– ۇلتتىق ۋنيۆەرسيتەتتىڭ تاريحى تەرەڭدە جاتىر. وقۋ ورداسى العاش اكادەميالىق قالاشىق مودەلىمەن سالىنعان بولاتىن. 1974-1975 جىلداردان كەيىن ۋنيۆەرسيتەتكە كەڭ كولەمدە ينۆەستيتسيا قۇيىلماعان. سوندىقتان بۇل جولعى قادامنىڭ ماڭىزى وتە جوعارى. جوسپارعا مەملەكەت باسشىسىنىڭ ءوزى قولداۋ ءبىلدىرىپ وتىر. قارا شاڭىراقتىڭ ەكىنشى تىنىسى اشىلدى دەۋگە بولادى, – دەدى ەستەلىك كاپسۋلانى ورناتۋ ءىس-شاراسىنا قاتىسقان عىلىم جانە جوعارى ءبىلىم ءمينيسترى ساياسات نۇربەك.
الماتى قالاسى اكىمىنىڭ ورىنباسارى الىشەر ابدىقادىروۆ جاڭا جاتاقحانالاردىڭ سالىنۋى جاستار ءۇشىن ايتۋلى ءىس-شارا ەكەنىن اتاپ ءوتتى. ال ۋنيۆەرسيتەت رەكتورى جانسەيىت تۇيمەباەۆ قۇرىلىستىڭ ەكىنشى كەزەڭىن جۇزەگە اسىرۋ ستۋدەنتتەر ءۇشىن زاماناۋي مۇمكىندىكتەر سىيلايتىنىن ايتتى.
– ۇلتتىق ۋنيۆەرسيتەت ەلىمىزدەگى ىرگەلى, كوشباسشى وقۋ ورنى رەتىندە تانىمال. مەملەكەت باسشىسى بۇل جوسپاردى وتكەن جىلى ۋنيۆەرسيتەتىمىزگە جۇمىس ساپارىمەن كەلگەندە كورىپ, بارلىق باستامامىزعا قولداۋ كورسەتتى. ەلىمىز بەن شەتەل جاستارىنىڭ كوبى زامانعا ساي ءبىلىم الۋ ءۇشىن قازاق ۇلتتىق ۋنيۆەرسيتەتىن تاڭدايدى. بۇگىندە وقۋ ورداسىندا 24 مىڭنان استام ستۋدەنت ءبىلىم الىپ جاتىر. ونىڭ ىشىندە 50-گە جۋىق مەملەكەتتەن كەلگەن 3 مىڭنان استام شەتەلدىك ستۋدەنت بار. ۋنيۆەرسيتەت «QS WUR» الەمدىك رەيتينگىندە 150-ورىنعا كوتەرىلدى, – دەدى ج.تۇيمەباەۆ.
ايتۋلى ءىس-شارا بارىسىندا كەلەشەك ۇرپاق ءۇشىن جازىلعان حات ارنايى كاپسۋلاعا سالىندى.
ۋنيۆەرسيتەتتىڭ ءباسپاسوز قىزمەتى حابارلاعانداي, الداعى جوسپاردا قالاشىقتا 14 700 ورىندىق وقۋ عيماراتتارى, 12 مىڭ شارشى مەتر اكىمشىلىك كورپۋستارى, 35 مىڭ شارشى مەتر ەمحانا, 3 مىڭ شارشى مەتر سپورتتىق-ساۋىقتىرۋ ورتالىعى, قىزمەتكەرلەرگە ارنالعان تۇرعىن ءۇي, يننوۆاتسيالىق ورتالىق, عىلىمي-زەرتتەۋ ورتالىعى, تەحنوپارك جانە ستۋدەنتتەر مەن ماگيسترانتتارعا, دوكتورانتتارعا ءۇش گەكتار جەرگە 12 مىڭ ورىندىق جاتاقحانالار بوي كوتەرەتىن بولادى. سونداي-اق قولدانىستاعى جاتاقحانالار, وقۋ كورپۋستارى مەن اكىمشىلىك عيماراتتار كۇردەلى جوندەۋدەن وتەدى.
الماتى
