆلودار وبلىسى
