بيىل جەتىنشى رەت شىمىلدىعىن تۇرگەن جىر دوداسىنا رەسپۋبليكا ايماقتارىنان, وزبەكستان, قىرعىزستان, قىتاي جانە موڭعوليادان كەۋدەسىنە جىر تولعان جۇيرىكتەر قاتىستى.
ءدۇبىرلى دودانى ۋنيۆەرسيتەت باسشىسى دارحان ءبىلالوۆ اشىپ, قاتىسۋشىلارعا ساتتىلىك تىلەدى. رەكتور ءوز سوزىندە اباي ۋنيۆەرسيتەتىنىڭ 95 جىلدىق تاريحى, شىعارماشىلىق ءومىرى مەن عىلىمي جەتىستىكتەرىنە توقتالىپ, وتانسۇيگىشتىك, ۇلتتىق سانا-سەزىم, تۋعان جەر تاقىرىبى وراق ءتىلدى ايتىسكەرلەردىڭ شىعارماشىلىعىنا ارقاۋ بولسا, وسىناۋ ءداستۇردى بويىنا سىڭىرگەن جاستارىمىز ەل ەرتەڭى ءۇشىن ادال قىزمەت ەتسە دەگەن تىلەگىن ارنادى.
قازاقستاننىڭ ەڭبەك سىڭىرگەن قايراتكەرى, حالىقارالىق «ايتىس اقىندارى مەن جىرشى-تەرمەشىلەر» وداعىنىڭ باسقارما توراعاسى, «پاراسات», «قۇرمەت» وردەندەرىنىڭ يەگەرى ءجۇرسىن ەرمان جىل سايىن وتەتىن وسىناۋ ونەر دوداسىنىڭ جاس ۇرپاق تاربيەسىندەگى ماڭىزدىلىعىن اتاپ ءوتتى.
الامان دوداعا تۇسەتىن جاس اقىنداردىڭ ايتىسىنا پارلامەنت ءماجىلىسىنىڭ دەپۋتاتى, اقىن رينات زايتوۆ, «الاش» حالىقارالىق ادەبي سىيلىعىنىڭ لاۋرەاتى, بەلگىلى اقىن سەرىك قاليەۆ, فيلولوگيا عىلىمدارىنىڭ دوكتورى, پروفەسسور بالتاباي ابدىعازى ۇلى, ۇلىتاۋ وبلىسى مادەنيەت, تىلدەردى دامىتۋ جانە ارحيۆ ءىسى باسقارماسىنىڭ باسشىسى, ايتىسكەر اقىن ءانۋار ومار سەكىلدى ونەر مايتالماندارى قازىلىق ەتتى.
ءىس-شارا بارىسىندا عىلىم جانە جوعارى ءبىلىم ءمينيسترى ساياسات نۇربەكتىڭ قۇتتىقتاۋ حاتى وقىلدى. «حالقىمىزدىڭ سان عاسىردان كەلە جاتقان قاسيەتتى ايتىس ونەرىنە دەگەن قۇرمەتى ايرىقشا. بۇل – كەشەگى ءسۇيىنباي مەن جامبىل, ءبىرجان مەن سارا, كەمپىرباي مەن شوجە بابالارىمىزدان قالعان اسىل ونەر. ۇلتتىق بولمىسىمىزدى, قازاقي قۇندىلىعىمىزدى دارىپتەيتىن ايتىس ونەرى تاۋەلسىز ۇرپاقتىڭ ۇلتتىق قازىناسى دەپ بىلەمىن. ءسۇيىنباي بابامىز اتىنداعى جىر دوداسىنىڭ ءداستۇرلى تۇردە ۇيىمداستىرىلۋى, جاستاردىڭ بويىنداعى اقىندىق دارىندى دامىتىپ, سۋىرىپسالما قابىلەتىن شىڭداۋعا, اقىندىق مەكتەپتىڭ قالىپتاسۋىنا نەگىز بولاتىن, قازاق رۋحانياتىنا قوسىلاتىن ۇلكەن مۇرا بولاتىنى ءسوزسىز» دەلىنگەن قۇتتىقتاۋ حاتتا.
ەكى كەزەڭنەن تۇراتىن ايتىسقا 18 ايتىسكەر جولداما الدى. جىردان شاشۋ شاشىپ, جىر كورىگىن قىزدىرعان جۇيرىكتەردىڭ ونەرىنە ەكى كۇن بويى كوپشىلىك ءتانتى بولدى. قازىلار القاسىنىڭ شەشىمىمەن «مەنىڭ ءپىرىم – ءسۇيىنباي» ءداستۇرلى VII حالىقارالىق جاس اقىندار ايتىسىنىڭ باس جۇلدەسىن كوكشەتاۋدان كەلگەن نۇرماحان جاقىپ يەلەنسە, I ورىن قازاق ۇلتتىق ونەر ۋنيۆەرسيتەتىنىڭ ستۋدەنتى ايىم اسىلبەكقىزىنا بۇيىردى. قىرعىزستاننان كەلگەن ۇلان توقتوسىنوۆ پەن ت.جۇرگەنوۆ اتىنداعى ونەر اكادەمياسىنىڭ ستۋدەنتى ەرداۋلەت ساردار II ورىندى ەنشىلەسە, III ورىندى باتىرجان كادىرباي, جامبىل باقىتالى جانە قۋاندىق كەنجەبەك ۇلى ءوزارا ءبولىسىپ, ارنايى جۇلدەلەر مەن اقشالاي سىيلىقتارعا يە بولدى.
الماتى
