ەلەنا رىباكينا 1999 جىلدىڭ 17 ماۋسىمىندا ماسكەۋدە دۇنيەگە كەلدى. بالاۋسا شاعىنان تەننيستى سەرىك ەتىپ, ءتۇرلى تۋرنيرلەرگە قاتىستى. شەبەرلىگى شىڭدالا كەلە جاقسى ناتيجەلەر كورسەتە باستادى. الايدا ونىڭ سپورتتىق بولاشاعىنا سەنىمسىزدىكپەن قاراعان رەسەي تەننيس فەدەراتسياسى تاراپىنان قاجەتتى قولداۋ كورسەتىلمەگەندىكتەن, رىباكينا 2018 جىلى قازاقستانعا قونىس اۋدارىپ, ءبىزدىڭ ەلىمىزدىڭ ازاماتتىعىن الۋدى قۇپ كوردى. ول كەزدە جاسى 19-عا دا تولماعان بويجەتكەن توپ-200 ويىنشىنىڭ قاتارىندا دا جوق ەدى. ال قازاقستاننىڭ تۋى استىندا ونەر كورسەتكەن كەزدەن بەرى ەلەنا ەلەۋلى تابىستارعا قول جەتكىزە باستادى. بىلتىر ول ۋيمبلدوندا الدىنا جان سالماي, جارىس جەڭىمپازى اتاندى. بۇل – بىزدەر ءۇشىن تاريحي ءسات! ويتكەنى وعان دەيىن قازاقستاننىڭ بىردە-ءبىر تەننيسشىسى «ۇلكەن دۋلىعا» ساناتىنداعى تۋرنيرلەردىڭ جەكەلەگەن سايىسىندا توپ جارعان جوق. باس جۇلدەنى ولجالاۋ بىلاي تۇرسىن, ءتىپتى جارتىلاي فينالدىق مەجەگە دە ەشكىم جەتە الماعان-تىن. سول ولقىلىقتىڭ ورنىن ەلەنا رىباكينا تولتىرا باستادى.
بيىلعى ماۋسىم دا رىباكينا ءۇشىن اسا تابىستى ءوتىپ جاتىر دەۋگە بولادى. جىلدىڭ باسىندا ول مەلبۋرندە وتكەن اۋستراليانىڭ اشىق بىرىنشىلىگىندە نەبىر اتاقتى تەننيسشىلەردى جولىنان ىعىستىرىپ, وسى دودانىڭ اقتىق سىنىنا دەيىن القىنباي جەتتى. ءتىپتى الەمنىڭ ءبىرىنشى راكەتكاسى, پولشالىق يگا شۆەنتەكتىڭ ءوزى ەلەنانىڭ ەكپىنىنە شىداي المادى. بىراق شەشۋشى تۇستا ول بەلورۋسسيالىق ارينا سوبولەنكودان ۇتىلدى.
ناۋرىز ايىندا وتانداسىمىز ينديان-ۋەللستەگى اسا ءىرى حالىقارالىق تۋرنيردە توپ جاردى. اتالعان جارىستا ول شۆەنتەكتى قايتادان سان سوقتىرىپ, سوبولەنكودان ەسەسىن دە قايتاردى. ىلە-شالا ماياميدەگى تاعى ءبىر اسا ءدۇبىرلى WTA دوداسىندا فينالعا دەيىن جەتتى. ول جەردە دە ءبىراز ولجاعا كەنەلدى. ءسوز ورايى كەلگەندە, ەلەنا رىباكينا سول جارىستاردا العان سىياقىلارىنىڭ ءبىراز بولىگىن قازاقستاننىڭ جاس تەننيسشىلەرىنە ستيپەنديا رەتىندە تاراتىپ بەرگەنىن دە ايتا كەتكەن ابزال.
بۇل كۇندەرى رىباكينا گەرمانيانىڭ شتۋتگارت قالاسىندا شىمىلدىعى تۇرىلگەن WTA 500 جارىسىنا قاتىسىپ جاتىر. جۇلدە قورى 780 637 ەۋرونى قۇرايتىن ءتۋرنيردىڭ تۇساۋكەسەر كەزدەسۋىندە, ياعني كەشە كەشكىسىن ەلەنا جەرگىلىكتى تەننيسشى يۋلە نيمايەرمەن شەبەرلىك بايقاستى.
قازىرگى كەزدە ەلەنا رىباكينا الەمنىڭ جەتىنشى راكەتكاسى اتانىپ وتىر. وسى كۇنگە دەيىن قازاقستاننىڭ بىردە-ءبىر تەننيسشىسى وسىنداي دارەجەگە جەتكەن ەمەس. بىراق جەرلەسىمىزدىڭ بۇل مەجەنى قاناعات تۇتپايتىنى انىق. 23 جاستاعى تەننيسشى باسقا دا مارتەبەلى جارىستاردا تابىستى ونەر كورسەتىپ, تورتكۇل دۇنيەنىڭ تەڭدەسسىزى, ياعني ءبىرىنشى راكەتكاسى اتانۋدى كوزدەيدى. وعان ونىڭ قارىم-قابىلەتى جەتەدى. ءبىز جەرلەسىمىزدىڭ جۇلدىزدى ساتتەرى ءالى الدا دەپ بىلەمىز.
