كەزدەسۋ بارىسىندا قازاقستان ەلشىسى شەيح ا. ات-تايەبتى بيىلعى جىلى سۇلتان بەيبارىستىڭ 800 جىلدىعىن تويلاۋ اياسىندا وتەتىن ءىس-شارالارمەن تانىستىرىپ ءوتتى.
ءال-ازھار شەيحى ءوز تاراپىنان كايردەگى ءاز-زاھير بەيبارىس مەشىتىنىڭ سالتاناتتى اشىلۋىنا وراي, سونداي-اق ءال-ازھار ۋنيۆەرسيتەتىندە سۇلتان بەيبارىستىڭ 800 جىلدىق مەرەيتويىنا ارنالعان حالىقارالىق كونفەرەنتسيا وتكىزۋ بويىنشا مۇددەلى مىسىرلىق مەكەمەلەرگە ءتيىستى تاپسىرمالارىن بەردى.
ايتا كەتەتىن جايت, مەرەيتويعا قاتىستى 500-دەن استام ءىس-شارا ۇيىمداستىرۋ جوسپارلانسا, ونىڭ 50-گە جۋىعى حالىقارالىق جانە رەسپۋبليكالىق دەڭگەيدە وتكىزىلمەك. بۇل ءىس-شارالار مادەني-اعارتۋ جانە ءبىلىم بەرۋ سالالارىندا ۇلى سۇلتان بەيبارىس مۇراسىن كەڭىنەن ناسيحاتتاۋدى كوزدەيدى. 2023 جىلعى 24 اقپاندا استانادا كورنەكتى قولباسشى سۇلتان بەيبارىس اتىنداعى كوشە اشىلدى.
