اۋعانستانعا 5 403 توننالىق نەگىزگى گۋمانيتارلىق جۇك تەمىرجول ارقىلى جەتكىزىلدى. 81 ۆاگونعا نەگىزىنەن ازىق-ت ۇلىك ونىمدەرى, اتاپ ايتقاندا, ءسۇت كونسەرۆىلەرى, وسىمدىك مايى, ۇن, قاراقۇمىق جارماسى تيەلدى.
– ءبىز پرەزيدەنتتىڭ تاپسىرماسىمەن قازاقستاننىڭ اۋعان حالقىنا گۋمانيتارلىق كومەگىن جەتكىزۋ ءۇشىن اۋعانستانعا ارنايى كەلدىك. حالىقارالىق قوعامداستىق, ونىڭ ىشىندە قازاقستان دا اۋعان حالقىن قيىن جاعدايدا كومەكسىز قالدىرا المايدى. ءبىزدىڭ گۋمانيتارلىق ميسسيامىزدىڭ قاسيەتتى رامازان ايىندا ءوتىپ جاتقانى وعان ەرەكشە سيپات بەرەدى. قاسيەتتى ايدا بارلىعىڭىزعا بەيبىت ءومىر مەن سابىر تىلەيمىن, – دەدى پرەمەر-ءمينيستردىڭ ورىنباسارى.
جۇمىس ساپارى كەزىندە سەرىك جۇمانعارين اۋعانستاننىڭ ساۋدا جانە ونەركاسىپ ءمينيسترىنىڭ مىندەتىن اتقارۋشى نۇريددين ازيزيمەن, ۆيتسە-پرەمەر ابدۋل عاني بارادارمەن, سىرتقى ىستەر ءمينيسترى ءامىر حان مۋتتاكيمەن, بايلانىس جانە تەلەكوممۋنيكاتسيا ءمينيسترى نادجيبۋللا حاككانيمەن كەزدەستى.
– قازاقستان – اۋعانستانمەن ءوزىنىڭ ديپلوماتيالىق قارىم-قاتىناسىن ساقتاي وتىرىپ, كورشىلەس ەلدەرمەن بەيبىت بايلانىسىن قولدايتىن تۇراقتى جانە گۇلدەنگەن مەملەكەت رەتىندە كورگىسى كەلەتىن ساناۋلى ەلدەردىڭ ءبىرى. ءبىز قالىپتاسقان ساۋدا-ەكونوميكالىق, كولىك-لوگيستيكالىق جانە ەنەرگەتيكالىق بايلانىستاردى ودان ءارى دامىتۋعا مۇددەلىمىز. پرەمەر-ءمينيستردىڭ ساۋدا جونىندەگى ورىنباسارى رەتىندە ەلدەرىمىزدىڭ ساۋدا سالاسىنداعى جانە وڭىرلىك اۋقىمداعى ىنتىماقتاستىقتى دامىتۋ ءۇشىن زور الەۋەتى بار ەكەنىنە سەنىمدىمىن. ءبىز ساۋدا-ەكونوميكالىق سالاداعى, ونىڭ ىشىندە گۋمانيتارلىق كومەك ارقىلى ىنتىماقتاستىقتى دامىتۋ جۇمىستارىن جالعاستاتىرا دايىنبىز. قازاقستاننىڭ اۋعانستانعا ەكسپورتتىق الەۋەتى ازىق-ت ۇلىك, مۇناي-حيميا, حيميا, مەتاللۋرگيا, جەڭىل, ماشينا جاساۋ, قۇرىلىس جانە باسقا سالالاردا 174 ملن دوللارىن قۇرايتىن 46 تاۋار تۇرىنەن تۇرادى. بۇل تاۋارلاردى ەكىجاقتى ساۋدا اينالىمىنا قوسۋ ەكى ەلگە دە ءتيىمدى بولادى دەپ سانايمىن, – دەدى سەرىك جۇمانعارين.
ستاتيستيكالىق مالىمەت كەلتىرە كەتسەك, وسى جىلدىڭ قاڭتار-اقپان ايلارىندا ەكى ەل اراسىنداعى تاۋار اينالىمى 2 282,6 ملن دوللارعا جەتتى. بۇل وتكەن جىلدىڭ سايكەس كەزەڭىمەن سالىستىرعاندا 94,6%-عا جوعارى (145,2 ملن دوللار). قازاقستاننان اۋعانستانعا ەكسپورت 95 پايىزعا ءوسىپ, 281,5 ملن دوللاردى, ال اۋعانستاننان قازاقستانعا يمپورت كولەمى 28,3 پايىزعا ءوسىپ, 1,1 ملن دوللاردى قۇرادى.
تاليبان بيلىگى ەلىمىزدىڭ ۇكىمەت مۇشەلەرىن قابىلداي وتىرىپ, كابۋلدا قازاق-اۋعان بيزنەس-فورۋمىن ۇيىمداستىردى. وعان قازاقستاننىڭ تاماق ونەركاسىبى سالاسىنداعى 18 ەكسپورتتاۋشى كاسىپورىن قاتىستى. ولار ۇن, ماكارون, كونديتەرلىك جانە ءسۇت ونىمدەرىن, سۋسىندارىن ۇسىندى. بيزنەس-فورۋمدا كاسىپكەرلەر اۋعانستانعا جالپى سوماسى 4 ملن دوللاردى قۇرايتىن ۇن جەتكىزۋگە كەلىسىم جاساستى.
سونداي-اق اۋعانستاننىڭ گەرات قالاسىندا قازاقستان ساۋدا ءۇيى اشىلاتىن بولدى. ساۋدا ءۇيى ەكى ەل اراسىنداعى ساۋدا-ەكونوميكالىق قاتىناستاردى جانداندىرۋعا, تاۋار اينالىمىن ۇلعايتۋعا, ساۋدا-ەكونوميكالىق, تەلەكوممۋنيكاتسيالىق, كولىك جانە لوگيستيكالىق بايلانىستاردى دامىتۋعا, ايماق ەلدەرىمەن ساۋدا جاساۋ ءۇشىن اۋعانستاننىڭ ترانزيتتىك جانە شەكارا ماڭىنداعى الەۋەتىن پايدالانۋعا, قازاقستان ەكونوميكاسىنا ينۆەستيتسيالار تارتۋعا كومەك بەرەدى. جالپى العاندا قازاقستاننىڭ ساۋدا ءۇيى قازاقستان مەن اۋعانستانداعى «B2B» فورماتىنداعى ءىس-شارالار ۇيىمداستىرۋدى قولعا الادى.
ال اۋعانستان پرەمەر-ءمينيسترىنىڭ ەكونوميكا ماسەلەلەرى جونىندەگى ورىنباسارى ابدۋل عاني بارادار سەرىك جۇمانعارين باستاعان دەلەگاتسيامەن كەزدەسۋ كەزىندە ەكىجاقتى قارىم-قاتىناستاردى نىعايتۋ ءۇشىن ەلىمىزدە جاڭا اۋعان ديپلوماتتارىن قابىلداۋدى سۇرادى.
– اۋعانستان تاراپى قازاقستانعا گۋمانيتارلىق كومەك كورسەتكەنى ءۇشىن العىس بىلدىرەدى. ءبىز ارقاشان جىلى قارىم-قاتىناس پەن تىعىز ىنتىماقتاستىقتى ساقتاپ كەلە جاتقان ەلدەرمىز. سونداي-اق اۋعانستاندا ورتالىق ۇكىمەت قۇرىلىپ, قاۋىپسىزدىك ساقتاۋ قامتاماسىز ەتىلگەلى تەمىرجول جەلىلەرىن دامىتۋ سەكىلدى ءىرى جوبالارعا ينۆەستيتسيا سالۋعا مۇمكىندىك اشىلدى, – دەدى ابدۋل عاني بارادار.
ءوز كەزەگىندە سەرىك جۇمانعارين مۇنداي بايلانىستاردى نىعايتۋ ءۇشىن جاقىن ارادا ەلىمىز اۋعان ديپلوماتتارىن قابىلدايتىنىن ايتتى. نەگىزى قازاقستاننىڭ ۇكىمەت مۇشەلەرى اۋعانستانعا ىسكەرلىك بايلانىستار ورناتۋ, ىسكەرلىك ماسەلەلەردى جىلدام شەشۋ ءۇشىن كوماندالار قۇرۋ, اۋعاندىق كاسىپكەرلەردىڭ ۆيزا الۋلارىنا, ەكى ەلدە بانك بولىمشەلەرىن اشۋ جانە اۋعانستاننىڭ «Afgan Trans» سەكىلدى ماڭىزدى جوباسى بويىنشا ىنتىماقتاستىقتى تالقىلاۋ ماقساتىندا رەسمي ساپار جاسادى.
