مۇنداي مۋزەيدىڭ ارتىقشىلىعى – ەكسپوناتتاردى ءار قىرىنان جاقىنداتىپ نەمەسە الىستاتىپ كورۋگە مۇمكىندىك بەرەدى. ۆيرتۋالدى مۋزەي تاريحي ەسكەرتكىشتەردىڭ ۇزاعىراق ساقتالۋىنا سەپتىگىن تيگىزەدى ءارى قوناقتارعا ءتيىمدى. نەگە دەسەك, كەز كەلگەن ازامات ۆيرتۋالدى مۇراجايدان ەكسپوناتتاردى تەز ءارى انىق كورە الادى. وسىعان قاراپ-اق ۆيرتۋالدى مۇراجاي ەرەكشە قابىلەتتى جاندارعا قولايلى ەكەنىن بىلۋگە بولادى.
جۋىردا مادەنيەت جانە سپورت مينيسترلىگى مەن ورتالىق مەملەكەتتىك مۋزەي ماماندارى ۇيىمداستىرعان « ۇلى دالانىڭ ۇلتتىق داستۇرلەرى» حالىقارالىق عىلىمي فورۋمىندا Kazakh Tourism ۇلتتىق كومپانياسى مەتا-ۆيرتۋالدى مۋزەي جوباسىنىڭ يدەياسىن ۇسىندى. جوبانى IT جانە CGI تسيفرلىق انيماتسيا تەحنولوگياسى سالاسىندا جۇمىس ىستەيتىن «Sifro» كومپانياسىمەن بىرلەسىپ ىسكە اسىرىپ جاتىر. بىرەگەي مۋزەيدىڭ جوباسى «قازاقستاننىڭ ماتەريالدىق ەمەس مادەني مۇراسى: جاڭا ادىستەر مەن قاعيداتتار» سەكتسياسىندا ۇسىنىلدى. سەكتسيا بارىسىندا Kazakh Tourism كرەاتيۆتى يندۋستريالار دەپارتامەنتىنىڭ جوبا جەتەكشىسى اسەل سەرىكباەۆا ۆيرتۋالدى مۋزەيدىڭ مۇمكىندىگى جايىندا ايتىپ بەرگەن ەدى.
– مەتا-ۆيرتۋالدى مۋزەيى – بۇل ۆيرتۋالدى شىندىق, ينتەراكتيۆتى تەحنولوگيالار جانە الەمنىڭ كەز كەلگەن جەرىندە قولجەتىمدى مۇراجاي كەشەنىن قۇرۋعا ارنالعان قۇرال. كادىمگى مۋزەيلەردىڭ ورنالاسقان اۋماعىنا جانە ەكسپوناتتاردىڭ سانىنا قاراي شەكتەۋلەر بولسا, مەتا-ۆيرتۋالدى مۋزەيدىڭ مۇمكىندىگى مول. وندا بارلىق ەكسپوناتتىڭ ساندىق كوشىرمەلەرى, سونداي-اق ۆيرتۋالدى كورمەلەر مەن ەكسپوزيتسيالار بولۋى مۇمكىن», – دەيدى ءا.سەرىكباەۆا.
وسى فورۋمعا عىلىمي ۇيىمداردىڭ قىزمەتكەرلەرى, مۇعالىمدەر, شىعارماشىلىققا دەن قويعان زيالى قاۋىم, مۋزەي, ارحيۆ, كىتاپحانا ماماندارى, جاس عالىم, تۇركى الەمىنىڭ تاريحى مەن مادەنيەتىن زەرتتەيتىن ستۋدەنتتەر, ماگيسترانتتار مەن دوكتورانتتار جانە باسقا دا مۇددەلى تۇلعالار قاتىسقان. فورۋم سوڭىندا مادەنيەت جانە سپورت مينيسترلىگى كرەاتيۆتى يندۋستريالاردى دامىتۋعا جاۋاپتى ۋاكىلەتتى ورگان بولىپ بەلگىلەنسە, Kazakh Tourism-دە كرەاتيۆتى تۋريزم دەپارتامەنتى اشىلعانىن بىلدىك. دەمەك, ەلدە كرەاتيۆتى سەكتوردى دامىتۋعا, كرەاتيۆتى كاسىپكەرلەردىڭ ونىمدەرىن ەكسپورتقا شىعارۋعا باسىمدىق بەرىلەدى.
